ក្រសួងសុខាភិបាលនៅថ្ងៃនេះ បានអះអាងថា ខ្លួនបានព្យាបាលជនជាតិខ្មែរដែលមានវីរុសកូវីដ-១៩ បានជាសះស្បើយចំនួន៤ករណីហើយ។
សេចក្តីជូនព័ត៌មានរបស់ក្រសួងសុខាភិបាលដែលចេញនៅយប់ថ្ងៃទី២៤ ខែមីនានេះ បញ្ជាក់ថា បុរសវ័យ៦១ឆ្នាំ និង៥៣ឆ្នាំ ដែលផ្ទុកកូវីដ-១៩ នៅខេត្តត្បូងឃ្មុំ មានលទ្ធផលតេស្តអវិជ្ជមានកូវីដ-១៩ចំនួន២លើក ហើយត្រូវបានអនុញ្ញាតឱ្យចេញពីមន្ទីរពេទ្យនៅថ្ងៃនេះផងដែរ។ ដោយឡែក បុរសវ័យ៤១ និងបុរសម្នាក់ទៀតវ័យ៤២ឆ្នាំ នៅខេត្តបាត់ដំបង គឺត្រូវបានអនុញ្ញាតឱ្យចេញពីមន្ទីរពេទ្យនៅថ្ងៃនេះដែរ ព្រោះលទ្ធផលតេស្តបង្ហាញថា អវិជ្ជមានកូវីដ-១៩ហើយ។
គិតត្រឹមយប់ថ្ងៃទី២៤ ខែមីនានេះ កម្ពុជាមានករណីកូវីដ-១៩ ចំនួន៩១ ដែលក្នុងនោះក្រសួងអះអាងថាព្យាបាលជាសះស្បើយចំនួន៦ករណី៕
