មន្ត្រីជាន់ខ្ពស់ក្រសួងសុខាភិបាល អះអាងថា លទ្ធផលសំណាកពីវិទ្យាស្ថានប៉ាស្ទ័រ បង្ហាញថា អ្នកបកប្រែ រួមទាំងអ្នកបើករ៉ឺម៉កកង់បីឱ្យស្រ្តីជនជាតិអង់គ្លេសដែលមានវីរុសកូវីដ-១៩គឺ អវិជ្ជមាន។
អ្នកនាំពាក្យក្រសួងសុខាភិបាល លោក លី សូវ៉ាន់ ប្រាប់វីអូឌីនៅថ្ងៃល្ងាចនេះថា គ្រូពេទ្យអនុញ្ញាតឱ្យអ្នកបកប្រែ និងអ្នកបើករ៉ឺម៉ក់កង់បីទៅសម្រាកនៅផ្ទះ ដោយត្រូវធ្វើការតាមដានសុខភាពបន្តទៀតរហូតគ្រប់១៤ថ្ងៃ។
ដោយឡែក វត្ថុសំណាកមនុស្សចំនួន៦៣នាក់ទៀត ដែលធ្វើដំណើរជាមួយស្ត្រីជនជាតិអង់គ្លេសដែលមានវីរុសកូវីដ-១៩នោះ នឹងដឹងលទ្ធផលនៅថ្ងៃនេះ។
កាលពីថ្ងៃទី១០ ខែមីនា ឆ្នាំ២០២០ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានរកឃើញស្ត្រីជនជាតិអង់គ្លេសអាយុ៦៥ឆ្នាំម្នាក់ មានវីរុស Covid-19។
រដ្ឋមន្ត្រីក្រសួងសុខាភិបាល ឱ្យដឹងថា ស្ត្រីជនជាតិអង់គ្លេសរូបនេះ និងស្ត្រីចំនួន ៤នាក់ទៀត បានធ្វើដំណើរតាមយន្តហោះ ចេញពីទីក្រុងឡុងនៃប្រទេសអង់គ្លេស មកដល់ទីក្រុងហាណូយ ប្រទេសវៀតណាម នៅថ្ងៃទី០២ ខែមីនា ឆ្នាំ២០២០ ហើយបានមកដល់រាជធានីភ្នំពេញ នៅថ្ងៃទី៧ ខែមីនា កន្លងមកនេះ៕
