ក្រសួង​មិន​យក​លុយ​ករណី​ធ្វើ​តេស្ត​កូវីដ​១៩​ទេ​

ក្រសួងសុខាភិបាលបញ្ជាក់នៅព្រឹកនេះថា មិនមានតម្រូវឱ្យយកលុយពីអ្នកដែលត្រូវធ្វើតេស្តស្វែងរកមេរោគកូវីដ១៩ទេ ទោះជារកឃើញថា មានផ្ទុក ឬមិនមានផ្ទុកមេរោគដែលកំពុងតែឆ្លងរាលដាលនេះក៏ដោយ។​

នៅក្នុងសន្និសីទសារព័ត៌មាននៅព្រឹកនេះ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បញ្ជាក់ថា រាល់ការចំណាយលើការធ្វើតេស្តស្វែងរកមេរោគកូវីដ១៩ទាំងអស់ គឺជារដ្ឋជាអ្នកចំណាយ។​ លោកស្រីក៏បានច្រានចោលចំពោះការផ្សព្វផ្សាយដែលថា អ្នកដែលធ្វើតេស្តរកមិនឃើញមេរោគកូវីដ១៩ តម្រូវឱ្យបង់លុយ។​

លោកស្រី ឱ វណ្ណឌីន៖ «យើងអត់មានយកលុយ យកអី១រៀល គឺជាបន្ទុករបស់រដ្ឋាភិបាល»។

តាមរបាយការណ៍របស់ក្រសួងសុខាភិបាលបង្ហាញថា គិតត្រឹមព្រឹកថ្ងៃទី១៨ ខែមីនានេះ ក្រសួងបានធ្វើតេស្តស្វែងរកមេរោគកូវីដ១៩ លើមនុស្ស១១១២នាក់ ក្នុងនោះរកឃើញអ្នកផ្ទុកមានចំនួន​៣៥នាក់៕