អាជីវករមួយចំនួន លើកឡើងថា មូលហេតុដែលពួកគាត់លក់បន្លែ សាច់ និងគ្រឿងទេសផ្សេងៗទៀត ឡើងថ្លៃខុសពីពេលធម្មតា ដោយសារប្រភពនាំចូលដែលពួកគាត់ទិញយកមកលក់បានដំឡើងថ្លៃ។
អាជីវករលក់ដូរនៅផ្សារដើមគរ អ្នកស្រី ជា ចន្ថា និយាយថា បន្លែ សាច់ជ្រូក សាច់មាន់ និងសាច់គោ ប្រភពនាំចូលបានឡើងថ្លៃចន្លោះពី ១ពាន់រៀល ទៅ៣ពាន់៥រយរៀល ក្នុងមួយគីឡូក្រាម បន្ទាប់ពីប្រជាពលរដ្ឋមួយចំនួនផ្អើលថា កម្ពុជាមានអ្នកកើតជំងឺកូវីដ-១៩ ។
អាជីវកររូបនោះអះអាងថា៖ «សាច់ជ្រូកប៉ាយ [មួយចំហៀង] មួយគីឡូ គឺមួយម៉ឺន ប្រាំមួយពាន់ប្រាំរយរៀល នៅពេលយើងលក់វិញ! ពីរម៉ឺនរៀល [១គីឡូក្រាម] សាច់គោ [មួយគីឡូ] បីម៉ឺនប្រាំបីពាន់រៀល…លក់ចេញវិញបួនម៉ឺនរៀល [ក្នុងមួយគីឡូក្រាម]»។
អាជីវករ ពេទ្យ សុផាតវណ្ណនីត ដែលជាអ្នកលក់សាច់ជ្រូក សាច់មាន់ បោះដុំ នៅម្តុំផ្សារដើមគរ និយាយថា មុនលេចឮព័ត៌មានថា នៅខេត្តសៀមរាប មានបុរសខ្មែរឆ្លងជំងឺកូវីដ-១៩ ពួកគាត់លក់ដាច់ក្នុងមួយថ្ងៃ គឺ១០០គីឡូ តែឥឡូវថយចុះជិត៥០ភាគរយ។ បច្ចុប្បន្ន គាត់ថា លក់ថ្លៃជាងពេលមុនប្រហែលជាជាង២ពាន់រៀលក្នុងមួយគីឡូ ដោយសារប្រភពនាំចូលភាគច្រើន លក់ក្នុងតម្លៃខ្ពស់ដែរ។
អាជីវកររូបនោះនិយាយថា៖ «ក្រោយពេលគេផ្អើលរឿងកើតជំងឺកូវីដ-១៩ ស្អីគេនោះ អ្នកមានលុយភាគច្រើន នាំគ្នាមកទិញត្រី សាច់ ស្រក ប៊ីចេង ទុកគ្រប់គ្នា។ កន្លែងខ្ញុំលក់សាច់ជ្រូក ១គីឡូសាច់សុទ្ធ ២ម៉ឺនរៀល ឆ្អឹង ១គីឡូ ១៨០០០រៀល និងមាន់ចិញ្ចឹម ១គីឡូ ១៥០០០រៀល វាថ្លៃជាងមុនប្រហែលជាង ២ពាន់រៀលក្នុង ១គីឡូទេ ពីព្រោះខ្ញុំទិញពីគេមកថ្លៃដែរ អញ្ចឹងខ្ញុំលក់ចេញវិញថ្លៃអញ្ចឹងដែរ»។
ចំណែកអ្នកទិញនៅម្តុំផ្សារដើមគរ ឈ្មោះ សុខ វណ្ណា និយាយថា តម្លៃបន្លែ សាច់ នៅផ្សារដើមគរ ឡើងថ្លៃខុសពីពេលមុន។ ប៉ុន្តែ អ្នកស្រីអះអាងថា គាត់មិនបានទិញបន្លែ និងសាច់ទុក ដូចប្រជាពលរដ្ឋមួយចំនួននៅជាប់ផ្ទះរបស់គាត់ នាំគ្នាទិញបន្លែ សាច់ និងគ្រឿងទេសទុក ដោយព្រួយបារម្ភថា កម្ពុជាអ្នកឆ្លងជំងឺកូវីដ-១៩ នៅខេត្តសៀមរាប។
អ្នកស្រី វណ្ណា ក៏អំពាវនាវទៅប្រជាពលរដ្ឋកុំព្រួយបារម្ភ ខ្លាចឆ្លងមេរោគកូវីដ-១៩ ដើម្បីកុំឱ្យមានចលាចលក្នុងសង្គមកម្ពុជា។
អ្នកស្រីនិយាយថា៖ «ឱ្យប្រជាពលរដ្ឋទាំងអស់គ្នាតាំងចិត្តកុំឱ្យខ្លាច យើងខ្លាចនាំឱ្យមានបាតុភាពពេញស្រុកយើងទេ… សម្តេចប្រកាសហើយ មិនអាចឱ្យមាន [ជំងឺកូវីដ-១៩] មកដល់ភ្នំពេញយើងទេ កុំឱ្យយើងភ័យបារម្ភ»។
ដើរចេញពីផ្សារម៉ាក្រូ ស្ថិតនៅខណ្ឌសែនសុខ ភាគពាយព្យរាជធានីភ្នំពេញ កញ្ញា ស្រី លាង និយាយថា គាត់តែងតែមកទិញសាច់ជ្រូកនៅក្នុងផ្សារនេះស្ទើរជារៀងរាល់ថ្ងៃ។ ប៉ុន្តែ អ្វីដែលគួរឱ្យគត់សម្គាល់ កញ្ញា អះអាងថា ពីរទៅបីថ្ងៃចុងក្រោយនេះ សាច់ជ្រូកឡើងថ្លៃខុសពីតម្លៃធម្មតាប្រហែលជា ៣ពាន់រៀលក្នុងមួយគីឡូក្រាម។
ករណីនេះ កញ្ញា អំពាវនាវទៅផ្សារទំនើប និងអាជីវករលក់នៅតាមផ្សារធម្មតា កុំដំឡើងតម្លៃគ្រឿងទេស បន្លែ និងសាច់ ដើម្បីកុំឱ្យប៉ះពាល់ដល់ប្រជាពលរដ្ឋដែលមានជីវភាពមិនសូវធូធារ។
កញ្ញានិយាយថា៖ «សំណូមពរដល់ប្រជាពលរដ្ឋទាំងអស់គ្នា គឺអីវ៉ាន់កុំឡើងថ្លៃច្រើនពេក វាពិបាកដែរសំរាប់អ្នកដែលមានជីវភាពល្មមៗដែរ គាត់ពិបាក»។
ក្នុងសេចក្តីអំពាវនាវ កាលពីថ្ងៃទី៩ ខែមីនា ក្រសួងពាណិជ្ជកម្មបានកត់សម្គាល់ថា ប្រជាពលរដ្ឋបាននាំគ្នាសម្រុកទិញទំនិញច្រើនខុសប្រក្រតី ដែលហាងទំនិញភាគច្រើនបានរក្សាតម្លៃដូចធម្មតា តែសម្រាប់ហាងមួយចំនួនតូចបានឆ្លៀតឱកាសលក់ដំឡើងថ្លៃម៉ាស់ការពារមុខ អាល់កុលលាងដៃ និងទំនិញចាំបាច់មួយចំនួនទៀត។ ក្រសួងថា ការដំឡើងថ្លៃហួសហេតុបែបនេះ អាចបង្កឱ្យមានចលាចលក្នុងសង្គមធ្ងន់ធ្ងរ។ ករណីនេះ ក្រសួងពាណិជ្ជកម្មបានព្រមានចាត់វិធានការតាមផ្លូវច្បាប់លើជនទាំងនោះផងដែរ។
សាលារាជធានីភ្នំពេញអំពាវនាវទៅប្រជាពលរដ្ឋកុំជ្រួលច្របល់នាំគ្នាទៅទិញទំនិញតាមពាក្យចចាមអារ៉ាមថា ខ្វះស្បៀងអាហារដោយសារតែមេរោគកូវីដ-១៩ ដោយសារកម្ពុជាមិនខ្វះស្បៀងនោះទេ៕
