ក្រសួងសុខាភិបាលកម្ពុជា ប្រកាសបិទការជួបជុំតាមបែបសាសនាគ្រប់ប្រភេទនៅទូទាំងប្រទេសជាបណ្តោះ អាសន្ន ដើម្បីបញ្ចៀសការឆ្លងរាលដាលនៃមេរោគកូវីដ-១៩។
តាមរយៈលិខិតរបស់រដ្ឋមន្រ្តីក្រសួងសុខាភិបាលទៅរដ្ឋមន្រ្តីក្រសួងធម្មការ និងសាសនា ដែលចេញនៅថ្ងៃនេះ ការផ្អាកនេះធ្វើឡើងតាមការបញ្ជារបស់លោកនាយករដ្ឋមន្រ្តី ហ៊ុន សែន។ ប្រភពដដែលឱ្យដឹងថា ការផ្អាកការជួបជុំតាមបែបសាសនាផ្សេងៗដូចជា សាសនាព្រះពុទ្ធ សាសនាឥស្លាម និងសាសនាគ្រឹស្ទជាដើម នៅទូទាំង២៥ខេត្ត-រាជធានី ចាប់ពីថ្ងៃទី១៧ ខែមីនា រហូតដល់ស្ថានភាពឆ្លងរាលដាលធូរស្រាល។
សេចក្តីប្រកាសនេះ ធ្វើឡើងបន្ទាប់ពីកម្ពុជារកឃើញករណីឆ្លងថ្មីចំនួន១១ករណី បន្ថែមពីលើ២ករណីរក ឃើញកាលពីចុងសប្តាហ៍មុន លើពលរដ្ឋសាសនិកឥស្លាម៧៩នាក់ ដែលបានទៅចូលរួមពិធីសាសនាមួយ នៅប្រទេសម៉ាឡេស៊ី អំឡុងថ្ងៃទី២៧ ខែកុម្ភៈ ដល់ថ្ងៃទី១ ខែមីនា។
គិតត្រឹមថ្ងៃអង្គារនេះ កម្ពុជារកឃើញករណីឆ្លងមេរោគកូរ៉ូណាថ្មីចំនួន២៤ករណីហើយ៕
