ក្រសួងសុខាភិបាលបានប្រកាសរកឃើញអ្នកផ្ទុកកូវីដ-១៩ ចំនួន១២ករណីថ្មីផ្សេងទៀត។
សេចក្ដីជូនព័ត៌មានរបស់ក្រសួងសុខាភិបាលកម្ពុជា ដែលចេញនៅថ្ងៃនេះ ឱ្យដឹង ១១ករណីថ្មីរកឃើញលើបុរសខ្មែរឥស្លាមចំនួន១១នាក់ដែលទើបត្រលប់មកពីចូលរួមក្នុងពិធីសាសនានៅម៉ាឡេស៊ី និងបុរសខ្មែរម្នាក់ទៀតទើបមកពីប្រទេសថៃ។ បុរសខ្មែរឥស្លាមទាំង១១នាក់គឺស្ថិតនៅក្នុងចំណោមមនុស្ស៧៩នាក់ដែលទៅចូលរួមពិធីសាសនានៅម៉ាឡេស៊ីកាលពីចុងខែកុម្ភៈកន្លងទៅ។
ប្រភពដដែលឱ្យដឹង ២ករណីត្រូវបានរកឃើញនៅភ្នំពេញ ២ករណីនៅបន្ទាយមានជ័យ ២ករណីនៅកំពង់ឆ្នាំង ៤ករណីនៅបាត់ដំបង ១ករណីនៅកំពត និងមួយករណីទៀតនៅខេត្តត្បូងឃ្មុំ។ បច្ចុប្បន្ន អ្នកទាំង១២នាក់ត្រូវដាក់ឱ្យព្យាបាលនៅមន្ទីរពេទ្យមិត្តភាពខ្មែរ-សូវៀត មន្ទីរពេទ្យខេត្តបន្ទាយមានជ័យ មន្ទីរពេទ្យខេត្តកំពង់ឆ្នាំង មន្ទីរពេទ្យខេត្តបាត់ដំបង មន្ទីរពេទ្យខេត្តកែប និងមន្ទីរពេទ្យពញាក្រែក។
ក្រសួងសុខាភិបាល អះអាងថា កំពុងតាមដានអ្នកប៉ះពាល់ជាមួយបុរសទាំង១២នាក់នេះ ក៏ដូចជាបន្តស្វែងរកក្រុមខ្មែរឥស្លាមដែលទៅចូលរួមពិធីសាសនានៅម៉ាឡេស៊ីនោះផងដែរ។
គិតត្រឹមព្រឹកថ្ងៃទី១៧ ខែមីនានេះ កម្ពុជារកឃើញអ្នកផ្ទុកកូវីដ-១៩ សរុបចំនួន២៤ករណី ដែលរួមមានជនជាតិខ្មែរ និងខ្មែរឥស្លាមចំនួន១៦នាក់ និងជនបរទេសចំនួន៨នាក់ ដែលក្នុងនោះ ជនជាតិចិនម្នាក់ត្រូវបានព្យាបាលជាសះស្បើយ៕
