នៅមុខបន្ទប់ជួលមួយស្ថិតក្នុងសង្កាត់ទំនប់ទឹក ខណ្ឌចំការមន នារី ៣នាក់ និងបុរសម្នាក់ កំពុងជជែកគ្នានៅចន្លោះម៉ោងជាង ៩ព្រឹក ថ្ងៃទី១៨ ខែមីនា។ នារីម្នាក់ដែលសុំប្រាប់ត្រឹមឈ្មោះថា ស្រីណេ បានប្រាប់ថា ជារៀងរាល់ព្រឹក រូបគាត់ និងមិត្តភក្តិ មិនដែលបានក្រោកនៅចន្លោះម៉ោងនេះនោះឡើយ ដោយសារតែនាង និងមិត្តភក្តិធ្វើការនៅក្នុងហាងផឹកស៊ី និងច្រៀងកម្សាន្តមួយកន្លែង (KTV) រហូតដល់ម៉ោង ២ ឬ ៣ព្រឹកឯណោះ។
នៅព្រឹកថ្ងៃទី១៨ ខែមីនានោះ ស្រីណេ និងមិត្តភក្តិ បានក្រោកពីព្រឹកព្រលឹមវិញ ព្រោះតែមិនបានទៅធ្វើការដល់យប់ជ្រៅដូចសព្វដង ក្រោយពីរដ្ឋាភិបាលសម្រេចប្រកាសផ្អាកអាជីវកម្មខារ៉ាអូខេ ឬក្លឹបកម្សាន្ត ដែលជាវិធានការទប់ទល់ការរីករាលដាលនៃវីរុសកូរ៉ូណាថ្មី ឬ Covid-19 នោះ។
អង្គុយលើរានហាលស្ថិតនៅមុខបន្ទប់ជួល និងស្ថិតក្នុងឈុតសម្លៀកបំពាក់សម្រាប់គេងនៅឡើយនោះ ស្រីណេ វ័យ ២៣ឆ្នាំ ដែលប្រាប់ថា ជាអ្នកកំដរភ្ញៀវផឹកស៊ី និងច្រៀងរាំនៅក្នុងខារ៉ាអូខេមួយ នៅផ្លូវ២៧១នោះ។ ស្រីណេ និងមិត្តភក្ដិ កំពុងជជែកគ្នាជាមួយមិត្តភក្តិអំពីការរីករាលដាលនៃមេរោគកូរ៉ូណាថ្មី និងផលប៉ះពាល់មកលើជីវភាពរស់នៅ។
កញ្ញា ស្រីណេ និយាយថា៖ «ធម្មតា ពេលថ្មើនេះ [ម៉ោង១០ព្រឹក] ម្ដុំបន្ទប់អស់នេះ អត់ទាន់មានអ្នកក្រោកទេ ព្រោះធ្វើការយប់ស្ទើរតែទាំងអស់គ្នាហ្នឹង។ ខ្លះសឺវីស ខ្លះចាប់ទឹកកក ខ្លះចាំបន្ទប់ ខ្លះនាំភ្ញៀវ ខ្លះមេការអ៊ីចឹងទៅ។ យប់ម៉ិញ អ្នកខ្លះធ្វើការ តែពួកខ្ញុំបួននាក់នេះ មេគាត់ប្រជុំឱ្យផ្អាកធ្វើការតាំងពីល្ងាចម្សិលម៉ិញ ទើបភ្ញាក់ពីព្រឹកបាន។ និយាយគ្នាមួយព្រឹកនេះ តែរឿងស្អីកូរ៉ូណាហ្នឹង។
ស្រីណេ អះអាងថា គាត់បានចូលបម្រើការងារក្នុងឧស្សាហកម្មកម្សាន្តនេះអស់រយៈពេល ៣ឆ្នាំមកហើយ និងទទួលបានប្រាក់ខែត្រឹមតែ ៩០ដុល្លារក្នុងមួយខែ ប៉ុន្តែ នាងប្រាប់ថា ជីវភាពរបស់នាងពឹងផ្អែកខ្លាំងលើលុយធីបពីភ្ញៀវ ដែលនាងអាចរកបានចន្លោះពី ៥០០ទៅ ៦០០ដុល្លារក្នុងមួយខែៗ។
ស្រីណេ ប្រាប់ថា ពេលនេះ នាងលែងសង្ឃឹមបានចំណូលដូចមុនទៀតហើយ ក្រោយខារ៉ាអូខេបានបិទទ្វារ ហើយថៅកែរបស់ខ្លួនបានបើកប្រាក់ខែ ១ខែចុងក្រោយឱ្យបុគ្គលិក និងប្រាក់បន្ថែមម្នាក់ៗ ៥០ដុល្លារទៀតក្នុងរយៈពេលផ្អាកការងារនេះ។
កញ្ញា ស្រីណេ និយាយថា៖ «លុយបន្តិចប៉ុណ្ណឹងហ្នឹង ចាយអស់អាលូវហើយ ផ្ទះជួលថ្លៃ ទឹកភ្លើង ធ្វើការមួយគែៗដូចលលក។ ឥឡូវបិទអស់ ដាច់បាយបណ្ដោយ។ បើគេបិទមួយខែ ឬ២ខែអីទៅ យើងអាចត្រៀមទប់បាន តែមិនដឹងពេលណា អ៊ីចឹងកុនហើយ»។
បុរសម្នាក់វ័យ ៣១ឆ្នាំ និយាយក្នុងលក្ខខណ្ឌសុំមិនបញ្ចេញឈ្មោះ ដោយបារម្ភប៉ះពាល់ដល់ការងាររបស់គាត់នោះ បានប្រាប់ថា លោកបានបម្រើការងារក្នុងឧស្សាហកម្មនេះអស់រយៈពេលជិត ៩ឆ្នាំមកហើយ ហើយសព្វថ្ងៃនេះ លោកជាមេការនៃអាជីវកម្មខារ៉ាអូខេមួយកន្លែងស្ថិតនៅម្ដុំសង្កាត់ផ្សារដើមថ្កូវ ដែលមានបុគ្គលិកបម្រើការងារទាំងអស់ជាង ១០០នាក់។
បុរសរូបនេះប្រាប់ថា ថៅកែអាជីវកម្មខារ៉ាអូខេដែលលោកគ្រប់គ្រង បានសម្រេចផ្អាកដំណើរការទៅតាមសេចក្ដីណែនាំរបស់រដ្ឋាភិបាលហើយចាប់តាំងពីម្សិលមិញនេះ ហើយបុគ្គលិកនារីបម្រើការនៅទីនោះ នឹងទទួលបានប្រាក់ខែនៅជិតចុងខែនេះ ។
មេការខារ៉ាអូខេរូបនោះ ប្រាប់ថា៖ «បុគ្គលិកទាំងអស់ហ្នឹងទៅស្រុកកំណើតរៀងៗខ្លួន។ ខ្ញុំសួរថៅកែដែរ គាត់ថា នឹងបើកលុយឱ្យនៅថ្ងៃម្ភៃជាងអ៊ីហ្នឹង។ បញ្ហាហ្នឹង យើងទើបតែជួបលើកទី១ អ៊ីចឹងយើងអត់ដឹងដែរ អត់ដែលមានប្រវត្តិបិទខេធីវីរយៈពេលវែងអ៊ីចឹង។ យ៉ាងច្រើន យើងបិទតែពីរបីថ្ងៃភ្ជុំ ឬចូលឆ្នាំអីហ្នឹង»។
តួលេខដែលផ្តល់ដោយអ្នកនាំពាក្យក្រសួងទេសចរណ៍ លោក តុប សុភក្តិ ឱ្យដឹងថា សព្វថ្ងៃនេះ កម្ពុជាមានមណ្ឌលកម្សាន្តមនុស្សពេញវ័យចំនួនជិត ១ ៣០០ (១ ២៩៣)កន្លែងនៅទូទាំងប្រទេស គិតត្រឹមខែមីនាឆ្នាំនេះ ក្នុងនោះមាន ខារ៉ាអូខេ (KTV) ចំនួន ១ ០៨៤កន្លែង ក្លិបឌីស្កូតែក (Club Disco) ចំនួន ១០៩កន្លែង អាជីកម្មរង្គសាល (Night Club) ចំនួន ១៦កន្លែង អាជីវកម្មបៀរហ្កាឌិន ចំនួន ៨៤កន្លែង ដែលផ្ដល់ការងារ ១៨ ៣៨១កន្លែងសម្រាប់ពលរដ្ឋកម្ពុជា។
សហព័ន្ធសហជីពកម្មករចំណីអាហារ និងសេវាកម្មកម្ពុជា (CFSWF) ប្រកាសថា បុគ្គលិកកម្មករដែលធ្វើការងារនៅក្នុងឧស្សាហកម្មកម្សាន្តនេះ មានរហូតដល់ជាង ៨ម៉ឺននាក់នៅទូទាំងប្រទេស ដែលរាប់ចាប់ពីអ្នកសម្អាតរហូតដល់បុគ្គលិកគ្រប់គ្រង។
ប្រធានអង្គការគណនេយ្យភាពសង្គមកម្ពុជា លោក សន ជ័យ មានប្រសាសន៍ថា រាជរដ្ឋាភិបាលចាំបាច់ត្រូវប្រើប្រាស់ថវិកាជាតិ ដើម្បីជួយអន្តរាគមន៍ជាមូលដ្ឋានចំពោះស្ថានភាពជីវភាពកម្មករនិយោជិតទាំងអស់ដែលបាត់បង់ចំណូល ដោយសារឥទ្ធិពលកូវីដ១៩នេះ។
លោក សន ជ័យ ប្រាប់ថា៖ «បារម្ភពីការរាលដាល ការបិទនេះមិនមានអ្វីដែលអាក្រក់នោះទេ តែរដ្ឋត្រូវជួយគិតគូរដល់ម្ចាស់អាជីវកម្មដែលជួលអគារ និងជួយទំនុកបម្រុងបុគ្គលិកដែលធ្វើការនៅទីនោះក្នុងដំណាក់កាលអន្តរកាលនេះ ព្រោះពួកគេអាចប្រឈមបញ្ហាជីវភាពធ្ងន់ធ្ងរ ដូចជាថ្លៃជួលផ្ទះ និងថ្លៃអាហារ ជាដើម។ ពួកគាត់បង់ពន្ធដែរ មានតែយកថវិកាជាតិហើយ»។
អ្នកបម្រើការក្នុងឧស្សាហកម្មកម្សាន្តជាប់ផុងក្នុងបំណុល
មិនត្រឹមតែបាត់បង់ចំណូលនោះទេ ការបិទឧស្សាហកម្មកម្សាន្តនេះ ដោយសារតែក្ដីបារម្ភអំពីការរីករាលដាលនៃវីរុស Covid-19 នេះ ក៏ចាប់បង្ខំបុគ្គលិកមួយចំនួននៅក្នុងវិស័យនេះ ប្រឈមមុខនឹងបញ្ហាបំណុលដែលត្រូវសងត្រឡប់ទៅវិស័យធនាគារ និងហិរញ្ញវត្ថុផងដែរ។
កញ្ញា យូលីន ដែលសុំមិនបញ្ចេញឈ្មោះកន្លែងធ្វើការរបស់ខ្លួននោះ ប្រាប់ថា នាងជាបុគ្គលិកអ្នកនាំភ្ញៀវធ្វើការនៅក្នុងខារ៉ាអូខេ និងក្លឹបកម្សាន្តមួយនៅភ្នំពេញ។ តាមរយៈបទសម្ភាសន៍ដល់វីអូឌីតាមរយៈទូរសព្ទ កញ្ញា យូលីន ប្រាប់ថា កន្លែងធ្វើការរបស់កញ្ញាខ្សត់ភ្ញៀវរយៈពេលជិត ១ខែមកហើយ។ កញ្ញាបន្តថា បញ្ហាកាន់ធំ គឺនៅពេលដែលព្យួរការងារហើយ គ្មានចំណូលចិញ្ចឹមជីវិត និងជាពិសេសត្រូវដោះបំណុលធនាគារទៀតផង។
កញ្ញា យូលីន និយាយថា៖ «មានបង! មានបង់ឱ្យគេ ព្រោះតែជំពាក់គេ ទើបប្រឹងធ្វើការងារ។ ឥឡូវមានផលវិបាកបែបហ្នឹង អាលូវមិនដឹងធ្វើយ៉ាងម៉េចទេ មានតែការរង់ចាំ(ពេលចូលធ្វើវិញ)។ ចង់ឱ្យរាជរដ្ឋាភិបាលជួយពួកខ្ញុំ។ ពួកខ្ញុំអត់ចំណូល បើលោតែធ្លាក់ខ្លួនឈឺទៀត មិនដឹងយ៉ាងណាទេ។ ខាងរោងចក្រគេមានលុយឧបត្ថម្ភ ខាងពួកខ្ញុំនេះអត់មានអីទេ។
អ្នកគ្រប់គ្រង KTV នៅម្ដុំបឹងត្របែក ដែលសុំលាក់អត្តសញ្ញាណដែរ ព្រោះតែមិនចង់ឱ្យប៉ះពាល់ដល់អាជីវកម្មថៅកែរបស់លោកនោះ ប្រាប់ថា កម្មករបាត់ចំណូល ខណៈថៅកែបាត់ចំណូល ប៉ុន្តែ ថៅកែនៅខ្វល់រឿងពន្ធដារផ្សេងៗ ប្រាក់ជួលអគារជាដើម។ លោកថា លោកមានការអាណិតបុគ្គលិកកម្មកររបស់ខ្លួនទាំងជាង ១០០នាក់ ដែលបាត់បង់ការងារនោះណាស់។
អ្នកគ្រប់គ្រង KTV ប្រាប់ថា៖ «សុទ្ធតែជារឿងដែលគ្រប់គ្នាកំពុងព្រួយបារម្ភ។ បុគ្គលិកដែលអត់ការងារធ្វើហ្នឹង ក៏ពួកគាត់ព្រួយបារម្ភរឿងបំណុលធនាគារ អ្នកខ្លះជួលផ្ទះនៅ បង់រំលោះផ្ទះ រំលោះទូរសព្ទ ម៉ូតូ។ វាច្រើនរឿងណាស់។ ពួកគាត់កំពុងមានហានិភ័យចំពោះរឿងហ្នឹង។ ក្ដីបារម្ភហ្នឹង ពួកគាត់អត់ដឹងថា ថ្ងៃណាទើប KTV បើកវិញណា!»
ក្នុងសេចក្ដីថ្លែងការណ៍កាលពីថ្ងៃទី១៧ ខែមីនា សហព័ន្ធសហជីព CFSWF បានបង្ហាញការសាទរចំពោះចំណាត់ការរបស់រាជរដ្ឋាភិបាល ដែលបិទ KTV ដើម្បីទប់ស្កាត់ការរីករាលដាលមេរោគកូវីដ១៩។
ទោះជាយ៉ាងណា សហជីពក៏បានស្នើទៅរដ្ឋាភិបាលឱ្យចាត់វិធានការមួយចំនួន ដើម្បីជួយសង្គ្រោះបុគ្គលិកកម្មករក្នុងវិស័យនេះ ដែលរួមមានស្នើឱ្យផ្ដល់ហិរញ្ញវត្ថុសម្រាប់ការហូបចុកប្រចាំថ្ងៃរហូតដល់បញ្ហាកូវីដ១៩បិទបញ្ចប់ គាំទ្រការព្យាបាលជំងឺតាមរយៈបេឡាជាតិរបបសន្តិសុខសង្គម និងពិនិត្យលទ្ធភាពពន្យារការសងប្រាក់មីក្រូហិរញ្ញវត្ថុ និងធនាគារ ជាដើម។
ប្រធានសហព័ន្ធសហជីព CFSWF កញ្ញា អ៊ូ ទេពផល្លីន ប្រាប់ថា កម្មករនិយោជិតវិស័យនេះ មានប្រាក់ខែមិនទៀងទាត់ទេ អ្នកខ្លះស៊ីប្រាក់ខែគោល អ្នកខ្លះធ្វើការយកលុយធីប។ កញ្ញាបញ្ជាក់ថា រាជរដ្ឋាភិបាលត្រូវចេញអន្តរាគមន៍បន្ទាន់ច្បាស់លាស់ និងទាន់ពេលវេលា ដើម្បីជួយគាំទ្រដល់បុគ្គលិកកម្មករក្រៅប្រព័ន្ធទាំងអស់។
កញ្ញា អ៊ូ ទេពផល្លីន ប្រាប់ថា៖ «និយាយតែអំពីបិទ តែអត់និយាយពីការគាំទ្រទៅដល់កម្មករនិយោជិតហ្នឹងក្នុងរូបភាពបែបណា ទម្រង់បែបណានោះទេ។ គ្នាប្រាក់ខែតិច ហើយអត់មានការគាំទ្រការហូបចុកទៀត តើគ្នាទៅរស់នៅក្នុងស្ថានភាពបែបណ?»
ប្រតិបត្តិករហិរញ្ញវត្ថុនៅកម្ពុជា ដែលមានសមាគមមីក្រូហិរញ្ញវត្ថុ និងសមាគមធនាគារនៅកម្ពុជា បានចេញវិធានការមួយចំនួន ដែលរួមមានការបន្តផ្តល់ឥណទាន ការប្រើអាកប្បកិរិយាទន់ភ្លន់ក្នុងការទារបំណុល និងតាមដានការវិវត្តនៃមេរោគកូវីដ១៩ ជាដើម។
នាយកប្រតិបត្តិនៃសមាគមមីក្រូហិរញ្ញវត្ថុ លោក ផល វ៉ាន់ឌី ប្រាប់ថា វិស័យមីក្រូហិរញ្ញវត្ថុ មិនអាចពន្យារការសងប្រាក់ ឬលើកលែងការបង់ការប្រាក់ ឬប្រាក់ដើម ជូនអតិថិជនទេ ព្រោះវិធីនេះមិនអាចទៅរួច និងប៉ះពាល់ធំធេងដល់វិស័យនេះទាំងមូល។ លោកថា ស្ថាប័នមីក្រូហិរញ្ញវត្ថុនឹងប្រើគោលនយោបាយរបស់ខ្លួនរៀងៗខ្លួន ក្នុងការដោះស្រាយបញ្ហាប្រឈមណាមួយជាមួយអតិថិជន ដោយការយោគយល់ខ្ពស់ក្នុងពេលដែលកម្ពុជាកំពុងជួបប្រទះជំងឺកូវីដ១៩នេះ។
លោក ផល វ៉ាន់ឌី មានប្រសាសន៍ថា៖ «ប្រាក់ដែលឱ្យអតិថិជនខ្ចីនោះ ជាប្រាក់របស់អ្នកដទៃទេ ប្រាក់របស់អតិថិជនដទៃ និងប្រាក់ដែលគាត់ [ស្ថាប័ន MFI] ពីគេ។ ស្ថាប័ននោះត្រូវបង់ការប្រាក់ គាត់ត្រូវមានកាតព្វកិច្ចដូចអតិថិជនយើងដែលខ្ចីពីគាត់ដែរ គឺយើងអត់ចង់ឱ្យមានអ្នកណាកេងពីអ្នកណាទេ ដើម្បីឱ្យយើងអាចឆ្លងផុតការលំបាកនេះទាំងអស់គ្នា»។
លោក វ៉ាន់ឌី បន្តថា៖ «ការពិនិត្យលទ្ធភាពសម្រួលដល់ការសងហ្នឹង ស្ថាប័ននីមួយៗនឹងពិនិត្យឱ្យអស់លទ្ធភាព ដើម្បីសម្រួលបញ្ហាអតិថិជនហ្នឹង។ ករណីដែលអតិថិជនជួបការលំបាកណាមួយ យើងក៏អាចកត់ត្រា ហើយស្វែងរកដំណោះស្រាយជាមួយគ្រឹះស្ថានដែរ»។
រដ្ឋាភិបាលមិនអាចចាប់បង្ខំវិស័យហិរញ្ញវត្ថុជុំវិញបំណុលរបស់ពលរដ្ឋ
មជ្ឈមណ្ឌលកម្សាន្តទាំងអស់នោះ រួមទាំងរោងភាពយន្តផង ត្រូវរាជរដ្ឋាភិបាលសម្រេចឱ្យបិទចាប់ពីថ្ងៃទី១៧ ខែមីនា តាមសំណើរបស់ក្រសួងសុខាភិបាល ដើម្បីទប់ទល់នឹងការរីករាលដាលនៃមេរោគកូវីដ១៩។
វីអូឌីមិនទាន់បានទទួលចម្លើយពីអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ និងអ្នកនាំពាក្យរាជរដ្ឋាភិបាលបានទេ ជុំវិញសំណើសុំអន្តរាគមន៍ចំពោះករណីកម្មករនិយោជិតក្នុងឧស្សាហកម្មកម្សាន្តដែលត្រូវផ្អាកការងារ។
អគ្គនាយកបច្ចេកទេសធនាគារជាតិ អ្នកស្រី ជា សេរី បានសរសេរក្នុងបណ្ដាញសង្គមហ្វេសប៊ុកផ្លូវការរបស់ខ្លួនថា ធនាគារកណ្ដាលកម្ពុជានេះ មិនមានយន្តការតម្រូវឱ្យមីក្រូហិរញ្ញវត្ថុបញ្ចុះអត្រាការប្រាក់ ឬពន្យារការបង់ប្រាក់សងត្រឡប់ទៅវិញក្នុងពេលកូវីដ១៩ វាយលុកនោះទេ។
អ្នកស្រីបញ្ជាក់ថា៖ «នៅបរទេសគេធ្វើបាន ព្រោះរដ្ឋគេចេញខាតជំនួសតាមរយៈការមិនយកពន្ធ ឬវិធានការផេ្សងៗ។ យើងអាចបង្ខំឱ្យធនាគារធ្វើបាន លុះត្រាតែធនាគារទទួលផលប្រយោជន៍អី្វមួយពីរដ្ឋវិញ។ បើយើងជាអ្នករកស៊ី ហើយរដ្ឋឱ្យយើងលក់ថោកជាងធម្មតា ដោយមិនចេញខាតឱ្យ ក៏យើងមិនសុខចិត្តដែរ។ ការទាមទាឱ្យមានវិធានការជាលក្ខណៈទូទៅ មិនរើសមុខ ក្នុងការពន្យារការយកការប្រាក់ ឬប្រាក់ដើម ក៏មិនអាចធ្វើបានដែរ ព្រោះត្រូវចំណាយធនធានធំណាស់ដើម្បីធ្វើការងារនេះ»។
ធនាគារជាតិកម្ពុជា បានចេញសេចក្តីសម្រេចមួយ ដើម្បីបន្ធូរបន្ថយការចំណាយជាបន្ទុករបស់ស្ថាប័នហិរញ្ញវត្ថុនៅកម្ពុជា បង្កើនដើមទុនសម្រាប់ផ្ដល់ឥណទានបន្ថែម និងកាត់បន្ថយការប្រាក់ដែលត្រូវបង់ចូលធនាគារជាដើម។
ក្រសួងសុខាភិបាលកម្ពុជា បានប្រកាសថា ការរីករាលដាលនៃវីរុសកូរ៉ូណាថ្មី បានកើនឡើងដល់ចំនួន ៣៧ករណីហើយ គិតត្រឹមយប់ថ្ងៃទី១៨ ខែមីនា ក្នុងនោះពលរដ្ឋកម្ពុជា ២៤នាក់។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បានថ្លែងកាលពីថ្ងៃម្សិលមិញថា ករណីឆ្លងវីរុសនេះស្ទើរតែទាំងអស់ ត្រូវបាននាំចូលបរទេស លើកលែងតែករណីបុរសខ្មែរម្នាក់នៅខេត្តសៀមរាប ដែលបានឆ្លងនៅក្នុងស្រុកពីបុរសជនជាតិជប៉ុនម្នាក់ ដែលត្រូវបានរកឃើញឆ្លងវីរុសនេះក្រោយវិលត្រឡប់ទៅដល់ប្រទេសជប៉ុន។
ក្រោយពីការរីករាលដាលនៃវីរុស Covid-19 នេះ កើនឡើងលឿនដល់ទៅ ៣ដងក្នុងសប្ដាហ៍នេះ កញ្ញា ស្រីណេ ប្រាប់ថា នាងក៏ព្រួយបារម្ភខ្លាចឆ្លងវីរុសនេះផងដែរ ហើយនាងក៏ត្រូវការការជួយឧត្ថម្ភផ្សេងទៀតដែរ។
កញ្ញា ស្រីណេ៖ «មិនដឹងម៉េចទេបងអើយ ប៉ុន្មានថ្ងៃនេះផឹកជាមួយភ្ញៀវរហូត ចាំមើលបើមិនស្រួលខ្លួន ចាំទៅពេទ្យ។ តែគិតម្យ៉ាង រឿងអត់លុយទៀត។ ខ្ញុំគាំទ្រឱ្យបិទអ៊ីចឹងដែរ ខ្លាចឆ្លងដែរ តែសុំជួយពួកខ្ញុំផង ម៉ែឪនៅស្រុកជំពាក់ធនាគារទៀត រាល់ថ្ងៃ ពឹងលើខ្ញុំជួយ។ ឥឡូវមិនដឹងបានអីជួយពួកគាត់ទៀតទេ»៕
