ក្រសួងសុខាភិបាលអំពាវនាវដល់ក្រុមគ្រូពេទ្យស្ម័គ្រចិត្តចូលរួមប្រយុទ្ធនឹងវីរុសកូវីដ-១៩ ដោយថា ពួកគាត់អាចទៅចុះឈ្មោះនៅក្រសួងផ្ទាល់ ឬទំនាក់ទំនងតាមប្រព័ន្ធតេឡេក្រាម។
ក្នុងសេចក្តីជូនព័ត៌មានបស់ក្រសួងសុខាភិបាល ចុះផ្សាយកាលពីម្សិលមិញថា កម្ពុជាបានរៀបចំជាស្រេចនូវឧបករណ៍ សម្ភារបរិក្ខារ ធនធាន និងមធ្យោបាយ ដើម្បីឆ្លើយតបជាយថាហេតុចំពោះការរាតត្បាតនៃជំងឺកូវីដ-១៩ នៅកម្ពុជា។
ប៉ុន្តែ ក្រសួងអំពាវនាវទៅក្រុមគ្រូពេទ្យស្ម័គ្រចិត្តសម្តេចតេជោ និងលោកគ្រូ អ្នកគ្រូពេទ្យ ដែលមានបំណងស្ម័គ្រចិត្តផ្សេងទៀត អាចចូលរួមដើម្បីប្រយុទ្ធប្រឆាំងនឹងជំងឺកូវីដ-១៩នេះ ត្រូវទៅចុះឈ្មោះនៅក្រសួងសុខាភិបាលជាន់ផ្ទាល់ដី ស្ថិតនៅដីឡូតិ៍លេខ៨០ វិថីសម្តេច ប៉ែន នុត (២៨៩) រាជធានីភ្នំពេញ ឬទំនាក់ទំនងតាមប្រព័ន្ធតេឡេក្រាមរបស់លោក ហ៊ុយ ឆេងតារាភ័ក្រ្ត តាមទូរសព្ទលេខ ០៧៦ ៨៨៨ ៩១១៨។
ក្រសួងបញ្ជាក់ថា ក្រោយពីចុះឈ្មោះ គ្រូពេទ្យស្ម័គ្រចិត្ត នឹងទទួលការបណ្តុះបណ្តាលបន្ថែមនៅវិទ្យាស្ថានជាតិសុខភាពសាធារណៈ ដែលមានទីតាំងនៅក្នុងបរិវេណក្រសួងសុខាភិបាល។
អ្នកនាំពាក្យក្រសួងសុខាភិបាល និងជាអគ្គនាយកបច្ចេកទេសក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ក្រសួងមិនទាន់មានតួលេខថា មានគ្រូពេទ្យប៉ុន្មាននាក់ដាក់ពាក្យស្ម័គ្រចិត្តចូលរួមប្រយុទ្ធប្រឆាំងនឹងជំងឺកូវីដ-១៩ នៅឡើយ។ ប៉ុន្តែ លោកស្រី បញ្ជាក់ថា នៅពេលទទួលបានព័ត៌មានអ្វីថ្មីទៀត លោកស្រីនឹងជំរាបជូននៅពេលក្រោយបន្តទៀត។
អ្នកស្រាវជ្រាវពីការអភិវឌ្ឍសង្គម លោក មាស នី មានប្រសាសន៍ថា លោកគាំទ្រការជូនដំណឹងរបស់ក្រសួងដែលអំពាវនាវជ្រើសរើសពេទ្យស្ម័គ្រចិត្តឱ្យបានច្រើន ដើម្បីរួមគ្នាទប់ស្កាត់ជំងឺកូវីដ-១៩ ។
លោក មាស នី បញ្ជាក់ថា ដំណាក់កាលនេះគ្រូពេទ្យរដ្ឋ និងឯកជនត្រូវសហការគ្នា ទើបទប់ស្កាត់ជំងឺឆ្លងកូវីដ-១៩ មានប្រសិទ្ធភាពខ្ពស់។
លោកមានប្រសាសន៍៖ «ដល់ពេលដែលត្រូវប្រើកម្លាំង ចាប់ដៃគ្នា ធ្វើការងារជាមួយគ្នា ទាំងវិស័យឯកជន ទាំងវិស័យរដ្ឋ ធ្វើម៉េចផ្តល់ព័ត៌មានទៅគ្នាទៅវិញទៅមក ហើយជាពិសេស ត្រូវយកចិត្តទុកដាក់នៅតំបន់ណាដែលជាប្រភពដើមមួយ គឺត្រូវតែផ្តល់ឱ្យពិតនូវទីកន្លែងណាមួយឱ្យល្អិត យ៉ាងហោចណាស់ យើងក៏បានស្គាល់នូវលទ្ធផលនៃការជួបជុំគ្នានៅគ្រាមានអាសន្ន នេះមិនមែនជារឿងនយោបាយទេ ហើយវាមិនមែនជារឿងមួយនយោបាយទេ ជារឿងបច្ចេកទេសទាំងស្រុង»។
កន្លងមក ក្រសួងសុខាភិបាលបានរៀបចំកន្លែងថែទាំ និងព្យាបាលអ្នកជំងឺកូវីដ-១៩ នៅមន្ទីរពេទ្យមិត្តភាពខ្មែរ-សូវៀត មន្ទីរពេទ្យកុមារជាតិ មន្ទីរពទ្យគន្ធបុប្ផាភ្នំពេញ មន្ទីរពេទ្យជ័យវរ្ម័នទី៧សៀមរាប និងនៅមន្ទីរពេទ្យខេត្តទាំង២៤។
លើសពីនេះទៀត ក្រសួងបានពិភាក្សាជាមួយអាជ្ញាធររាជធានីភ្នំពេញ ពង្រីកបន្ថែមអគារថែទាំព្យាបាល ដែលមានចំណុះ១០០គ្រែបន្ថែមទៀត នៅអតីតមណ្ឌលសុខភាពចាក់អង្ក្រែ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដោយសារតែមានអ្នកស្នើសុំពិនិត្យធ្វើតេស្តច្រើន។ នៅថ្ងៃនេះ ក្រសួងក៏បានប្រកាសផងដែរថា នឹងយកសណ្ឋាគារ Great Duke ធ្វើជាមន្ទីរពេទ្យសម្រាប់ដាក់អ្នកផ្ទុកកូវីដ-១៩នេះដែរ។
គិតត្រឹមព្រឹកថ្ងៃទី១៧ ខែមីនានេះ កម្ពុជារកឃើញអ្នកផ្ទុកកូវីដ-១៩ សរុបចំនួន២៤ករណី ដែលរួមមានជនជាតិខ្មែរ និងខ្មែរឥស្លាមចំនួន១៦នាក់ និងជនបរទេសចំនួន៨នាក់ ដែលក្នុងនោះ ជនជាតិចិនម្នាក់ត្រូវបានព្យាបាលជាសះស្បើយ៕
