ភូមិទ្រាយ ខេត្តសៀមរាប៖ លោក ម៉ៃ ម៉ៅ បានប្រកបមុខរបរជាអ្នកនេសាទក្នុងភូមិទ្រាយស្ថិតនៅភាគខាងជើងប្រទេសកម្ពុជា អស់រយៈពេលជាង ៦០ឆ្នាំមកហើយ មុនពេលលោកសម្រេចចិត្តបោះបង់របរនេសាទនេះក្នុងឆ្នាំ២០១៨។ ស្ថិតក្នុងវ័យ ៧៧ឆ្នាំ លោក ម៉ៃ ម៉ៅ បារម្ភថា កម្លាំងកាយ និងសុខភាពទន់ខ្សោយ មិនអាចឱ្យលោកបន្តមុខរបរនេសាទនេះ ហើយលោកអាចនឹងធ្លាក់ពីលើទូកចូលទឹកថ្ងៃណាមួយក៏ថាបាន។
មិនត្រឹមតែលោក ម៉ៅ ជាមនុស្សចាស់នោះទេ ដែលបោះបង់របរនេសាទនេះ ប៉ុន្តែ សូម្បីបុរសវ័យក្មេងពេញកម្លាំងក៏បោះបង់របរនេសាទនៅបឹងទន្លេសាបនេះដែរ ហើយពួកគេបានងាកមកដាំម្ទេស ឬក៏ធ្វើចំណាកស្រុកទៅរកការងារនៅក្រៅប្រទេស ជំនួសឱ្យរបរនេសាទដែលបាត់បង់នេះ ដើម្បីប៉ះប៉ូវចំណូលដែលពួកគេបាត់បង់តាមរយៈរបរនេសាទកន្លងមកនេះ។
ក្នុងភូមិទ្រាយ និងនៅតាមសហគមន៍ផ្សេងទៀត ដែលមានព្រំប្រទល់ជាប់នឹងបឹងទន្លេសាប ជាបឹងទឹកសាបធំជាងគេបំផុតនៅតំបន់អាស៊ីអាគ្នេហ៍នោះ ព្រៃលិចទឹកបានផ្តល់ជម្រកសម្រាប់ត្រីពង និងការបន្តពូជគ្រប់រដូវកាល។
នៅពេលនេះ ក្រុមមន្ត្រីរដ្ឋាភិបាលក៏ចាត់ទុកព្រៃលិចទឹក គឺជាកន្លែងដែលអាចផ្តល់ផលចំណេញច្រើនសន្ធឹកសន្ធាប់នៅលើទីផ្សារកាបោនអន្តរជាតិ។
ខណៈពេលប្រព័ន្ធអេកូឡូស៊ីបឹងទន្លេសាបរងផលប៉ះពាល់ដោយសារទំនប់វារីអគ្គិសនី គ្រោះរាំងស្ងួត និងភ្លើងឆេះព្រៃដែលមិនធ្លាប់មានពីមុនមក ព្រៃលិចទឹកដែលប្រជាពលរដ្ឋអាស្រ័យផល និងលទ្ធភាពក្នុងការស្រូបយកសារធាតុកាបោនរបស់ព្រៃលិចទឹក ប្រឈមនឹងការគំរាមកំហែងកាន់តែខ្លាំងឡើង។
អំឡុងរដូវក្តៅពីខែវិច្ឆិកា ដល់ខែឧសភា ជាពេលដែលប្រជាពលរដ្ឋនៅភូមិទ្រាយរស់នៅលើដីគោកនោះ គេនៅតែអាចមើលឃើញមែកឈើធំៗស្ថិតក្នុងចំណោមផ្ទះសសរឈើក្នុងភូមិនេះ ដែលមានសំណាញ់ទៅព្យួរ និងម៉ូតូផ្អែកនឹងជញ្ជាំងផងនោះ។
ប៉ុន្តែ អំឡុងរដូវវស្សា ទឹកទន្លេបានហូរពីទន្លេមេគង្គចូលទៅបឹងទន្លេសាប ហើយធ្វើឱ្យផ្ទៃបឹងកើនដល់ ១៣.០០០គីឡូម៉ែត្រការ៉េ គឺស្មើប្រហែល ៥ដងនៃផ្ទៃបឹងនៅរដូវប្រាំង។ ប្រជាពលរដ្ឋប្រហែល ៩០០.០០០នាក់ដែលរស់នៅតំបន់ទំនាបលិចទឹកជុំវិញបឹងទន្លេសាប ត្រូវរស់នៅលើផ្ទៃទឹក និងធ្វើដំណើរពីផ្ទះមួយទៅផ្ទះមួយតាមកាណូតរយៈពេលកន្លះឆ្នាំ។
ក្នុងភូមិទ្រាយ ដើមគុំភ្នាង ដើមរាំង និងដើមផ្ទោល ដុះរាយប៉ាយនៅចន្លោះផ្ទះមួយទៅផ្ទះមួយ និងក្លាយជាជម្រកត្រីពង និងមានវល្លិ៍ត្រោះដុះចាក់ស្រេះនៅតាមឫស និងមែកឈើបង្កើតបានជាសំបុកត្រីពង នេះបើតាមការរៀបរាប់របស់អ្នកស្រុកប្រាប់អ្នកយកព័ត៌មាន ខណៈពួកគេលូកដៃបេះត្រីចៀនដែលបានចម្អិនសម្រាប់អាហារថ្ងៃត្រង់របស់ពួកគេ។
ក្នុងបទសម្ភាសនៅការិយាល័យរបស់លោកក្នុងទីក្រុងភ្នំពេញ លោក អ៊ុក វិបុល ប្រធាននាយកដ្ឋានអភិរក្សជលផល និយាយថា ប្រទេសកម្ពុជាយល់ដឹងយូរមកហើយអំពីសារៈសំខាន់របស់ព្រៃលិចទឹក ដែលផ្តល់ជាកន្លែងបង្កកំណើតរបស់ត្រីទឹកសាប ជាប្រភពប្រូតេអុីន និងអាហារូបត្ថម្ភសម្រាប់ប្រជាជនកម្ពុជាផងដែរ។
លោក អ៊ុក វិបុល មានប្រសាសន៍ថា៖ «យើងគ្រប់គ្រងធនធានជលផល និងជម្រកត្រីទាំងអស់គ្នា។ វាមានទំនាក់ទំនងជាមួយគ្នា។ យើងមិនអាចមានមួយអត់មួយបានទេ»។
ព្រៃនឹងងាប់ នៅពេលណាភ្លើងឆេះ
ខណៈពេលសេដ្ឋកិច្ចកម្ពុជាមានការរីកចម្រើនយ៉ាងឆាប់រហ័ស ប្រទេសនេះក៏មានអត្រាកាប់បំផ្លាញព្រៃឈើក្នុងល្បឿនលឿនដូចគ្នាផងដែរ។ ផ្អែកតាមរូបភាពផ្កាយរណបរបស់អង្គការអភិរក្សព្រៃឈើដែលមានឈ្មោះថា Global Forest Watch បានប៉ាន់ប្រមាណថា ប្រទេសកម្ពុជាបានបាត់បង់ព្រៃឈើ ២,១៧ លានហិកតា ចាប់ពីចន្លោះឆ្នាំ២០០១ ដល់ឆ្នាំ២០១៨ គឺស្មើនឹង ១ភាគ៤ នៃការបាត់បង់គម្របព្រៃឈើចាប់តាំងពីឆ្នាំ២០០០ ហើយបានបញ្ចេញសារធាតុកាបោនប្រមាណ ៩១៤ម៉េហ្គាតោន (megaton) ឬស្មើនឹង ៩១៤លានតោន។
តំបន់ការពារបឹងទន្លេសាប ត្រូវបានកត់ត្រាថា បាត់បង់ព្រៃឈើប្រមាណ ១៦.៨០០ហិកតា ចាប់ពីចន្លោះឆ្នាំ២០០១ និងឆ្នាំ២០០៨ នេះបើតាមការប៉ាន់ប្រមាណដោយប្រើប្រាស់ឧបករណ៍វាស់ស្ទង់បែបឌីជីថលរបស់អង្គការនេះ។
ព្រៃលិចទឹកទាំងនេះ មិនត្រូវបានកាប់រានដូចព្រៃឈើនៅតំបន់ភាគខាងកើត និងតំបន់មាត់សមុទ្ររបស់ប្រទេសកម្ពុជាទេ ប៉ុន្តែ គ្រោះរាំងស្ងួតធ្ងន់ធ្ងរមិនធ្លាប់មានកាលពីឆ្នាំ២០១៦ បង្កឱ្យមានភ្លើងឆេះព្រៃធំធេង និងធ្វើឱ្យទំហំព្រៃនេះថយចុះ។
អង្គការអភិរក្សសមាគមអភិរក្សសត្វព្រៃ (WCS) បានឃ្លាំមើលព្រៃលិចទឹកនៅតំបន់ព្រែកទាល់ ជាតំបន់ការពារនៅតាមបឹងទន្លេសាបក្នុងខេត្តបាត់ដំបង អស់រយៈពេលជាង ២០ឆ្នាំមកហើយ។ ប៉ុន្តែ លោក សាយមិន ម៉ាហូដ (Simon Mahood) ទីប្រឹក្សាបច្ចេកទេសរបស់អង្គការ WCS និយាយថា អង្គការរបស់លោកមិនអាចទស្សន៍ទាយថា តើភ្លើងឆេះព្រៃលិចទឹកដែលអាចនឹងកើតមាននៅតំបន់នេះ នៅឆ្នាំខាងមុខ មានទំហំប៉ុណ្ណានោះទេ។
លោក ម៉ាហូដ បាននិយាយថា ភ្លើងឆេះព្រៃភាគច្រើន បង្កឡើងដោយសារមនុស្ស ដែលមូលហេតុកើតមានចាប់ពីការខកខានមិនបានពន្លត់ភ្លើងឱ្យបានត្រឹមត្រូវក្រោយពីចម្អិនអាហាររួចរាល់ រហូតដល់ការដុតព្រៃដោយចេតនា ប៉ុន្តែ ភាពរាំងស្ងួតខ្លាំងមិនធ្លាប់មានកាលពីឆ្នាំ២០១៦ រឹតតែធ្វើឱ្យមានសភាពក្តៅខ្លាំង និងបណ្តាលឱ្យភ្លើងឆេះព្រៃរាលដាលឆាប់រហ័ស។
លោក ម៉ាហូដ បាននិយាយថា៖ «កន្លងមក អ្វីៗហាក់មានសំណើមច្រើនជាងនេះ ហើយគេមិនបាច់ខំស្រោចទឹកពន្លត់ភ្លើងផេះផងទេ។ ប៉ុន្តែ អ្វីៗបានប្រែប្រួល ហើយក្នុងស្ថានភាពនេះ ប្រសិនបើ [កសិករ] មិនចាក់ទឹកពន្លត់ផេះទេ នោះវាអាចងាយនឹងបង្កឱ្យមានអគ្គិភ័យ»។
ស្របពេលអគ្គិភ័យនៅផ្នែកខាងក្នុងនៃព្រៃលិចទឹក អាចខុសពីការរំពឹងទុក លក្ខខណ្ឌដែលបង្កឡើងដោយបម្រែបម្រួលអាកាសធាតុនៅតាមបឹងទន្លេសាប បង្កើតបានជាប្រព័ន្ធ «ព្យុះ» ដ៏ខ្លាំងល្មមមួយ។
លោក ម៉ាហូដ បានព្រមានថា ទោះបីជាអង្គការ WCS បានជួយឆ្មាំការពារតំបន់អភិរក្សព្រែកទាល់ និងសហគមន៍ក្នុងការប្រយុទ្ធប្រឆាំងនឹងភ្លើងឆេះព្រៃកាលពីឆ្នាំ២០១៦នោះក៏ដោយ ក៏ពួកគេនៅតែខ្វះសម្ភារក្នុងការទម្លាក់ទឹកពីលើអាកាស ដើម្បីពន្លត់ភ្លើង ហើយត្រូវនាំយកទឹកពីតំបន់ឆ្ងាយនៃតំបន់បឹងនេះ។
លោកនិយាយថា៖ «ព្រៃលិចទឹកមិនមែនជាព្រៃដែលអាចឆេះតាមបែបធម្មជាតិនោះទេ ហើយនៅពេលណាវាឆេះ វានឹងងាប់»។
លោក ម៉ៃ ចំរុង ជាអ្នកនេសាទនៅភូមិទ្រាយ និងជាក្មួយប្រុសរបស់លោក ម៉ៃ ម៉ៅ បាននិយាយថា ភូមិនេះបាត់បង់ព្រៃច្រើនហិកតានៅរដូវបន្តបន្ទាប់នេះ អំឡុងខែមេសា និងខែឧសភា ឆ្នាំ២០១៩។
លោកនិយាយថា ប្រជាពលរដ្ឋដែលរស់នៅក្នុងភូមិទ្រាយ ការពារដើមឈើរបស់ពួកគេ ប៉ុន្តែ ភូមិរបស់ពួកគាត់ក៏ទាក់ទាញប្រជាពលរដ្ឋតំបន់ផ្សេងទៀតដែលរស់នៅចម្ងាយ ៣០គីឡូម៉ែត្រ ក្បែរផ្លូវជាតិ ឱ្យមកតំបន់នោះ ដើម្បីនេសាទ ដោះដូរទំនិញ និងដាំដំណាំកាន់តែច្រើនឡើង។
លោក និងអ្នកភូមិមួយចំនួនទៀត អះអាងថា «អ្នកខាងក្រៅ» បានទម្លាក់កន្លុយបារី ឬក៏មានចេតនាបង្កអគ្គិភ័យ ដើម្បីរានដី ឬបង្អើលសត្វព្រៃ ដើម្បីពួកគេអាចចាប់សត្វទាំងនោះ។
លោក ចំរុង និយាយថា៖ «ចំពោះខ្ញុំ ខ្ញុំមិនគិតថា ភ្លើងឆេះព្រៃនឹងកើតឡើងទេ ប្រសិនបើគ្មានមនុស្សទៅធ្វើអ្វីសោះនោះ»។
ការប្រកបរបរទទួលទានតាមរយៈការនេសាទត្រី គឺធ្លាប់ជាមុខរបរដ៏កាក់កបសម្រាប់លោក ចំរុង និងក្រុមគ្រួសារ ប៉ុន្តែ គ្រោះរាំងស្ងួត និងភ្លើងឆេះព្រៃ កំពុងតែបង្កការលំបាកខ្លាំងឡើងៗពីមួយឆ្នាំទៅមួយឆ្នាំ។
«ទឹកកាន់តែតូច ត្រីក៏កាន់តែតិច» គឺជាពាក្យដែលគេនិយមនិយាយក្នុងចំណោមប្រជាពលរដ្ឋ។ ខណៈអ្នកសារព័ត៌មានដើរតាមតំបន់ដីគោកដែលទឹកជន់លិចនៅរដូវវស្សានោះ ស្ត្រីម្នាក់ដែលអង្គុយមើលពីរានហាលលើផ្ទះរបស់គាត់ និយាយថា អ្នកស្រីមិនបានចេញទូកទៅរកត្រីទេនៅថ្ងៃនោះ ដោយសារតែគ្មានត្រី។
ស្របពេលបម្រែបម្រួលអាកាសធាតុ បានធ្វើឱ្យរបបទឹកភ្លៀងប្រែប្រួលទៅរកភាពរាំងស្ងួតនៅក្នុងរយៈពេល ៣ឆ្នាំចុងក្រោយនេះ ទន្លេមេគង្គ និងប្រព័ន្ធអេកូឡូស៊ីទាំងមូលរបស់ទន្លេនេះ ត្រូវបានបំផ្លាញដោយសារទំនប់វារីអគ្គិសនីនៅផ្នែកខាងលើនៃទន្លេមេគង្គ ស្ថិតក្នុងប្រទេសឡាវ និងចិន។
កាលពីឆ្នាំមុន គណៈកម្មការទន្លេមេគង្គ ដែលជាស្ថាប័នគ្រប់គ្រង និងដានដានក្នុងតំបន់ បានរាយការណ៍ពីកម្រិតទឹកទាបបំផុតមិនធ្លាប់មាន ខណៈមានការជន់លិចខ្លាំងនៅខែកក្កដា ហើយបន្ទាប់មក ស្ថាប័ននេះបានព្រមានពីគ្រោះរាំងស្ងួតធ្ងន់ធ្ងរនៅខែធ្នូ។
កម្រិតទឹកដ៏ទាបនេះ បានប្រែក្លាយទន្លេមេគង្គទៅជាពណ៌បៃតងដ៏ស្រស់ស្អាត ប៉ុន្តែ វាបានកែប្រែច្រើននូវកម្រិតល្បាប់ភក់ប្រកបដោយជីវជាតិ និងកម្រិតល្បាយអុកស៊ីហ្សែននៅក្នុងទឹក ដែលសារធាតុទាំងពីរនេះ មានសារៈសំខាន់ចំពោះការរស់រានរបស់ត្រីក្នុងបឹងទន្លេសាប និងអាចធ្វើឱ្យវដ្តជីវិតរបស់វាច្របូកច្របល់។
លោក ម៉ៅ ជាអ្នកនេសាទដែលប្តូរមកជាកសិករដាំម្ទេសវិញនោះ និយាយថា លោកបានជ្រើសរើសពេលវេលាត្រឹមត្រូវក្នុងការចូលនិវត្តន៍ពីរបរនេសាទក្នុងរយៈពេលពីរឆ្នាំកន្លងមកនេះ។
លោកបាននិយាយថា៖ «ពីរឆ្នាំចុងក្រោយនេះ ស្ថានភាពគឺអាក្រក់មែនទែន។ គ្រោះរាំងស្ងួត គឺក្តៅហួតហែងមែនទែន»។
លោក ម៉ៅ និងពលរដ្ឋផ្សេងទៀត ក៏បានសម្រេចចិត្តចាក់ដីបំពេញ ដើម្បីដាំម្ទេស ពីព្រោះមានតម្រូវការពីអតិថិជនច្រើន ហើយលោកអាចរកចំណូលបានចន្លោះពី ១០,០០០រៀល ទៅ ២០,០០០រៀលក្នុងមួយគីឡូក្រាម ( ២.៥ ទៅ ៥ដុល្លារ)។ លោកនិយាយថា បើទោះបីដំណាំទាំងនេះ ត្រូវប្រើពេលពីរបី ឬបួនខែ ប៉ុន្តែ វាបានក្លាយជារបរដ៏កាក់កបជាងរបរនេសាទ ហើយថា ដីព្រៃលិចទឹកនេះ បានស្រឡះហើយដោយសារតែភ្លើងឆេះ។
ផ្អែកតាមការសង្កេត លោក ចំរុង ជឿថា៖ «ត្រីមួយរយប្រភេទបានដាច់ពូជហើយ» ហើយលោកបានរំឭកឈ្មោះប្រភេទត្រីទាំងនោះ រួមទាំងប្រាប់ពីទំហំ និងពណ៌ទៀតផង។ ផលប៉ះពាល់លើឧស្សាហកម្មនេសាទនេះ គឺពិតជាកើតមានសម្រាប់អ្នកភូមិទ្រាយ។ ពលរដ្ឋជាច្រើននិយាយប្រាប់អ្នកសារព័ត៌មានថា បងប្អូនបង្កើត និងបងប្អូនជីដូនមួយរបស់ពួកគាត់ បានចាកចេញពីភូមិទៅរកការងារធ្វើនៅប្រទេសថៃ ឬវៀតណាម។
នៅក្រោមផ្ទះបណ្ដែតទឹករបស់គាត់ លោក ចំរុង បានរាយសំណាញ់មងធ្វើជាបៀសម្រាប់ប្រស់ត្រីរាប់រយក្បាលនៅក្នុងនោះ ដើម្បីធានាថា គ្រួសារគាត់មានត្រីស្រស់សម្រាប់ធ្វើម្ហូប។ លោក ចំរុង មានការខកចិត្តដោយសារថា កង្វះការឆ្លើយតបភ្លាមៗរបស់រដ្ឋាភិបាលនៅពេលមានភ្លើងឆេះព្រៃ និងការអូសបន្លាយនៃភាពរាំងស្ងួត។
លោកបាននិយាយថា៖ «ក្រុមមន្ត្រីនិយាយថា ត្រីនៅតែមានក្នុងបឹងទន្លេសាប ប៉ុន្តែ គ្មានត្រីនោះទេ»។
ក្ដីរំពឹងទទួលបានប្រាក់ពីការលក់កាបោន
កាលពីឆ្នាំ២០១៩ ក្រសួងកសិកម្ម រុក្ខាប្រមាញ់ និងនេសាទ យល់ថា វាមានភាពបន្ទាន់ក្នុងកិច្ចប្រឹងប្រែងការពារព្រៃលិចទឹក ដើម្បីឆ្លៀតយកប្រយោជន៍ពីគម្រោងទីផ្សារកាបោនអន្តរជាតិ។
ទីផ្សារកាបោនបង្កើតបានជាប្រព័ន្ធមួយ ជាទីដែលក្រុមហ៊ុន និងប្រទេសនានាដែលបញ្ចេញឧស្ម័នផ្ទះកញ្ចក់កម្រិតខ្ពស់អាច «ទូទាត់» ឬកាត់បន្ថយការបញ្ចេញឧស្ម័នតាមរយៈការឧបត្ថម្ភមូលនិធិដល់ការអភិរក្ស ឬកិច្ចប្រឹងប្រែងសម្របខ្លួន ដែលកាត់បន្ថយការបញ្ចេញឧស្ម័នពុលជាសកល។
កាលពីឆ្នាំ២០១៧ រដ្ឋាភិបាលកម្ពុជា មានឱកាសទទួលបានមូលនិធិ ៥.៥លានដុល្លារ ដើម្បីសាកល្បង និងបង្កើតប្រព័ន្ធរ៉េដបូកដែលគ្រប់គ្រងដោយរដ្ឋ។ កម្មវិធីរ៉េដបូកដែលមានន័យថា «ការកាត់បន្ថយការបញ្ចេញឧស្ម័នផ្ទះកញ្ចក់ពីការបាត់បង់ និងរេចរឹលព្រៃឈើ» គឺជាកម្មវិធីអភិរក្សផ្អែកតាមទីផ្សារកាបោន ដែលការទិញកាបោន ផ្ដល់អត្ថប្រយោជន៍ទៅដល់កិច្ចខិតខំប្រឹងប្រែងការពារព្រៃឈើ និងតែងតែគាំទ្រដល់ចីរភាពរបស់សហគមន៍ក្បែរខាង។
ប្រទេសកម្ពុជា ទទួលបានប្រាក់ពីមូលនិធិបម្រែបម្រួលអាកាសធាតុសកល ដែលមួយផ្នែកធំនៃមូលនិធិនោះបានមកពីគម្រោងដៃគូកាបោនព្រៃឈើរបស់ធនាគារពិភពលោក ដែលគាំទ្រមូលនិធិភាគច្រើនដោយរដ្ឋាភិបាលបស្ចឹមប្រទេស ដើម្បីការពារ និងត្រៀមបម្រុងព្រៃឈើបីប្រភេទ ដែលអាចស្រូបយកកម្រិតកាបោនបានខ្ពស់ រួមទាំងព្រៃលិចទឹកទំហំ ៤០ហិកតានៅលើបឹងទន្លេសាបផងដែរ។
ប្រសិនបើកម្ពុជាអាចបង្ហាញទៅស្ថាប័នវាយតម្លៃអន្តរជាតិថា លទ្ធភាពស្រូបយកកាបោន ឬ «សន្និធិកាបោន» គឺមានភាពច្បាស់លាស់ និងគ្រប់គ្រងបានល្អ នោះគម្រោងទាំងអស់នេះ អាចនឹងត្រូវបានដាក់លក់នៅលើទីផ្សារកាបោន។
កាលពីខែមករា លោក សាយ សំអាល់ បានរំលេចអំពីគោលបំណងរបស់រដ្ឋាភិបាលក្នុងការអភិរក្សធនធានធម្មជាតិ ដើម្បីឱ្យកម្ពុជាអាចទទួលបានមកវិញនូវឥណទាន និងប្រាក់កាបោន នេះបើតាមសេចក្តីរាយការណ៍របស់កាសែតភ្នំពេញ ប៉ុស្តិ៍។
លោក សាយ សំអាល់ បានមានប្រសាសន៍ថា កិច្ចប្រឹងប្រែងរបស់អង្គការ WCS, WWF Cambodia និងសហគមន៍ក្នុងមូលដ្ឋានក្នុងការការពារធនធានធម្មជាតិ ផ្តល់ឱកាសឱ្យរដ្ឋាភិបាលលក់ឥណទានកាបោន ស្របពេលជាមួយគ្នានោះដែរ ក៏គាំទ្រដល់ការអភិវឌ្ឍសេដ្ឋកិច្ចក្នុងស្រុកផងដែរ។
អំឡុងពេលថ្លែងនៅដែនជម្រកសត្វព្រៃកែវសីមា នៅខេត្តមណ្ឌលគិរី ភាគឦសានប្រទេសកម្ពុជា លោក សាយ សំអាល់ បានមានប្រសាសន៍ថា៖ «ជាមួយនឹងកិច្ចប្រឹងប្រែងក្នុងការគ្រប់គ្រង និងអភិរក្សតំបន់ការពារធម្មជាតិ ប្រទេសកម្ពុជាបានលក់ឥណទានកាបោនពីដែនជម្រកសត្វព្រៃកែវសីមា ដែនជម្រកសត្វព្រៃភាគខាងត្បូងភ្នំក្រវាញ និងដែនជម្រកសត្វព្រៃតាតៃ ទៅតាមទីផ្សារកាបោនស្ម័គ្រចិត្ត»។
លោកបានបន្ថែមថា៖ «កម្ពុជាទទួលបានកញ្ចប់ទឹកប្រាក់សរុប ១១លានដុល្លារ ដើម្បីគាំទ្រដល់គំនិតផ្តួចផ្តើមការពារបរិស្ថាន និងបង្កើនជីវភាពរស់នៅរបស់សហគមន៍ក្នុងមូលដ្ឋាន»។
គម្រោងរ៉េដបូកភាគច្រើនរបស់កម្ពុជាមកទល់ពេលនេះ ត្រូវបានគ្រប់គ្រងដោយអង្គការក្រៅរដ្ឋាភិបាល ដែលបានសុំជំនួយពីម្ចាស់ជំនួយមួយចំនួន។ ជាក់ស្តែង ក្នុងរបាយការណ៍លក់កាបោនខ្ពស់បំផុតមិនធ្លាប់មានកាលពីឆ្នាំ២០១៦ ក្រុមហ៊ុន Walt Disney Corporation បានទិញសន្និធិកាបោនតម្លៃ ២.៦លានដុល្លារពីដែនជម្រកកែវសីមា ដែលធ្លាប់គ្រប់គ្រងដោយអង្គការ WCS។ ប៉ុន្តែ គម្រោងលើតំបន់បឹងទន្លេសាប នឹងក្លាយជាគម្រោងដំបូងដែលនឹងត្រូវសម្របសម្រួលដោយរដ្ឋាភិបាល។
លោក វិបុល ជាប្រធានផ្នែកអភិរក្សជលផល បានមានប្រសាសន៍ថា៖ «ប្រសិនបើយើងរក្សាតំបន់នេះឱ្យបានល្អ យើងនឹងទទួលបានផលប្រយោជន៍នៅពេលម្ចាស់ជំនួយបានឃើញ និងដឹងថា ព្រៃលិចទឹកត្រូវបានការពារ»។
ព្រៃឈើថយចុះដោយសារភ្លើងឆេះព្រៃ
របាយការណ៍កាលពីឆ្នាំ២០១៨ របស់ទីភ្នាក់ងារអភិវឌ្ឍន៍អាមេរិក USAID និងទីភ្នាក់ងារព្រៃឈើអាមេរិក លើកឡើងថា ព្រៃលិចទឹកមានលទ្ធភាពស្រូបយកកាបោនបានច្រើនជាងព្រៃឈើនៅលើតំបន់ដីគោក ប៉ុន្តែ ការថែទាំ និងការពាររបស់សហគមន៍ គឺជារឿងសំខាន់។ ការសិក្សាទៅលើភូមិកំពង់ភ្លុក ខេត្តសៀមរាប ជាទីដែលពលរដ្ឋបានទទួលស្គាល់ពីសារៈសំខាន់របស់ដើមឈើ និងបានការពារដើមឈើទាំងនោះ បានបង្ហាញសន្និធិកាបោនខ្ពស់ជាងព្រៃស្រោង និងព្រៃល្បោះ។
ការបញ្ចេញឧស្ម័នផ្ទះកញ្ចក់សរុបរបស់កម្ពុជា មានជិត ៥២លានម៉ែត្រទ្រិកតោន កាលពីឆ្នាំ២០១៣ គឺស្មើនឹង ០.១១ភាគរយនៃការបញ្ចេញឧស្ម័នផ្ទះកញ្ចក់ទូទាំងសកលលោក ប៉ុន្តែ ប្រទេសនេះ មិនបានធ្វើបច្ចុប្បន្នភាពលើរបាយការណ៍ស្តីពីការបញ្ចេញឧស្ម័នផ្ទះកញ្ចក់ចាប់តាំងពីពេលនោះមក។ ជាមួយនឹងអត្រានៃការនាំចូលរថយន្ត ការបើករោងចក្រថ្មី និងជើងហោះហើរសម្រាប់ភ្ញៀវទេសចរ និងអ្នកជំនួញ ការបញ្ចេញឧស្ម័ននៅកម្ពុជា ទំនងជាមានការកើនឡើង។
លោក រីឆាដ ម៉ាកខេនហ្ស៊ី (Richard MacKenzie) ជាអ្នកស្រាវជ្រាវនៅទីភ្នាក់ងារ USFS ដែលដឹកនាំការសិក្សាអំពីលទ្ធភាពស្រូបយកកាបោនរបស់ព្រៃលិចទឹកនៅតំបន់បឹងទន្លេសាប និយាយថា លោកពេញចិត្តនឹងគំនិតនៃគម្រោងស្រូបយកកាបោននៅតំបន់ព្រៃលិចទឹក ប៉ុន្តែ ផ្នែកជាច្រើននៃព្រៃលិចទឹក មានសភាពស្តើងពេកមិនអាចស្រូបយកកាបោនបានទេ។
តាមការសង្កេតរបស់លោកកាលពីឆ្នាំ២០១៦ ស្របពេលសិប្បិជាតិស្ងួតជាប់សម្បកឈើ អ្នកវិទ្យាសាស្ត្រខាងអគ្គិភ័យ បានចង្អុលបង្ហាញតំបន់ ជាទីដែលកូនឈើមិនអាចចាប់ឫសដោយសារតែភ្លើងឆេះព្រៃធ្ងន់ធ្ងរ។
លោក ម៉ាកខេនហ្ស៊ី បាននិយាយថា៖ «អ្នកអាចមើលឃើញថា អគ្គិភ័យបានធ្វើឱ្យព្រៃដ៏ក្រាស់នៅតំបន់នេះថយចុះ។ វាបង្កផលប៉ះពាល់ធំធេង បើនិយាយដល់ការស្រូបទាញកាបោន ហើយប្រាកដណាស់ ផ្សែងនេះមានចំណែកក្នុងការបញ្ចេញសារធាតុកាបោនផងដែរ»។
លោក ម៉ាកខេនហ្ស៊ី បានបញ្ជាក់ពីភាពចាំបាច់ក្នុងការស្តារព្រៃទាំងនេះឡើងវិញ និងការដាក់ពង្រាយឆ្មាំការពារសម្រាប់គម្រោងរ៉េដបូកនាពេលអនាគតក្នុងតំបន់នេះ ដើម្បីឱ្យទទួលបានជោគជ័យ។
បញ្ហាប្រឈមមួយទៀត គឺទាក់ទិននឹងបច្ចេកទេសច្រើនជាង។ លោកស្រី សារ៉ា មីលណេ (Sarah Milne) ជាសាស្ត្រាចារ្យជាន់ខ្ពស់នៅសាកលវិទ្យាល័យជាតិអូស្ត្រាលី (Australian National University) និយាយថា ផ្អែកលើការស្រាវជ្រាវរបស់លោកស្រីក្នុងប្រទេសកម្ពុជា និងនៅបរទេស កម្មវិធីរ៉េដបូក គឺជាជម្រើសដែលមិនប្រាកដថា ជោគជ័យសម្រាប់ប្រទេសកម្ពុជា ពីព្រោះការវាស់ស្ទង់កម្រិតសារធាតុកាបោន និងការផ្ទៀងផ្ទាត់ ត្រូវការអ្នកជំនាញអន្តរជាតិដែលប្រទេសកំពុងអភិវឌ្ឍន៍មិនអាចមានលទ្ធភាពជួលបានក្នុងតម្លៃថ្លៃនោះ។
លោកស្រីបាននិយាយថា៖ «គុណវិបត្តិនៃផ្សារកាបោន គឺទាមទារជំនាញបច្ចេកទេស សមត្ថភាពធ្វើការគណនា និងការប្រឹងប្រែងជាគំរូដែលលើសពីអ្វីដែលមន្ត្រីកម្ពុជា និងអង្គការក្រៅរដ្ឋាភិបាលអាចធ្វើបាន»។
គ្មានអំណាច ដើម្បីការពារ
ដោយឡែក នៅភាគពាយ័ព្យនៃតំបន់បឹងទន្លេសាបក្នុងខេត្តសៀមរាប លោក គឹម សាវឿន កំពុងតាមសម្លឹងមើលស្ត្រីបួននាក់ ខណៈពួកគេច្រកដីដាក់ក្នុងកូនថង់ផ្លាស្ទិក និងដាក់កូនឈើនៅកណ្តាលថង់។
លោក សាវឿន ជាមន្ត្រីជលផលក្នុងមូលដ្ឋានបានត្អូញត្អែរថា វាពិតជាលំបាកក្នុងថែរក្សាកូនឈើទាំង ៤០.០០០ដើម ឱ្យនៅរស់នៅក្នុងរដូវប្រាំង ហើយមួយចំនួនក្នុងចំណោមកូនឈើដែលមានអាយុពីរសប្តាហ៍ហើយនោះ ចាប់ផ្តើមក្រៀមស្វិតរួចហើយគិតត្រឹមខែធ្នូកន្លងមក។
ដើមឈើដែលទទួលម្លប់ពីតង់ពណ៌បៃតង និងពណ៌ខ្មៅ ជាធម្មតាគេប្រើសម្រាប់គ្របអគារកំពុងសាងសង់នោះ នឹងត្រូវបានគេបញ្ជូនទៅតំបន់អភិរក្សដែលត្រូវស្តារឡើងវិញ ហើយដែលត្រូវភ្លើងឆេះកាលពីឆ្នាំ២០១៦។
លោក សាវឿន បានបញ្ជាក់ថា ការងាររបស់គាត់ចប់ បន្ទាប់ពីដើមនាងត្រូវបានដាំរួចរាល់។ លោកបានប្រាប់អ្នកយកព័ត៌មានបណ្តើរសើចបណ្តើរយ៉ាងដូច្នេះថា៖ «ការងារខ្ញុំ គឺដាំកូនឈើទាំងនេះតែប៉ុណ្ណឹង។ ការងាររបស់សហគមន៍ គឺត្រូវមើលថែពួកវា»។
តាមគោលការណ៍ គម្រោងរ៉េដបូកមានគោលបំណងថែរក្សាដីព្រៃឱ្យនៅក្នុងដៃរបស់ប្រជាជនដែលរស់នៅទីនោះ ដោយពឹងលើដីព្រៃទាំងនោះ។ ប៉ុន្តែ គម្រោងរ៉េដបូកនៅកម្ពុជា ត្រូវបានគេរារាំងមិនឱ្យទទួលបានជោគជ័យ និងលែងឱ្យមានសកម្មភាព ក្រោមមូលហេតុថា ខ្វះអ្នកល្បាត និងធនធាននៅក្នុងមូលដ្ឋាន។
ទោះបីជាលោកស្រី មីលណេ មិនបានស្រាវជ្រាវក្នុងគម្រោងសាកល្បង នៃផែនការរ៉េដបូក នៅប្រទេសកម្ពុជាក៏ដោយ ក៏លោកស្រីបានលើកឡើងថា មូលនិធិពីអន្តរជាតិនៅក្នុងប្រទេសកម្ពុជា បានអនុវត្តតាមរបៀបរបបច្បាស់លាស់ ប៉ុន្តែ នៅទីនេះ «រដ្ឋជាអ្នកមានសិទ្ធិ» លើគម្រោងអភិរក្សផ្សេងៗ និងមូលនិធិពាក់ព័ន្ធ ចំណែកឯប្រជាជនដែលរស់នៅក្នុងព្រៃ ប្រឈមមុខនឹងផលប៉ះពាល់ដោយសារបញ្ហាប្រែប្រួលអាកាសធាតុ កាប់ព្រៃឈើ និងសកម្មភាពគម្រោងបង្កើតទំនប់វារីអគ្គិសនី ព្រោះតែពួកគាត់មានអំណាចតិចតួចក្នុងការផ្លាស់ប្តូររបៀបរបបរស់នៅរបស់ពួកគាត់។
លោកស្រីលើកឡើងដូច្នេះថា៖ «បើសិនជាពួកគេផ្តោតលើសហគមន៍មូលដ្ឋានក្នុងការស្តារព្រៃឈើ ខ្ញុំគិតថា វាជាគោលដៅត្រឹមត្រូវជាខ្លាំង»។
លោក ចំរុង អ្នកនេសាទនៅភូមិទ្រាយ បាននិយាយថា លោក និងអ្នកភូមិដទៃទៀត មានកម្លាំងចិត្តក្នុងការការពារព្រៃឈើរបស់ពួកគាត់ ទោះជាត្រូវធ្វើអ្វីក៏ដោយ ដើម្បីបង្កើនបរិមាណត្រីក្នុងទឹកសម្រាប់ការនេសាទ។ ប៉ុន្តែ លោកបានបញ្ជាក់ថា ទោះបីជាអ្នកភូមិពិតជាចាប់អ្នកកាប់រានព្រៃបានហើយក៏ដោយ ក៏លោកគ្មានអំណាចអីទៅអន្តរាគមន៍ដែរ។
លោកបាននិយាយថា៖ «យើងធ្វើអ្វីមិនកើតទេ ព្រោះយើងជាអ្នកភូមិធម្មតា។ ពួកគេបំពានច្បាប់ ហើយអាចត្រូវបានបញ្ជូនទៅពន្ធនាគារ ប៉ុន្តែ យើងបានត្រឹមតែព្រមានពួកគេប៉ុណ្ណោះ»។
រាយការណ៍បន្ថែមដោយលោក រី រួន
អត្ថបទនេះ ត្រូវបានផលិតឡើងដោយ New Naratif និង VOD ដែលបានសហការគ្នាបោះពុម្ពផ្សាយប្រភេទអត្ថបទពណ៌នាវែងស្តីពីកម្ពុជា ដែលជួយពង្រឹងអំណាចសហគមន៍រួមរបស់យើងតាមរយៈដំណឹង និងព័ត៌មាន។