លោកនាយករដ្ឋមន្ត្រី ហ៊ុន សែន បបួលអ្នកដែលរិះគន់វិធានការទប់ស្កាត់ការឆ្លងរាលដាលមេរោគកូវីដ១៩ និងថា លោកបានលាក់បាំងព័ត៌មានពីករណីជំងឺឆ្លងនេះមក«ស្បថឱ្យរន្ទះបាញ់»ដើម្បីបញ្ជាក់ការពិត។
ថ្លែងនៅក្នុងពិធីបុណ្យទន្លេនៅល្ងាចនេះ លោក ហ៊ុន សែន ថ្លែងថា លោកមិនបានលាក់បាំងព័ត៌មានករណីឆ្លងរាលដាលមេរោគកូវីដ១៩ទេ ហើយលោកថា ទោះជាចង់លាក់បាំង ក៏មិនអាចលាក់បាំងជិតដែរ។
លោក ហ៊ុន សែន៖ «បើអ្នកទាំងឡាយនៅតែមិនច្បាស់។ អ្នកឯងហ៊ានស្បថថា កម្ពុជា មាន ហ៊ុន សែន រដ្ឋការ ហ៊ុន សែន ពិតជាបានលាក់លៀម។ តើអ្នកឯងហ៊ានស្បថឱ្យរន្ទះបាញ់ទេ?»
ក្នុងឱកាសនោះ លោកនាយករដ្ឋមន្ត្រីក៏បានហៅអ្នកដែលចំអកថា រដ្ឋាភិបាលបិទអ្នកដំណើរនៅប្រទេសចំនួន៥ មិនឱ្យចូលកម្ពុជាមួយរយៈនោះ តែមិនបិទចិន ថាជាក្រុមអគតិដែលមិនសមជាពលរដ្ឋខ្មែរ។ លោក ពន្យល់មូលហេតុដែលមិនបិទអ្នកដំណើរពីប្រទេសចិនថា ពេលនេះស្ថានភាពមេរោគកូវីដ១៩ នៅបានធូរស្រាលវិញហើយ តែពេលនេះ នៅអាមេរិក និងប្រទេសមួយចំនួនទៀត កំពុងស្ថិតនៅក្នុងស្ថានភាពប្រកាសអាសន្ន។
