ក្រសួងសុខាភិបាលកម្ពុជាកំពុងស្នើសុំអ្នកជំនាញមកពីប្រទេសចិន ដើម្បីជួយដល់កម្ពុជាក្នុងការទប់ស្កាត់ការឆ្លងរាលដាលមេរោគកូវីដ១៩ ដោយបញ្ជាក់ថា ចិនមានសមត្ថភាព និងជំនាញខ្ពស់។
នៅក្នុងសន្និសីទសារព័ត៌មាននៅព្រឹកនេះ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ថ្លែងថា បច្ចុប្បន្ន ការឆ្លងរាលដាលមេរោគកូវីដ១៩នៅក្នុងប្រទេសចិន បានថយចុះច្រើនគួរឱ្យគត់សម្គាល់។ លោកស្រី បញ្ជាក់ថា ការធ្លាក់ចុះនេះ ដោយសារតែមន្ត្រីសុខាភិបាលរបស់ចិនមានសមត្ថភាពខ្ពស់ ហើយកម្ពុជាកំពុងស្នើមន្ត្រីជំនាញចិនមកជួយកម្ពុជា។
លោកស្រី ឱ វណ្ណឌីន៖ «បច្ចុប្បន្ន យើងកំពុងស្នើសុំអ្នកជំនាញការមកពីសាធារណរដ្ឋប្រជាមានិតចិន មកជួយផ្តល់នូវបទពិសោធន៍ដល់យើង»។
មេរោគកូរ៉ូណា ឬ កូវីដ១៩ មានប្រភពឆ្លងរាលដាលចេញពីទីក្រុងវូហាន ប្រទេសចិន ហើយបច្ចុប្បន្នការឆ្លងរាលដាលនៅក្នុងប្រទេសចិនបានថយចុះ ខណៈការឆ្លងរាលដាលនៃមេរោគនេះ កំពុងតែកើនឡើងនៅសហរដ្ឋអាមេរិក និងប្រទេសនៅសហភាពអឺរ៉ុប៕