ក្រុមមេធាវីលោក កឹម សុខា ស្នើសុំតុលាការលើកពេលសវនាការកូនក្តីរបស់ខ្លួន ដោយសារបារម្ភពីសុវត្ថិភាពរបស់អ្នកចូលរួម ខណៈដែលកម្ពុជារកឃើញអ្នកផ្ទុកកូវីដ-១៩ ជាបន្តបន្ទាប់។
យោងតាមពាក្យស្នើសុំចុះកាលបរិច្ឆេទថ្ងៃទី២៣ ខែមីនា ដែល VOD ទទួលបាននាព្រលប់ថ្ងៃនេះ ក្រុមមេធាវីរបស់លោក កឹម សុខា បានស្នើសុំឱ្យមានការលើកពេលសវនាការទៅថ្ងៃក្រោយ ដោយលើកឡើងថា ការធ្វើបែបនេះ គឺដើម្បីការពារសុវត្ថិភាព និងសុខភាពសម្រាប់អ្នកទាំងអស់គ្នាក្នុងបន្ទប់សវនាការពីជំងឺឆ្លងកូវីដ-១៩ ដែលរាជរដ្ឋាភិបាល និងពិភពលោកកំពុងរួមគ្នាប្រយុទ្ធប្រឆាំង។
លោក ចាន់ ចេន ជាមេធាវីរបស់លោក កឹម សុខា បានបញ្ជាក់ថា លោកបានដាក់លិខិតជូនតុលាការរួចហើយ ដើម្បីសុំឱ្យលើកពេលសវនាការ ដោយសារមានការបារម្ភពីជំងឺថ្មីនេះ ប៉ុន្តែ លោកមិនទាន់ទទួលបានការឆ្លើយតបពីតុលាការនៅឡើយទេមកទល់ព្រលប់ថ្ងៃច័ន្ទនេះ។
លោក ចាន់ ចេន មានប្រសាសន៍ថា៖ «យើងបានស្នើសុំលើកពេលសវនាការ […] ដោយសារតែព្រួយបារម្ភ ហើយក៏ដើម្បីការពារសុខភាពទាក់ទិនជំងឺថ្មី(កូវីដ-១៩)នេះដែរ»។
លោក ចាន់ ចេន បន្ថែមថា ការស្នើសុំនេះ គឺស្របទៅនឹងវិធានការណ៍របស់រាជរដ្ឋាភិបាលក្នុងការទប់ស្កាត់ការរីករាលដាលជំងឺនេះផងដែរ។
មេធាវីតំណាងរដ្ឋាភិបាល លោក លី ច័ន្ទតុលា ក៏បានបញ្ជាក់ប្រាប់ VOD នៅព្រលប់ថ្ងៃច័ន្ទនេះផងដែរថា លោកពិតជាទទួលបានព័ត៌មានស្តីពីការស្នើសុំរបស់ក្រុមមេធាវីលោក កឹម សុខា ឱ្យតុលាការលើកពេលសវនាការទៅថ្ងៃក្រោយ ហើយលោកថា ការស្នើសុំនេះគឺជាការសមរម្យ ប៉ុន្តែ ការសម្រេចយ៉ាងណានោះ លោកមិនទាន់ប្រាកដនៅឡើយ ដោយរង់ចាំការពិភាក្សានៅថ្ងៃស្អែក។
លោក តុលា មានប្រសាសន៍ថា៖ «វាគឺជាការសមរម្យមួយ ហើយស្អែកយើងនឹងមានការប្រជុំគ្នា ដើម្បីធ្វើការសម្រេច»។
លោក កឹម សុខា អតីតប្រធានគណបក្សសង្គ្រោះជាតិដែលត្រូវតុលាការកំពូលរំលាយកាលពីចុងឆ្នាំ២០១៧នោះ ត្រូវបានចោទប្រកាន់ពីបទរួមគំនិតជាមួយបរទេស ដើម្បីផ្តួលរំលំរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ដោយមានអាមេរិកនៅពីក្រោយ ប៉ុន្តែ ទាំងលោក និងសហរដ្ឋអាមេរិកបានបដិសេធការចោទប្រកាន់នេះ។
កាលពីថ្ងៃទី១២ ខែមីនា ក្រោយបញ្ចប់សវនាការ លោកប្រធានក្រុមប្រឹក្សាជំនុំជម្រះ កូយ សៅ បានប្រកាសថា សវនាការនឹងបន្តធ្វើនៅថ្ងៃទី២៥ និង២៦ ខែមីនានេះ។
លោក អ៊ី រិន ជាអ្នកនាំពាក្យសាលាដំបូងរាជធានីភ្នំពេញ បានប្រាប់ VOD ថា លោកមិនទាន់ដឹងថា លោកប្រធានចៅក្រមជំនុំជម្រះនឹងធ្វើការសម្រេចយ៉ាងណានៅឡើយទេ ហើយថា លោកនឹងជូនដំណឹងបន្ថែមនៅថ្ងៃស្អែកនេះ ប្រសិនបើមានការសម្រេចយ៉ាងណានោះ៕
