បន្ទាប់ពីការប្រកាសអំពីការរកឃើញករណីឆ្លងមេរោគកូរ៉ូណាថ្មីលើកដំបូងកើតឡើងនៅខេត្តសៀមរាប ក្រុមអ្នកបម្រើការនៅក្នុងឧស្សាហកម្មទេសចរណ៍ បង្ហាញក្ដីបារម្ភរបស់ពួកគេថា ការរីករាលដាលនៃមេរោគឆ្លងនេះ នឹងវាយប្រហារបន្ថែមទៀតទៅលើឧស្សាហកម្មទេសចរណ៍របស់ខេត្តមួយនេះ ដែលបានធ្លាក់ចុះរួចជាស្រេចទៅហើយនោះ។
កាលពីថ្ងៃទី៧ ខែមីនាកន្លងមកនេះ ក្រសួងសុខាភិបាលកម្ពុជា បានប្រកាសថា បុរសជនជាតិកម្ពុជាមួយរូបអាយុ ៣៨ឆ្នាំ ត្រូវបានរកឃើញឆ្លងមេរោគកូរ៉ូណាថ្មី ឬ Covid-19 បន្ទាប់ពីបុរសកម្ពុជារូបនេះ បានមានទំនាក់ទំនងជិតដិតជាមួយបុរសជនជាតិជប៉ុន ដែលត្រូវបានរកឃើញឆ្លងមេរោគនេះនៅឯប្រទេសកំណើតរបស់គេ ក្រោយចាកចេញពីកម្ពុជា។
បុរសកម្ពុជាដែលឆ្លងមេរោគកូរ៉ូណាថ្មីនេះ ស្ថិតនៅក្នុងចំណោមការឆ្លងចំនួន ១១ករណីផ្សេងទៀត ដែលត្រូវបានកម្ពុជាប្រកាសថា បានរកឃើញចាប់តាំងពីមេរោគឆ្លងនេះបានផ្ទុះឡើង និងរីករាលដាលចាប់តាំងពីចុងឆ្នាំ២០១៩មក។
ក្រោយការប្រកាសអំពីរកឃើញករណីឆ្លងមេរោគកូរ៉ូណាថ្មីនៅខេត្តសៀមរាបមក រដ្ឋាភិបាលកម្ពុជា បានសម្រេចបញ្ជាឱ្យបិទសាលារៀនទាំងអស់នៅទីរួមខេត្តនេះជាបណ្ដោះអាសន្ន ហើយក៏សម្រេចលុបចោលគម្រោងរៀបចំព្រឹត្តិការណ៍អង្គរសង្ក្រាន្ត ដែលគ្រោងរៀបចំធ្វើឡើងសម្រាប់ទាក់ទាញភ្ញៀវទេសចរនៅអំឡុងពិធីបុណ្យចូលឆ្នាំថ្មីនាខែមេសាខាងមុខផងដែរ។
ប្រធានសមាគមមគ្គុទេសក៍ទេសចរណ៍ លោក ខៀវ ធី បានប្រាប់ឱ្យដឹងថា គម្រោងដំណើរទេសចរណ៍របស់ភ្ញៀវអន្តរជាតិជាច្រើន ដែលបានកក់រួចហើយកាលពីពីរ ឬបីខែមុននោះ ត្រូវបានលុបចោលបណ្ដើរៗហើយ បន្ទាប់ពីការផ្ទុះឡើង និងការរីករាលដាលមេរោគកូរ៉ូណានៅឯប្រទេសចិន។
លោក ខៀវ ធី បានលើកឡើងបន្តថា ឧស្សាហកម្មទេសចរណ៍នៅខេត្តមួយនេះ នឹងកាន់តែធ្លាក់ចុះបន្ថែមទៀត ក្រោយពីអាជ្ញាធរសុខាភិបាលកម្ពុជា បានរកឃើញករណីឆ្លងលើកដំបូងកើតឡើងនៅក្នុងខេត្តទេសចរណ៍មួយនេះ។
លោក ខៀវ ធី ប្រាប់ថា៖ «ឥឡូវគេចាប់ផ្ដើមលុបបណ្ដើរៗ។ អ៊ីចឹង វាពិបាកក្នុងការរកទទួលទានរបស់យើង ហើយសេដ្ឋកិច្ចសៀមរាបយើង អាស្រ័យលើផ្នែកទេសចរណ៍ អ៊ីចឹងដល់ឃើញតំបន់សៀមរាបយើងមានផ្ទុះ១ករណីអ៊ីចឹងទៅ ដំណឹងវាខ្ចរខ្ចាយពេញពិភពលោក អ៊ីចឹងគេបារម្ភ គេមិនហ៊ានមកលេង»។
កាលពីថ្ងៃទី២ ខែមករាកន្លងទៅ ក្រសួងទេសចរណ៍បានចេញសេចក្ដីថ្លែងការណ៍មួយបង្ហាញថា ភ្ញៀវទេសចរអន្តរជាតិខ្ទង់ ២លាន ២សែននាក់ បានចូលទៅទស្សនាក្នុងតំបន់ទេសចរណ៍របស់ខេត្តសៀមរាបកាលពីឆ្នាំ២០១៩កន្លងមក ប៉ុន្តែ បានធ្លាក់ចុះ ១៤.៨ភាគរយ បើធៀបទៅនឹងតួលេខកាលពីមួយឆ្នាំមុន។
ប្រធានសមាគមភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន បានឱ្យដឹងថា ការផ្ទុះឡើង និងការរីករាលដាលនៃមេរោគកូរ៉ូណាថ្មីនេះ បានវាយប្រហារទៅលើផ្នែកទាំងអស់ដែលពាក់ព័ន្ធនឹងវិស័យទេសចរណ៍របស់កម្ពុជា បន្ទាប់ពីជើងហោះហើរជាច្រើន និងព្រឹត្តិការណ៍ធំៗសម្រាប់ទាក់ទាញភ្ញៀវទេសចរ ត្រូវបានលុបចោលទៅវិញ។
អ្នកស្រី ឆាយ ស៊ីវលីន៖ «អារឿងធ្លាក់ចុះ វាធ្លាក់ចុះហើយ បើគេអត់មានឱ្យយន្ត [យន្តហោះ] មកចុះផង អាណាដើរ? បច្ចុប្បន្ននេះ វានឹងប៉ះពាល់ទាំងអស់គ្នា យើងចង់និយាយថា ទេសចរណ៍យ៉ាងម៉េច បើការហោះហើរពីប្រទេសមួយទៅប្រទេសមួយ ត្រូវកាត់ផ្ដាច់អស់ហើយ មានភ្ញៀវទេសចរណាមកចូលកើត»។
ទោះជាយ៉ាងណា អ្នកស្រីរំពឹងថា ក្រោយពី Covid-19 ស្ងប់ស្ងាត់ទៅវិញ កម្ពុជានឹងទទួលបានភ្ញៀវទេសចរទ្វេរដង បន្ទាប់ពីកម្ពុជាបានអនុញ្ញាតិឱ្យនាវាទេសចរណ៍ Westerdam ចូលមកកម្ពុជាកាលពីពេលកន្លងទៅ។
នាវាទេសចរណ៍ MS Westerdam ដែលផ្ទុកទៅដោយទេសចរអន្តរជាតិចម្រុះជាតិសាសន៍ ១,៤៥៥នាក់ និងបុគ្គលិកបម្រើការលើនាវាសរុប ៨០២នាក់ ត្រូវបានកម្ពុជាអនុញ្ញាតចូលចតនៅកំពង់ផែស្វយ័តខេត្តព្រះសីហនុ កាលពីថ្ងៃព្រហស្បតិ៍ ទី១៣ ខែកុម្ភៈ បន្ទាប់ពីប្រទេស និងដែនដីកោះចំនួន ៥ មិនអនុញ្ញាតឱ្យនាវាមួយនេះចូលចត ជុំវិញក្ដីបារម្ភការរីករាលដាលនៃមេរោគកូរ៉ូណាថ្មី។
រដ្ឋាភិបាលកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន អះអាងថា ការសម្រេចចិត្តបែបនេះ គឺជាការឆ្លើយតបនឹងទង្វើមនុស្សធម៌ ដែលទទួលបានការសាទរពីសំណាក់មេដឹកនាំអាមេរិក និងអង្គការសុខភាពពិភពលោក។
អ្នកនាំពាក្យក្រសួងទេសចរណ៍ លោក ជុក ជំនោរ ប្រាប់ VOD ថា មុនមានករណី Covid-19 នេះកើតឡើង ក្រសួងទេសចរណ៍បានរៀបចំពង្រឹងវិស័យទេសចរណ៍នេះឡើងវិញ ក្នុងនោះមានផែនការមេអភិវឌ្ឍន៍វិស័យទេសចរណ៍ក្នុងខេត្តសៀមរាប ដូចជា រៀបចំព្រឹត្តិការណ៍សំខាន់ៗនៅខេត្តសៀមរាប ព្រមទាំងរៀបចំវគ្គបណ្តុះបណ្ដាលដែលរងផលប៉ះពាល់។
លោកបន្តថា នៅពេលដែលផ្ទុះ Covid-19 លើបុរសវ័យ ៣៨ឆ្នាំនោះមក ក្រសួងទេសចរណ៍ក៏រង់ចាំការសម្រេចពីខាងសុខាភិបាលថា អាចអនុវត្តផែនការដែលបានដាក់រួចមកហើយនៅពេលណា។
លោក ជុក ជំនោរ មានប្រសាសន៍ថា៖ «ជាទូទៅ យើងសង្កេតឃើញថា ភ្ញៀវទេសចរហ្នឹងមានការថមថយខ្លះដែរ នៅពេលដែលកើតឡើងនូវកូរ៉ូណាវីរុសនេះ ក្រោយពេលដែលរកឃើញនៅបុរសជនជាតិខ្មែរនេះ»។
ដើម្បីលើកកម្ពស់វិស័យទេសចរណ៍ក្នុងខេត្តប្រវត្តិសាស្ត្រមួយនេះ លោកនាយករដ្ឋមន្ត្រី ហ៊ុន សែន បានប្រកាសមិនយកពន្ធពីផ្ទះសំណាក់ និងសណ្ឋាគាររយៈពេល ៤ខែ ដើម្បីជួយឱ្យម្ចាស់ផ្ទះសំណាក់ និងសណ្ឋាគារនៅក្នុងខេត្តមួយនេះ អាចបន្តទប់ទល់នឹងការធ្លាក់ចុះនៃឧស្សាហកម្មទេសចរណ៍នៅខេត្តសៀមរាប។
លោក ហ៊ុន សែន មានប្រសាសន៍ថា៖ «អ្វីដែលយើងធ្វើនៅពេលនេះ មិនគ្របដណ្ដប់ទូទៅនោះទេ អ្វីដែលសំខាន់គឺយើងធ្វើនៅខេត្តសៀមរាប ដែលជាខេត្តមួយភ្ញៀវទេសចរបរទេសធ្លាប់មកកាន់ទីនោះ ទីនោះ ហើយឥឡូវភ្ញៀវទេសរមកកាន់ទីនោះ គឺធ្លាក់ដល់កម្រិតមួយយ៉ាងខ្លាំង»។
គិតត្រឹមថ្ងៃទី១៦ ខែមីនានេះ កម្ពុជាបានប្រកាសអំពីការរកឃើញការឆ្លងមេរោគកូរ៉ូណាថ្មីសរុប ១២ករណីហើយ រាប់ចាប់តាំងពីខែមករាមក ក្នុងនោះមេរោគនេះបានឆ្លងទៅលើបុរសកម្ពុជា ២នាក់។
របាយការណ៍អង្គការសុខភាពពិភពលោក បង្ហាញថា មនុស្សដល់ទៅជាង ១៥ម៉ឺន ៣ពាន់នាក់ (១៥៣ ៥១៧) នៅទូទាំងពិភពលោក ត្រូវបានរកឃើញថា បានឆ្លងមេរោគកូរ៉ូណាថ្មី ហើយមេរោគនេះក៏បានសម្លាប់មនុស្សដល់ទៅ ៥ ៧៣៥នាក់ផងដែរ៕