ក្រសួងការបរទេស និងកិច្ចសហប្រតិបត្តិការបរទេសកម្ពុជា សម្តែងការខកចិត្តចំពោះមតិឯកអគ្គរដ្ឋទូតអាមេរិក លោក Patrick Murphy ដែលបានបញ្ចេញ ជុំវិញសំណុំរឿងក្តីលោក កឹម សុខា ដោយថា ធ្វើឱ្យប៉ះពាល់ធ្ងន់ធ្ងរដល់ប្រព័ន្ធតុលាការកម្ពុជា។
ក្រសួងការបរទេសកម្ពុជា លើកឡើងក្នុងសេចក្តីថ្លែងការណ៍ថ្ងៃនេះថា ការបញ្ចេញយោបល់របស់លោក Murphy អំឡុងពេលនោះ ធ្វើឱ្យប៉ះពាល់ដល់ប្រព័ន្ធតុលាការកម្ពុជា និងផ្ទុយពីស្មារតីថ្មីរបស់ថ្នាក់ដឹកនាំប្រទេសទាំង២ ក្នុងស្មារតីជំរុញទំនាក់ទំនង និងកិច្ចសហប្រតិបត្តិការល្អជាមួយគ្នា។
ក្នុងសេចក្តីប្រកាសនោះលើកឡើងថា៖ «ការថ្លែងយោបល់បែបនេះ គឺជាការធ្វើឱ្យប៉ះពាល់ធ្ងន់ធ្ងរដល់ប្រព័ន្ធតុលាការកម្ពុជា ដែលជាស្ថាប័នឯករាជ្យ និងដាច់ដោយឡែក ដូចដែលមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា និងជាការបង្ហាញឱ្យឃើញពីឥរិយាបថគ្មានការទូត និងខ្វះការគោរពចំពោះអធិបតេយ្យរបស់កម្ពុជាដែលជាប្រទេសម្ចាស់ផ្ទះ»។
លោក Patrick Murphy បានថ្លែងប្រាប់ក្រុមអ្នកសារព័ត៌មាន បន្ទាប់ពីចូលរួមសវនាការអតីតមេបក្សប្រឆាំង នៅសាលាដំបូងរាជធានីភ្នំពេញ នៅថ្ងៃទី១២ ខែមីនា ថា លោកមិនពេញចិត្តចំពោះរដ្ឋាភិបាលកម្ពុជា ដែលចោទថា អាមេរិកនៅពីក្រោយលោក កឹម សុខា ចង់ផ្តួលរំលំរដ្ឋាភិបាល។
លោក Patrick Murphy៖ «យើងក៏មានការអាក់អន់ចិត្ត ព្រោះនៅក្នុងសវនាការ ព្រះរាជអាជ្ញាព្យាយាមនិយាយថា អាមេរិកពាក់ព័ន្ធករណីនេះ»។
សាលាដំបូងរាជធានីភ្នំពេញ កំពុងដំណើរសវនាការសំណុំរឿងសន្និដ្ឋិភាពរបស់លោក កឹម សុខា ដែលគ្រោងនឹងធ្វើរយៈពេល៣ខែ៕
