ក្រសួងសុខាភិបាល រកឃើញបុរសជនបរទេស២រូបផ្សេងទៀតនៅរាជធានីភ្នំពេញមានវីរុសកូវីដ-១៩។
តាមសេចក្តីប្រកាសព័ត៌មានរបស់ក្រសួងសុខាភិបាលដែលចេញនៅថ្ងៃនេះ អ្នកទាំងពីរនាក់នោះម្នាក់ជាជនជាតិកាណាដាមានអាយុ៤៩ឆ្នាំ និងម្នាក់ទៀតជាជនជាតិប៊ែលហ្ស៊ិកអាយុ៣៣ឆ្នាំ។ បច្ចុប្បន្នបុរសទាំងពីរត្រូវបានដាក់នៅមន្ទីរពេទ្យមិត្តភាពខ្មែរ-សូវៀត។ ក្រសួងបញ្ជាក់ថាខ្លួនកំពុងតាមរកអ្នកដែលពាក់ព័ន្ធនឹងបុរសបរទេសទាំងពីររូបនេះ។
ដោយឡែកលទ្ធផលតេស្តលើបុរសជនជាតិអង់គ្លេស និងមិត្តភក្រពីរនាក់ រួមជាមួយជនជាតិចិនដែលសង្ស័យថាមានកូវីដ-១៩នោះ គឺអវិជ្ជមាន។ ទោះយ៉ាងណាក៏ដោយពួកគេត្រូវបានណែនាំឱ្យតាមដានសុខភាពផ្ទាល់ខ្លួន។
គិតត្រឹមថ្ងៃនេះ កម្ពុជារកឃើញអ្នកផ្ទុកកូវីដ-១៩ចំនួន៧នាក់ហើយដែលក្នុងនោះមានជនជាតិខ្មែមួយរូប និងបរទេស៦នាក់៕
