រដ្ឋាភិបាល បានអំពាវនាវដល់ពលរដ្ឋកុំធ្វើដំណើរទៅបណ្តាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ដើម្បីទប់ស្កាត់ការរីករាលដាលនៃកូវីដ-១៩។
សារាចរណែនាំស្ដីពីវិធានការបង្ការ និងទប់ស្កាត់ការរាតត្បាតនៃជំងឺកូវីដ១៩ របស់រាជរដ្ឋាភិបាលកម្ពុជាដែលចេញនាថ្ងៃទី១៥ ខែមីនា បានលើកឡើងថា បច្ចុប្បន្ន កូវីដ-១៩ កំពុងរាតត្បាតជាសកល ពិសេសនៅបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់។ រាជរដ្ឋាភិបាលកម្ពុជាបានដាក់ចេញនូវវិធានការចំនួន៤ចំណុចដើម្បីទប់ស្កាត់ការរីករាលដាលនៃជំងឺនេះ។
តាមសារាចរណែនាំ រដ្ឋាភិបាលបានប្រាប់ពលរដ្ឋខ្មែរទាំងអស់មិនត្រូវធ្វើដំណើរទៅបណ្ដាប្រទេសនៅអឺរ៉ុប សហរដ្ឋអាមេរិក និងអ៊ីរ៉ង់ ប្រសិនបើពុំមានការចាំបាច់ដែលខានពុំបាន។ រដ្ឋាភិបាលក៏បានស្នើឱ្យមន្ត្រីរាជការ និងពលរដ្ឋកម្ពុជាដែលទើបវិលត្រឡប់មកពីបណ្ដាប្រទេសទាំងនេះ ត្រូវដាក់ខ្លួនឱ្យនៅដាច់ដោយឡែកក្នុងរយៈពេល១៤ ថ្ងៃគិតចាប់ពីថ្ងៃដែលបានត្រឡប់មកដល់កម្ពុជាវិញ។
រដ្ឋភិបាល ក៏បានបញ្ជាទៅគ្រប់ក្រសួង ស្ថាប័នរដ្ឋទាំងអស់ មិនត្រូវអនុញ្ញាតឱ្យមន្ត្រីគ្រប់លំដាប់ថ្នាក់ធ្វើដំណើរទៅចូលរួមកិច្ចប្រជុំគ្រប់ប្រភេទនៅបណ្ដាប្រទេសទាំងនោះឡើយ។ ក្នុងករណីចាំបាច់ខានមិនបានដែលតម្រូវឱ្យមានតំណាងរបស់កម្ពុជាចូលរួមប្រជុំ ក្រសួងស្ថាប័នពាក់ព័ន្ធនីមួយៗត្រូវធ្វើសំណើទៅកាន់ក្រសួងការបរទេស និងសហប្រតិបត្តិការអន្តរជាតិ ដើម្បីចាត់តំណាងស្ថានទូតប្រចាំនៅប្រទេសម្ចាស់ផ្ទះនៃការប្រជុំឱ្យចូលរួមជំនួស។
គិតត្រឹមម៉ោង៩យប់ថ្ងៃទី១៥ ខែមីនា កម្ពុជារកឃើញអ្នកផ្ទុកកូវីដ-១៩ ចំនួន១២ករណី ដែលក្នុងនោះមានជនជាតិខ្មែរ៤នាក់ និងបរទេស៨នាក់៕
