ក្រសួងសុខាភិបាល បានប្រកាសឱ្យដឹងថា បុរសជនជាតិបារាំង វ័យ៣៥ឆ្នាំ ត្រូវបានធ្វើតេស្តកូវីដ-១៩ ដោយលទ្ធផលចេញមកគឺ វិជ្ជមាន។
យោងតាមសេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃនេះ ជនជាតិបារាំងរូបនេះ បច្ចុប្បន្នកំពុងដាក់នៅមន្ទីរពេទ្យមិត្តភាពខ្មែរ-សូវៀត។ ក្រសួងបញ្ជាក់ថា បុរសនោះមកពីទីក្រុងប៉ារីស ហើយមកដល់សឹង្ហបុរីកាលពីថ្ងៃទី១៣ ខែមីនា មានអាការក្តៅខ្លួន ហើយអាជ្ញាធរប្រទេសសឹង្ហបុរីធ្វើតេស្តសំណាកបុរសនោះនៅយប់ថ្ងៃដដែល។ ប្រភពដដែលឱ្យដឹងថា បុរសនោះបានចាកចេញមកកម្ពុជានៅថ្ងៃទី១៤ ខែមីនា ទាំងដែលគាត់មិនទាន់ទទួលបានលទ្ធផលផង។
ក្រសួងសុខាភិបាលកម្ពុជា ថាខ្លួនបានទទួលលទ្ធផលពីប្រទេសសឹង្ហបុរីកាលពីម្សិលមិញ ហើយម៉ោង២រសៀលថ្ងៃដដែល ក្រសួងរកឃើញបុរសនោះ និងក្រុមគ្រួសាររបស់គាត់ដែលមានភរិយា និងកូនគាត់។ ក្រសួងក៏បានយកសំណាកពួកគេទៅពិនិត្យនៅយប់នោះ។ លទ្ធផលតេស្តបង្ហាញថា បុរសនោះមានផ្ទុកកូវីដ-១៩។ ដោយឡែកភរិយា និងកូនប្រុសអាយុ៤ខែ ត្រូវដាក់បន្តតាមដានសុខភាពរយៈពេល១៤ថ្ងៃនៅក្នុងផ្ទះរបស់គាត់នៅម្តុំទួលទំពូង ក្នុងពេលរង់ចាំលទ្ធផលវិភាគសំណាកពីវិទ្យាសា្ថនប៉ាស្ទ័រ។
ក្រុមការងារក្រសួងក៏កំពុងស្រាវជ្រាវរកអ្នកដែលប៉ះពាល់ជាមួយបុរសនោះ ដោយរកឃើញថា មនុស្សជាង២០នាក់បានប្រាស្រ័យទាក់ទងជាមួយគាត់។
គិតមកត្រឹមរសៀលថ្ងៃនេះ កម្ពុជារកឃើញអ្នកផ្ទុកកូវីដ-១៩ ចំនួន៨នាក់ហើយដែលក្នុងនោះ១ករណីកើតលើជនជាតិខ្មែរ និង៨ទៀតរកឃើញលើជនបរទេស។
កម្ពុជា បានដាក់ចេញនូវវិធានការជាបន្តបន្ទាប់ដើម្បីទប់ស្កាត់ការរីករាលដាលនៃវីរុសនេះ។ រដ្ឋាភិបាល បានសម្រេចផ្អាកមិនឱ្យជនបរទេសដែលមកពីប្រទេស អ៊ីតាលី អាល្លឺម៉ង់ អេស្ប៉ាញ បារាំង អាមេរិក និង អ៊ីរ៉ង់ ចូលប្រទេសកម្ពុជា រយៈពេល៣០ថ្ងៃ ដែលត្រូវអនុវត្តចាប់ពីថ្ងៃទី១៧ ខែមីនា នេះតទៅ។ កាលពីម្សិលមិញ ក្រសួងអប់រំក៏បានសម្រចឱ្យសាលារៀនចំណេះទូទៅទាំងរដ្ឋ និងឯកជន ឈប់សម្រាកវិសមកាលតូចមុនពេលកំណត់ផងដែរ៕
