ក្រសួងសុខាភិបាលនៅថ្ងៃនេះបានប្រកាសរកឃើញអ្នកផ្ទុកកូវីដ-១៩ ចំនួន៣នាក់ទៀតដែលនាំឱ្យករណីសរុបកើនដល់៨៧។
នេះបើតាមសេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃទី២៣ ខែមីនា។ ប្រភពដដែលឱ្យដឹងថា១ករណីត្រូវបានរកឃើញលើបុរសជនជាតិខ្មែរវ័យ៤៥ឆ្នាំ នៅឃុំពាមជីកង ស្រុកកងមាស ខេត្តកំពង់ចាម។ បុរសនោះជាអ្នកបានចូលរួមក្នុងពិធីសាសនាជាមួយជនជាតិម៉ាឡេស៊ីនៅស្រុកកងមាសពីថ្ងៃទី១២ដល់ថ្ងៃទី១៦ខែមីនា។ បុរសខ្មែរនោះរស់នៅជាមួយកូនស្រីអាយុឆ្នាំ ដែលបច្ចុប្បន្នមន្រ្តីសុខាភិបាលបានយកសំណាកទៅពិនិត្យនិងកំពុងរង់ចាំលទ្ធផល។ បុរសនោះត្រូវបានដាក់ដោយឡែកនៅមន្ទីពេទ្យខេត្តកំពង់ចាម។
ចំណែក១ករណីទៀតត្រូវបានរកឃើញលើបុរសខ្មែរវ័យ៣៦ឆ្នាំរស់នៅខេត្តកំពត ដែលគាត់បានឆ្លងពីបុរសម្នាក់ដែលបានទៅចូលរួមពិធីសាសនានៅម៉ាឡេស៊ី។ គាត់ត្រូវបានដាក់ព្យាបាលនៅមន្ទីរពេទ្យខេត្តកោះកុង។
ដោយឡែកករណីទី៣ ត្រូវបានរកឃើញលើស្រ្តីជនជាតិបារាំងវ័យ២៨ឆ្នាំ ដែលជាម្តាយរបស់ទារកអាយុ៤ខែ ដែលកំពុងមើលថែកូនមានតេស្តវិជ្ជមាននៅមន្ទីរពេទ្យគន្ធបុប្ផារាជធានីភ្នំពេញ។
ក្នុងសារជាសំឡេងដែលត្រូវបានផ្សព្វផ្សាយនៅថ្ងៃនេះ លោកនាយករដ្ឋមន្រ្តី ហ៊ុន សែន បានដាក់បទបញ្ជាឱ្យអភិបាលខេត្តទាំងអស់ត្រូវស្វែងរកសណ្ឋាគារ ខុនដូរ ឬផ្ទះសំណាក់ ដោយគិតថ្លៃឱ្យម្ចាស់អាជីវកម្មទាំងនោះ និងជម្រើសចុងក្រោយគឺរកសាលារៀនសម្រាប់ជាទីតាំងព្យាបាល ឬដាក់អ្នកសង្ស័យឆ្លងកូវីដ-១៩។ នៅថ្ងៃនេះដែរក្រុមគ្រូពេទ្យចិនចំនួន៧នាក់ក៏បានមកដល់ប្រទេសកម្ពុជាដើម្បីចែករំលែកបទពិសោធន៍និងបង្ហាត់បង្រៀនអំពីការព្យាបាលជំងឺកូវីដ-១៩ ព្រមទាំងផ្តល់នូវបរិក្ខាពេទ្យសម្រាប់ប្រើប្រាស់ពាក់ព័ន្ធនឹងជំងឺកូវីត១៩។
