រដ្ឋមន្ត្រីក្រសួងមហាផ្ទៃលោក ស ខេង បានសម្រេចបង្កើតគណៈកម្មការមួយ ដើម្បីបង្ការ និងទប់ស្កាត់ការឆ្លងជំងឺកូវីដ-១៩ដែលកំពុងរីករាលដាលទូទាំងពិភពលោករួមទាំងនៅប្រទេសកម្ពុជានាពេលបច្ចុប្បន្ន។
ក្នុងសេចក្ដីសម្រេចរបស់ក្រសួងមហាផ្ទៃចុះថ្ងៃទី២០ ខែមីនា ឆ្នាំ២០២០ ឱ្យដឹងថា គណៈកម្មការបង្ការ និងទប់ស្កាត់ការឆ្លងជំងឺកូវីដ-១៩ ដឹកនាំដោយរដ្ឋមន្ត្រីក្រសួងមហាផ្ទៃ លោក ស ខេង ជាប្រធាន និងមានអនុប្រធានអចិន្ដ្រៃយ៍០១រូប និងអនុប្រធាន១៧រូប រួមទាំងសមាជិក១៦រូបផ្សេងទៀត។
សេចក្ដីសម្រេចដដែលបញ្ជាក់ថា គណៈកម្មការនេះ មានតួនាទី និងភារកិច្ច ដូចជា រៀបចំផែនការសកម្មភាព និងផ្សព្វផ្សាយគោលការណ៍ណែនាំរបស់រដ្ឋាភិបាល និងក្រសួងសុខាភិបាល ដល់ថ្នាក់ដឹកនាំ មន្ដ្រីរាជការស៊ីវិល និងនគរបាលជាតិ ក្រសួងមហាផ្ទៃទាំងអស់ ដើម្បីចូលរួមបង្ការ និងទប់ស្កាត់ការឆ្លងជំងឺកូវីដ-១៩។
ក្រៅពីរៀបចំផែនការ និងផ្សព្វផ្សាយ គណៈកម្មការនេះ ត្រូវតាមដាន ត្រួតពិនិត្យ និងវាយតម្លៃការអនុវត្តផែនការសកម្មភាពរបស់ក្រសួងមហាផ្ទៃ ក្នុងការចូលរួមបង្ការ និងទប់ស្កាត់ការឆ្លងនៃជំងឺកូវីដ១៩ និងធ្វើការតាមដានស្ថានភាពវិវត្តនៃការរីករាលដាលជំងឺកូវីដ១៩នៅក្នុងប្រទេសកម្ពុជា។
ការបង្កើតគណៈកម្មការនេះ ធ្វើឡើងបន្ទាប់ពីក្រសួងសុខាភិបាលកម្ពុជាបានរកឃើញអ្នកផ្ទុកជំងឺកូវីដ-១៩ ចំនួន ៥១នាក់ នៅក្នុងខេត្តចំនួន១២ និងរាជធានីភ្នំពេញ៕
