ក្រសួងសុខាភិបាលបានអះអាងថា កម្ពុជាបានត្រៀមខ្លួនជាស្រេច ដើម្បីទទួលយកវ៉ាក់សាំងការពារជំងឺកូវីដ-១៩ ពីប្រទេសចិន ដើម្បីជួយទប់ស្កាត់ការរីករាលដាលនៃជំងឺកូវីដ-១៩ ជូនប្រជាពលរដ្ឋ។
ថ្លែងក្នុងសន្និសីទសារព័ត៌មាននាព្រឹកនេះ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានថ្លែងថា ប្រទេសចិនដែលប្រកាសថា ខ្លួនរកឃើញវ៉ាក់សាំងការពារជំងឺកូវីដ-១៩ នៅថ្ងៃនេះ គ្រាន់តែការស្រាវជ្រាវបឋមតែប៉ុណ្ណោះ។ លោកស្រីថា ដើម្បីឱ្យវ៉ាក់សាំងនេះទទួលស្គាល់ជាផ្លូវការ លុះត្រាតែអ្នកជំនាញអង្គការសុខភាពពិភពលោកធ្វើតេស្ត និងប្រកាសទទួលស្គាល់ ហើយអន្តរជាតិអាចយកទៅប្រើប្រាស់បាន។
អ្នកនាំពាក្យរូបនោះបញ្ជាក់ថា បច្ចុប្បន្ននេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង កំពុងយកចិត្តទុកដាក់ទំនាក់ទំនងទៅរដ្ឋាភិបាលចិនដើម្បីស្វែងរកវ៉ាក់សាំង ដើម្បីជួយទប់ស្កាត់ការរីករាលដាលនៃជំងឺកូវីដ-១៩ ជូនប្រជាពលរដ្ឋផងដែរ។
គិតត្រឹមព្រឹកថ្ងៃទី១៨ ខែមីនានេះ កម្ពុជារកឃើញអ្នកផ្ទុកកូវីដ-១៩ សរុបចំនួន៣៥ករណី។ អ្នកទាំងនោះត្រូវបានក្រសួងសុខាភិបាល ដាក់នៅកន្លែងថែទាំ និងព្យាបាល នៅមន្ទីរពេទ្យមិត្តភាពខ្មែរ-សូវៀត មន្ទីរពេទ្យកុមារជាតិ មន្ទីរពទ្យគន្ធបុប្ផាភ្នំពេញ មន្ទីរពេទ្យជ័យវរ្ម័នទី៧សៀមរាប និងនៅមន្ទីរពេទ្យខេត្តទាំង២៤៕
