សាលាឧទ្ធរណ៍នៅថ្ងៃនេះ បានប្រកាសសាលដីកាដោយចាត់ទុកសេចក្តីសម្រេចរបស់សាលាដំបូងរាជធានីភ្នំពេញ ដែលមិនអនុញ្ញាតឱ្យអតីតសកម្មជនបក្សប្រឆាំងនៅខេត្តស្វាយរៀង លោក គង់ ម៉ាស់ នៅក្រៅឃុំ ថានៅតែបានការដដែល។
កាលពីខែកុម្ភៈ ឆ្នាំ២០១៩ មេធាវីការពារក្តីឱ្យលោក គង់ ម៉ាស់ បានដាក់បណ្តឹងទៅសាលាឧទ្ធរណ៍ ដើម្បីស្នើឱ្យសភាស៊ើបសួរនៃតុលាការមួយនេះពិនិត្យឡើងវិញ ចំពោះសេចក្តីសម្រេចរបស់សាលាដំបូងរាជធានីភ្នំពេញ ដែលមិនព្រមដោះលែងកូនក្តីរបស់ខ្លួនបាននៅក្រៅឃុំជាបណ្តោះអាសន្ន។
អ្នកនាំពាក្យសាលាឧទ្ធរណ៍ លោក ទូច ថារិទ្ធិ មានប្រសាសន៍ថា សាលាឧទ្ធរណ៍សម្រេចមិនដោះលែងលោក គង់ ម៉ាស់ ឱ្យក្រៅឃុំបណ្តោះអាសន្ន គឺក្រោយពីចៅក្រមជំនុំជម្រះពិនិត្យឃើញថា ការសម្រេចសេចក្តីរបស់សាលាដំបូងរាជធានីភ្នំពេញ បានធ្វើឡើងត្រឹមត្រូវទៅតាមផ្លូវច្បាប់ដែលមានឯកសារ និងភស្តុតាងត្រឹមត្រូវ។
លោកបន្ថែមថា៖ «ជាគោលការណ៍ច្បាប់ ប្រសិនជាចៅក្រមជំនុំជម្រះ ដែលគាត់ជាប្រធានក្រុមប្រឹក្សាហ្នឹង គាត់យល់ឃើញថា ការសម្រេចសេចក្តីរបស់សាលាដំបូងរាជធានីភ្នំពេញ ត្រឹមត្រូវទៅតាមច្បាប់ហើយ អាហ្នឹង គាត់តម្កល់ហើយ ព្រោះវាមានភស្តុតាង និងមានឯកសារច្បាស់លាស់គ្រប់គ្រាន់ ព្រោះវាមានទោសនៃការចោទប្រកាន់ពីក្រោមមកហើយ»។
មេធាវីការពារក្តីឱ្យលោក គង់ ម៉ាស់ គឺលោក សំ សុគង់ បានបង្ហាញការខកចិត្តចំពោះសាលាឧទ្ធរណ៍ដែលមិនព្រមដោះលែងកូនក្តីរបស់លោកឱ្យនៅក្រៅឃុំ ដោយលោកថា ការសម្រេចនេះមិនបានផ្តល់ភាពយុត្តិធម៌ចំពោះកូនក្តីរបស់លោកឡើយ។
មេធាវីរូបនេះបន្តថា កូនក្តីរបស់លោកមិនបានប្រព្រឹត្តដូចការចោទប្រកាន់ឡើយ។ លោកបន្ថែមថា អ្វីដែលកូនក្តីរបស់លោកលើកឡើងនោះ គឺជាការសម្តែងមតិ ហើយសំណុំរឿងរបស់លោក គង់ ម៉ាស់ នេះ ក៏ជាប់ពាក់ព័ន្ធរឿងនយោបាយផងដែរ។
លោក សំ សុគង់ បន្ថែមថា ដោយសារតែការសម្រេចនេះមិនអាចទទួលយកបាន ខាងលោកបានពិភាក្សាជាមួយកូនក្តីលោករួចហើយ ថានឹងដាក់បណ្តឹងទៅតុលាការកំពូលបន្តទៀត ឱ្យពិនិត្យឡើងវិញចំពោះការសម្រេចរបស់សាលាឧទ្ធរណ៍។
លោកបន្ថែមថា៖ «សំណុំរឿងនេះ សម្តេចបានមានប្រសាសន៍នៅខេត្តកំពត កាលពីថ្ងៃទី១៤ ខែវិច្ឆិកា ថាមិនឱ្យមានការចាប់ចង ឬមិនបន្តឱ្យមានការចាប់ ឬក៏ឱ្យដោះលែងចំពោះអ្នកដែលជាប់ពាក់ព័ន្ធរឿងនយោបាយមានសេរីភាព។ ហើយសំណុំរឿងនេះ វាជារឿងជាប់ពាក់ព័ន្ធនយោបាយ ហើយសាលាឧទ្ធរណ៍គួរតែសម្រេចឱ្យកូនក្តីខ្ញុំមានសេរីភាព ឬរួចពីបទចោទ»។
លោក គង់ ម៉ាស់ ជាអតីតសមាជិកក្រុមការងាររបស់គណបក្សសង្គ្រោះជាតិ ប្រចាំនៅខេត្តស្វាយរៀង និងជាអនុប្រធាននាយកដ្ឋានកិច្ចការបោះឆ្នោត និងនីតិកម្ម។
លោក គង់ ម៉ាស់ ត្រូវបានសមត្ថកិច្ចក្រសួងមហាផ្ទៃចាប់ឃាត់ខ្លួន កាលពីព្រឹកថ្ងៃទី១៦ ខែមករា ឆ្នាំ២០១៩ នៅក្នុងហាងកាហ្វេមួយកន្លែងក្នុងរាជធានីភ្នំពេញ ដែលការចាប់ខ្លួននោះធ្វើឡើងតែ២ថ្ងៃប៉ុណ្ណោះ ក្រោយពីលោក ហ៊ុន សែន ថ្លែងព្រមានកម្ទេចក្រុមបក្សប្រឆាំងចោល និងមិនអត់ឱនឱ្យក្រុមនេះ ប្រសិនបើសហគមន៍អឺរ៉ុប និងអាមេរិក ដកហូតប្រព័ន្ធអនុគ្រោះពន្ធពីកម្ពុជា។
កាលពីថ្ងៃទី១៨ ខែតុលា ឆ្នាំ២០១៩ សកម្មជនអតីតបក្សប្រឆាំងរូបនេះ ត្រូវបានសាលាដំបូងរាជធានីភ្នំពេញកាត់ទោសឱ្យជាប់ពន្ធនាគារ១៨ខែ ពីបទ«ប្រមាថ និងញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៥ និង មាត្រា៥០២ នៃក្រមព្រហ្មទណ្ឌ។
ពាក់ព័ន្ធការចាប់ខ្លួនសកម្មជនអតីតបក្សប្រឆាំង លោក គង់ ម៉ាស់ នេះ គឺត្រូវបានអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃវ៉ច្ឆ (Human Right Watch) និងអង្គការសិទ្ធិមនុស្សក្នុងស្រុកមួយចំនួន ចាត់ទុកថា ជាការគំរាមកំហែង និងរឹតត្បិតសិទ្ធិសេរីភាពបញ្ចេញមតិរបស់ពលរដ្ឋដែលធានាដោយរដ្ឋធម្មនុញ្ញ៕
