ស្រ្តីខ្មែរ២រូបដែលជាម្តាយ និងកូន កំពុងរស់នៅប្រទេសកូរ៉េខាងត្បូង ត្រូវបានរាយការណ៍បានឆ្លងកូវីដ១៩។
យោងតាមទំព័រហ្វេសប៊ុករបស់ស្ថានទូតកម្ពុជាប្រចាំប្រទេសកូរ៉េខាងត្បូង ស្រ្តីជនជាតិខ្មែរអាយុ២៣ឆ្នាំ ដែលមានស្វាមីជាជនជាតិកូរ៉េ និងម្តាយអាយុ៤៦ឆ្នាំ រួមទាំងកូនប្រុសអាយុទើប៣ខែរបស់នារីនោះ ត្រូវបានរាយការណ៍កាលពីយប់ម្សិលមិញថាមានផ្ទុកកូវីដ-១៩។ ប្រភពដដែលឱ្យដឹងថា ស្រ្តីខ្មែរទាំង២នាក់ រស់នៅទីក្រុងប៊ូឆុនដែលស្ថិតនៅចម្ងាយប្រមាណ២០គីឡូម៉ែត្រពីទីក្រុងសេអ៊ូល។ ស្រ្តីខ្មែរវ័យ២៣ឆ្នាំនោះ បានឆ្លងវីរ៉ុសកូវីដ-១៩ពីប្តីរបស់គាត់ដែលប្តីគាត់នោះបានឆ្លងពីក្មួយនៅទីក្រុងដេគូដែលជាតំបន់ឆ្លងខ្លាំងជាងគេនៅកូរ៉េខាងត្បូង។ ក្រុមគ្រូពេទ្យកូរ៉េ បានបញ្ជូនពួកគាត់ទៅមន្ទីពេទ្យម៉្យុងជី នៅអ៊ីលសានដើម្បីពិនិត្យ និងព្យាបាល។
ស្ថានទូតកម្ពុជាប្រចាំប្រទេសកូរ៉េខាងត្បូង អះអាងថាខ្លួនកំពុងតែប្រមូលព័ត៌មានបន្ថែមទៀត និងធ្វើការសម្របសម្រួលជាមួយក្រសួងការបរទេសកូរ៉េខាងត្បូង ក៏ដូចជាអាជ្ញាធរសុខាភិបាល មន្ទីរពេទ្យអ៊ីលសានម៉្យុងជី និងអាជ្ញាធរពាក់ព័ន្ធផ្សេងទៀត។ ស្ថានទូតក៏បានបញ្ជាក់ថាមន្ត្រីទូតក៏ចុះទៅមន្ទីរពេទ្យដោយផ្ទាល់ដើម្បីតាមដានពីស្ថានភាពសុខភាពរបស់ពលរដ្ឋខ្មែរទាំងពីរនាក់នាព្រឹកនេះផងដែរ៕