មន្ត្រីជាន់ខ្ពស់ក្រសួងទេសចរណ៍ អះអាងថា សណ្ឋាគារ និងផ្ទះសំណាក់ចំនួន ២៨កន្លែងនៅទូទាំងប្រទេស ត្រូវបានយកធ្វើជាទីតាំងសម្រាប់ព្យាបាល និងដាក់អ្នកសង្ស័យផ្ទុកជំងឺកូវីដ-១៩ ឱ្យនៅដាច់ដោយឡែក។
អ្នកនាំពាក្យក្រសួងទេសចរណ៍ លោក តុប សុភ័ក ប្រាប់វីអូឌីនៅថ្ងៃនេះថា ទោះបីជាខេត្តខ្លះមានមន្ទីរពេទ្យបង្អែក មណ្ឌលសុខភាពគ្រប់គ្រាន់ហើយក៏ដោយ ប៉ុន្តែ អាជ្ញាធរខេត្តនីមួយៗអាចយកសណ្ឋាគារ និងផ្ទះសំណាក់១ ឬ ២កន្លែងបន្ថែមទៀត ដើម្បីបំរុងទុកសម្រាប់ព្យាបាល និងដាក់អ្នកសង្ស័យផ្ទុកជំងឺកូវីដ-១៩។
លោកថា៖ «អ៊ីចឹង ជារួមមក នៅទូទាំងប្រទេសគឺមានផ្ទះសំណាក់ និងសណ្ឋាគារ ចំនួន ២៨កន្លែង ក្នុងនោះ សណ្ឋាគារ១៨ និងផ្ទះសំណាក់១០នៅទូទាំងប្រទេស បើគិតជាបន្ទប់មានជាង ១៥០០បន្ទប់ ដែលអាជ្ញាធរខេត្តហ្នឹងបានជ្រើសរើសយកសម្រាប់ជាទីតាំងមួយ ទុកដាក់រៀបចំព្យាបាលអ្នកជំងឺកូវីដ-១៩ ជាការត្រៀមលក្ខណៈ ទោះបីជាខេត្តមិនទាន់មានករណីនេះកើតឡើងក៏ដោយ ប៉ុន្តែ ជាការជ្រើសរើសត្រៀមលក្ខណៈសម្រាប់កិច្ចការនេះ»។
ការសម្រេចយកសណ្ឋាគារ ផ្ទះសំណាក់នេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមីនា ឆ្នាំ២០២០ បានផ្ញើសារជាសំឡេង ដោយដាក់បទបញ្ជាថ្មីទៅអភិបាលខេត្តទាំងអស់ឱ្យស្វែងរកសណ្ឋាគារ ផ្ទះសំណាក់ និងអគារមជ្ឈមណ្ឌលបណ្ដុះបណ្ដាលវិជ្ជាជីវៈមួយចំនួន ទុកសម្រាប់ធ្វើជាទីតាំងព្យាបាល ឬដាក់អ្នកសង្ស័យឆ្លងជំងឺកូវីដ-១៩។
លោកបញ្ជាក់ថា ការដែលសម្រេចជួលសណ្ឋាគារ ផ្ទះសំណាក់ ធ្វើជាកន្លែងសម្រាប់ព្យាបាល ឬដាក់អ្នកសង្ស័យឆ្លងជំងឺកូវីដ-១៩នោះ ដោយសារតែនៅទីតាំងខាងលើនេះ មានប្រព័ន្ធទឹក ប្រព័ន្ធភ្លើង គ្រែ ម៉ាស៊ីនត្រជាក់ និងកង្ហារ ស្រាប់។
លោក ហ៊ុន សែន មានប្រសាសន៍ក្នុងសារសំឡេងនោះថា៖ «អ៊ីចឹង យើងជួលយកមកគ្រប់គ្រង មានគ្រែមានអីហើយស្រេច អីចឹងវាជាការងាយស្រួល។ ចំណុចនេះ គឺសុំឱ្យខេត្ត ធ្វើការបន្ទាន់ទៅលើបញ្ហាហ្នឹង។ រីឯសាលារៀន គឺយើងយក ឬយើងធ្វើតែពេលណាដែលយើងមិនអាចរកសណ្ឋាគារ ឬរកអាគារបាន សឹមយើងទៅយកសាលារៀន ប៉ុន្តែ ឥឡូវហ្នឹង ដោយសារយើងមានសណ្ឋាគារជាច្រើនដែលត្រូវបិទ អត់មានភ្ញៀវ អ៊ីចឹង យើងសណ្ឋាគារតែម្ដង ជួលគេ ត្រូវចំណាយលុយរបស់យើងជួលគេ»។
ដោយឡែក អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បដិសេធសំណួរដែលវីអូឌីសួរថា តើមកដល់ពេលនេះ មានសាលារៀនចំនួនប៉ុន្មានហើយ ដែលត្រូវបានយកមកធ្វើជាកន្លែងសម្រាប់ព្យាបាល និងដាក់អ្នកសង្ស័យថា មានផ្ទុកជំងឺកូវីដ-១៩នោះ? ដោយលោកជំរុញឱ្យមានការផ្សព្វផ្សាយពីការលើកកម្ពស់អនាម័យវិញ។
លោកថា៖ «ទាក់ទងហ្នឹងការឆ្លើយតបហ្នឹង ដូចខ្ញុំបានជម្រាបអ៊ីចឹង ជំហរខ្ញុំផ្ទាល់គឺខ្ញុំស្នើសុំឱ្យបងប្អូនអ្នកសារព័ត៌មាន មេត្តាយោងខ្លឹមសារដែលក្រសួងអប់រំ យុវជន និងកីឡា បានចេញ។ ក្រៅពីនោះ សំណូមពរខ្ញុំបង្កើនមុំផ្សព្វផ្សាយលើកកម្ពស់អនាម័យបុគ្គល ក៏ដូចជាគោលការណ៍ថែរក្សាសុខភាពចេញពីក្រសួងអប់រំ ក្រសួងសុខាភិបាល និងអង្គការសុខភាពពិភពលោក ហើយនិងការអំពាវនាវផ្សេងៗរដ្ឋាភិបាល»។
អំឡុងពេលថ្ងៃទី២៤ និង២៥ ខែមីនានេះ វីអូឌីមិនអាចសុំការអត្ថាធិប្បាយពីអ្នកនាំពាក្យក្រសួងសុខាភិបាលលោកស្រី ឱ វណ្ណឌីន និងលោក លី សូវ៉ាន់ បាននៅឡើយទេ ពាក់ព័ន្ធនឹងការរៀបចំសម្ភារ និងគ្រូពេទ្យ នៅតាមសណ្ឋាគារ ផ្ទះសំណាក់ និងសាលារៀន បន្ទាប់រដ្ឋាភិបាលសម្រេចយកទីតាំងទាំងនោះធ្វើជាកន្លែងសម្រាប់ព្យាបាល និងដាក់អ្នកសង្ស័យជំងឺកូវីដ-១៩។ អ្នកនាំពាក្យទាំងពីររូបប្រាប់ថា រវល់។
គិតមកដល់ថ្ងៃទី២៥ ខែមីនា កម្ពុជារកឃើញអ្នកផ្ទុកកូវីដ-១៩ ចំនួន៩៣ករណី ដែលក្នុងនោះរកឃើញលើជនជាតិខ្មែរ ៣៥នាក់ បារាំង ៣៦នាក់ ម៉ាឡេស៊ី ១២នាក់ អង់គ្លេស ៥នាក់ កាណដា ១នាក់ ចិន ១នាក់ ប៊ែលហ្ស៊ិក ១នាក់ និងអាមេរិក ២នាក់។ ក្រសួងបញ្ជាក់ថា ក្នុងចំណោមអ្នកផ្ទុកជំងឺកូវីដ-១៩ ទាំងនោះ គឺ មានមនុស្សចំនួន ៦នាក់ ត្រូវបានគ្រូពេទ្យព្យាបាលឱ្យជាសះស្បើយ៕
