រដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានអំពាវនាវឱ្យពលរដ្ឋទាំងអស់រក្សាភាពនឹងនរក្នុងចិត្តកុំមានការភ័យខ្លាច និងជឿជាក់លើរដ្ឋាភិបាលក្នុងការប្រយុទ្ធប្រឆាំងនឹងវីរុសកូវីដ-១៩ បន្ទាប់ពីក្រសួងបានប្រកាសរកឃើញករណីអ្នកឆ្លងថ្មី១២នាក់ផ្សេងទៀតនៅព្រឹកនេះ។
លោក ម៉ម ប៊ុនហេង បានលើកឡើងបែបនេះក្នុងសេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃនេះ។
លោកបាននិយាយក្នុងសេចក្តីជូនព័ត៌មានដដែលថា៖ «ក្រសួងសុខាភិបាលបន្តអំពាវនាវឱ្យពលរដ្ឋរបស់យើងថែរក្សាអនាម័យដៃ ខ្លួនប្រាណ ចំណីអាហារ និងបរិស្ថានជុំវិញខ្លួនឱ្យបានជាប់ជាប្រចាំ។»
រដ្ឋាភិបាលបានដាក់ចេញនូវវិធានការជាបន្តបន្ទាប់ ដើម្បីទប់ស្កាត់ការរីករាលដាលនៃកូវីដ-១៩ ដែលក្នុងនោះរួមមាន ផ្អាកមិនឱ្យជនបរទេសមកពីប្រទេសមួយចំនួនដូចជា អ៊ីតាលី អាល្លឺម៉ង់ អេស្ប៉ាញ បារាំង អាមេរិក និងអ៊ីរ៉ង់ ចូលប្រទេសកម្ពុជារយៈពេល៣០ថ្ងៃ។ រដ្ឋាភិបាលក៏បានអំពាវនាវដល់ពលរដ្ឋ និងមិនអនុញ្ញាតឱ្យមន្រ្តីទៅបណ្តាប្រទេសនៅអឺរ៉ុប អាមេរិក និងអ៊ីរ៉ង់ទៀតផង។ បន្ថែមលើនេះ រដ្ឋាភិបាលក៏បានបញ្ជាឱ្យសាលាទាំងអស់នៅទូទាំងប្រទេស ឈប់សម្រាកជាបណ្តោះអាសន្នទៀតផង។ គិតមកត្រឹមព្រឹកថ្ងៃទី១៧ ខែមីនានេះ កម្ពុជារកឃើញអ្នកផ្ទុកកូវីដ-១៩ ចំនួន២៤ករណី៕
