ក្រសួងសុខាភិបាលបានប្រកាសពីការរកឃើញមនុស្ស៩នាក់ផ្សេងទៀតមានផ្ទុកកូវីដ-១៩ ដែលនាំឱ្យការរកឃើញអ្នកផ្ទុកវីរុសនេះនៅកម្ពុជាកើនដល់៣៣ករណី។
តាមសេចក្តីជូនព័ត៌មានរបស់ក្រសួងសុខាភិបាលដែលចេញនៅយប់នេះ ៦ករណីត្រូវបានរកឃើញលើបុរសខ្មែរឥស្លាមដែលទៅចូលរួមពិធីសាសនានៅម៉ាឡេស៊ី និង៣ករណីទៀតរកឃើញលើបុរសជនជាតិម៉ាឡេស៊ី។
ក្រសួងសុខាភិបាលឱ្យដឹងថា ១ករណីត្រូវបានរកឃើញនៅខេត្តសៀមរាប ២ករណីនៅសង្កាត់ច្រាំងចំរេះ រាជធានីភ្នំពេញ ១ករណីនៅស្រុកកំពង់ត្រលាច ខេត្តកំពង់ឆ្នាំង ៣ករណីនៅខេត្តកែប និង១ករណីទៀតនៅស្រុកក្រូចឆ្មារ ខេត្តត្បូងឃ្មុំ និង១ករណីទៀតនៅខេត្តកោះកុង។ បច្ចុប្បន្ន អ្នកទាំង៩នាក់ត្រូវដាក់ឱ្យព្យាបាលនៅមន្ទីរពេទ្យមិត្តភាពខ្មែរ-សូវៀត មន្ទីរពេទ្យខេត្តសៀមរាប មន្ទីរពេទ្យខេត្តកំពង់ឆ្នាំង មន្ទីរពេទ្យខេត្តកោះកុង មន្ទីរពេទ្យខេត្តកែប និងមន្ទីរពេទ្យពញាក្រែក។
គិតមកត្រឹមម៉ោង៩យប់ថ្ងៃនេះ ក្រសួងសុខាភិបាលរកឃើញមនុស្ស១៩នាក់ក្នុងចំណោមមនុស្ស៧៩នាក់ដែលធ្វើដំណើរត្រលប់មកពីចូលរួមពិធីសាសនានៅម៉ាឡេស៊ីកាលពីចុងខែកុម្ភៈ។
ក្រសួងសុខាភិបាល បញ្ជាក់ថា ខ្លួនបាននិងកំពុងតាមដានអ្នកប៉ះពាល់ជាមួយបុរសទាំង៩នាក់នោះ ក៏ដូចជាបន្តស្វែងរកក្រុមខ្មែរឥស្លាមដែលទៅចូលរួមពិធីសាសនានៅម៉ាឡេស៊ីនោះផងដែរ។
ជាមួយគ្នានេះដែរ ក្នុងលិខិតដាច់ដោយឡែកមួយដែលចេញនៅថ្ងៃនេះ រដ្ឋមន្រ្តីក្រសួងសុខាភិបាលស្នើទៅអភិបាលនៃគណៈអភិបាលរាជធានី-ខេត្ត ឱ្យផ្អាកការប្រគុំតន្រ្តីនៅតាមទីធ្លាសាធារណៈនៅទូទាំងប្រទេសចាប់ពីថ្ងៃទី១៧ ខែមីនានេះ រហូតដល់ពេលជំងឺកូវីដ-១៩ បានធូរស្រាល៕
