សហរដ្ឋអាមេរិកបានសម្តែងការមិនពេញចិត្តចំពោះរដ្ឋាភិបាលកម្ពុជា ដែលភ្ជាប់សហរដ្ឋអាមេរិកថា ឃុបឃិតជាមួយលោក កឹម សុខា ចង់ផ្តួលរំលំរដ្ឋាភិបាល។
ឯកអគ្គរដ្ឋទូតអាមេរិកប្រចាំកម្ពុជា លោក Patrick Murphy ថ្លែងបន្ទាប់ពីចូលអង្កេតសវនាការលោក កឹម សុខា នៅព្រឹកនេះថា លោក កឹម សុខា គឺជាមនុស្សល្បីល្បាញលើពិភពលោកក្នុងការលើកតម្កើងសិទ្ធិមនុស្ស និងសិទ្ធិសេរីភាព។ លោកសង្ឃឹមថា សេរីភាពលោក កឹម សុខា នឹងត្រូវស្ដារឡើងវិញ និងចង់ឃើញពលរដ្ឋកម្ពុជា មានសិទ្ធិពេញលេញក្នុងការចូលរួមសកម្មភាពនយោបាយ។
ឯកអគ្គរដ្ឋទូតរូបនេះ ក៏សម្តែងការមិនពេញចិត្តចំពោះរដ្ឋាភិបាលកម្ពុជា ដែលចោទថា អាមេរិកនៅពីក្រោយលោក កឹម សុខា ចង់ផ្តួលរំលំរដ្ឋាភិបាល។
លោក Patrick Murphy៖ «យើងក៏មានការអាក់អន់ចិត្ត ព្រោះនៅក្នុងសវនាការ ព្រះរាជអាជ្ញាព្យាយាមនិយាយថា អាមេរិកពាក់ព័ន្ធករណីនេះ»។
លោកនាយករដ្ឋមន្ត្រី ហ៊ុន សែន បានបញ្ជាឱ្យកម្លាំងប្រដាប់អាវុធចាប់ខ្លួនលោក កឹម សុខា នៅម៉ោងជាង ១២យប់រំលងអធ្រាត្រ ថ្ងៃទី២ ចូលឈានចូលថ្ងៃទី៣ ខែកញ្ញា ឆ្នាំ២០១៧ ដោយចោទលោក កឹម សុខា ថាឃុបឃិតជាមួយអាមេរិករៀបចំផែនការផ្តួលរំលំរដ្ឋាភិបាលកម្ពុជាដែលកើតចេញពីការបោះឆ្នោត។
អ្នកនាំពាក្យក្រសួងយុត្តិធម៌ លោក ជិន ម៉ាលីន ហៅការលើកឡើងនេះថា គ្រាន់តែជាជ្រុងមួយនៃទស្សនៈរបស់ឯកអគ្គរដ្ឋទូតអាមេរិកប៉ុណ្ណោះ ។
លោកថា៖ «កន្លងមក រដ្ឋាភិបាលមិនបានធ្វើការចោទប្រកាន់អីថាសហរដ្ឋអាមេរិកជាប់ពាក់ព័ន្ធ ឬក៏នៅពីក្រោយសំណុំរឿងលោក កឹម សុខា អីនោះទេ។ ហើយតុលាការក៏មិនទាន់បានសន្និដ្ឋានថា សហរដ្ឋអាមេរិកពាក់ព័ន្ធ ឬក៏មិនពាក់ព័ន្ធស្អីនោះទេ ព្រោះស្ថិតក្នុងនីតិវិធីរបស់តុលាការកន្លងមក លោក កឹម សុខា ខ្លួនឯងតើជាអ្នកលើកឡើងពីឈ្មោះសហរដ្ឋអាមេរិកក្នុងកំណត់ហេតុនៃសំណុំរឿងរបស់គាត់»។
អ្នកវិភាគនយោបាយ លោក ឯម សុវណ្ណរ៉ា បង្ហាញការយល់ឃើញថា សាររបស់អាមេរិកអាចជាការពញ្ញាក់អារម្មណ៍អាជ្ញាធរកម្ពុជាជាថ្មីទៀត ឱ្យគិតពិចារណាទៅលើបទចោទលោក កឹម សុខា ឡើងវិញ ដែលថាអាមេរិកមិនអាចទទួលយកបទចោទនេះបានទេ។
អ្នកវិភាគរូបនេះយល់ឃើញទៀតថា សារនេះអាចនឹងជំរុញឱ្យរដ្ឋាភិបាលកម្ពុជាពិចារណាផងដែរពីការស្តារទំនាក់ទំនងល្អជាមួយអាមេរិក ដើម្បីទាញយកប្រយោជន៍សេដ្ឋកិច្ចដែលកម្ពុជាត្រូវការចំាបាច់នៅឡើយ។
លោកថា៖ «លក្ខខណ្ឌសេដ្ឋកិច្ចក៏ជាកត្តាមួយដែលជាជំហរបស់កម្ពុជា នៅក្នុងក្រមខណ្ឌអន្តរជាតិ មិនឱ្យផ្អៀងទៅលើលោកខាងកើតចិនតែមួយទេ គឺគិតពិចារណាប្រយោជន៍សេដ្ឋកិច្ចដែលបានពីប្រព័ន្ធអនុគ្រោះ GSP និង EBA ពីសហគមន៍អឺរ៉ុប និងសហរដ្ឋអាមេរិក»។
តាមលោក Patrick Murphy សហរដ្ឋអាមេរិកបានផ្តល់ជំនួយចំនួន ៣ពាន់លានដុល្លារ ដល់ប្រទេសកម្ពុជា ក្នុងពេលប៉ុន្មានទសវត្សរ៍កន្លងទៅនេះ ។
ជំនួយទាំងនោះប្រកបដោយតម្លាភាព ដើម្បីពង្រឹងស្ថាប័ន និងគណបក្សនយោបាយ ស្របតាមរដ្ឋធម្មនុញ្ញរបស់ប្រទេសកម្ពុជា។
កម្មវិធីរបស់អាមេរិក សម្រាប់គណបក្សនយោបាយទាំងអស់ ដោយរួមទាំងគណបក្សប្រជាជនកម្ពុជា ដែលកំពុងគ្រប់គ្រងប្រទេស និងស្ថាប័នជាច្រើនទៀតរបស់រដ្ឋាភិបាល។
រដ្ឋាភិបាលអាមេរិកបញ្ជាក់ថា ខ្លួនមិនដែលចង់ជ្រៀតជ្រែកក្នុងអភិបាលកិច្ចរបស់ប្រទេសកម្ពុជាទេ។ តែថា អាមេរិកគោរពពេញលេញចំពោះឯករាជ្យភាព និងអធិបតេយ្យភាពរបស់ប្រទេសកម្ពុជា។
តែអាមេរិកគាំទ្រសេរីភាពក្នុងការបញ្ចេញមតិ សង្គមស៊ីវិលដែលមានភាពសកម្ម និងការអត់ឱនដល់ទស្សនៈប្រឆាំង ជាផ្នែកសំខាន់ចាំបាច់មួយនៃគ្រប់លទ្ធិប្រជាធិបតេយ្យ៕
