នៅថ្ងៃចន្ទសប្តាហ៍នេះ គ្រូពេទ្យចិន៧នាក់បានមកដល់កម្ពុជា ក្រោយពីកម្ពុជារកឃើញមានអ្នកផ្ទុកមេរោគរលាកផ្លូវដង្ហើមថ្មី ឬហៅ កូវីដ១៩ កើនឡើង ហើយរដ្ឋាភិបាលក៏បានដាក់ចេញផែនការបន្តបន្ទាប់ដែរដើម្បីឆ្លើយតបបញ្ហានេះ រួមទាំងបិទសាលារៀន ការជួបជុំ និងកន្លែងកម្សាន្តផ្សេងៗទៀត។
រដ្ឋាភិបាលបង្ហាញថា គិតត្រឹមថ្ងៃទីពុធនេះ អ្នកផ្ទុកមេរោគកូវីដ១៩ ឡើងដល់ ៩៣នាក់ហើយ ក្នុងនោះជនជាតិកម្ពុជា ៣៥នាក់។
ការមកដល់របស់ក្រុមគ្រូពេទ្យចិននេះ ចំពេលប្រទេសវៀតណាម និងថៃ ជាប្រទេសជិតខាងកម្ពុជា ហើយមានប្រព័ន្ធសុខាភិបាលខ្លាំងជាងកម្ពុជានោះ បានប្រកាសបិទព្រំដែនបណ្តោះអាសន្ន ក្រោមហេតុផលទប់ស្កាត់ការឆ្លងរាលដាលនៃមេរោគកូវីដ១៩ ។
លោកនាយករដ្ឋមន្ត្រី ហ៊ុន សែន បានលើកឡើងថា ក្រុមគ្រូពេទ្យជំនាញ ៧នាក់របស់ចិន នឹងជួយបង្ហាត់បង្រៀនអំពីការព្យាបាលជំងឺកូវីដ១៩ ដល់គ្រូពេទ្យកម្ពុជា។
លោកថា៖ «ប្រទេសចិន ដែលពេលនេះរដ្ឋាភិបាលចិន បានសម្រេចបញ្ជូនគ្រូពេទ្យនោះមកកាន់ប្រទេសកម្ពុជា ដើម្បីជួយបង្ហាត់បង្រៀនអំពីការព្យាបាលជំងឺកូវីដ១៩ ព្រមទាំងផ្តល់នូវបរិក្ខារពេទ្យសម្រាប់ប្រើប្រាស់ពាក់ព័ន្ធនឹងជំងឺកូវីដ១៩»។
តាមការពន្យល់ពីស្ថាប័នជំនាញ កូវីដ១៩ ឆ្លងពីមនុស្សទៅមនុស្សតាមការប៉ះពាល់អ្នកផ្ទុកមេរោគ ការធ្វើដំណើររួមគ្នា ពិធីជួបជុំ និងក្លឹបកម្សាន្ត ជាដើម។
មេរោគនេះ ក្រោយវាឆ្លង វាអាចសម្ងំលាក់ខ្លួនរហូតជាង១០ថ្ងៃ ទើបបង្ហាញរោគសញ្ញា ដែលរយៈពេលនេះ កូវីដ១៩ អាចរាតត្បាតពីមនុស្សម្នាក់ទៅមនុស្សច្រើនទៀតក្នុងស្ថានភាពស្ងប់ស្ងាត់ ទាំងមិនឱ្យអ្នកផ្ទុកដឹងខ្លួនមុនទៀតផង។
តាមការណែនាំ ដើម្បីទប់ស្កាត់ការរីករាលដាលនៃជំងឺដ៏កាចសាហាវនេះ អ្នកធ្វើដំណើរពីតំបន់ផ្ទុះជំងឺ ត្រូវគ្រូពេទ្យដាក់ឱ្យនៅដាច់ដោយឡែកពីអ្នកដទៃ រយៈពេលយ៉ាងតិច១៤ថ្ងៃ ដើម្បីតាមដាន ។
ជ្រុងមួយទៀតនៃបញ្ហារបស់កម្ពុជា ក្រៅពីរកឃើញអ្នកផ្ទុកមេរោគនេះកើនឡើងរៀងរាល់ថ្ងៃ ដែលគិតត្រឹមម៉ោងផ្សាយថ្ងៃពុធនេះ ឡើងដល់៩៣ករណីនោះ គឺការសម្រុកចូលយ៉ាងគំហុកពីសំណាក់ពលករខ្មែររាប់រយនាក់ធ្វើការនៅប្រទេសថៃចូលមកកម្ពុជាវិញ ចំពេលដែលថៃប្រកាសអាសន្នពីការរាលដាលនៃជំងឺដ៏កាចសាហាវនេះ ទាំងមិនបានដាក់ឱ្យនៅដាច់ដោយឡែក១៤ថ្ងៃ។
សំណួរត្រង់ថា វត្តមានគ្រូពេទ្យជំនាញចិន៧នាក់ អាចទប់ស្កាត់ការឆ្លងរាលដាលកូវីដ១៩នៅកម្ពុជាបានកម្រិតណា?
ចម្ងល់នេះ អ្នកឃ្លាំមើលបង្ហាញទស្សនៈយល់ឃើញខុសគ្នា។ អ្នកវិភាគនយោបាយនៅក្រៅប្រទេស លោក គឹម សុខ ហៅវត្តមានក្រុមគ្រូពេទ្យចិននេះ មិនមែនជាសេណារីយ៉ូដើម្បីដោះស្រាយបញ្ហាប្រឈមរបស់ពលរដ្ឋកម្ពុជាទេ តែថា ជារូបភាពបិទបាំងកំហុសមេដឹកនាំកម្ពុជា ពីការណ្តែតបណ្តោយឱ្យផ្ទុះមេរោគនេះ ក្លាយជាអ្នកចេញមុខជួយសង្គ្រោះបញ្ហាប្រទេសជាតិទៅវិញ ។
លោកថា៖ «វីរុសកូវីដ១៩ ក្លាយជាមធ្យោបាយដែលោក ហ៊ុន សែន ប្រើដើម្បីជួយដោះស្រាយរំដោះគ្រោះកម្ពុជាដោយក្រុមគ្រូពេទ្យចិន ក៏ប៉ុន្តែ អាចទាញយកអ្នកជំនាញយោធា និងចារកម្មចិនដាក់អែបគាត់ ក្នុងរូបភាពល្បាយលាយគ្រូពេទ្យ»។
លោក គឹម សុខ រំឭកថា បើរដ្ឋាភិបាលមានឆន្ទៈចង់ទប់ស្កាត់ជំងឺដ៏កាចសាហាវនេះពិតមែន រដ្ឋាភិបាលនឹងមានវិធានការទប់ស្កាត់លំហូរភ្ញៀវទេសចរដែលមកពីតំបន់ផ្ទុះជំងឺនេះតាំងពីដំបូង រួមទំាងលំហូរភ្ញៀវទេសចរចិនផងដែរ។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា ហៅវត្តមានគ្រូពេទ្យចិនមកកម្ពុជាពេលនេះថា ជាផ្នែកមួយចូលរួមចំណែកទប់ស្កាត់ការរីករាលដាលនៃមេរោគកូវីដ១៩ ព្រោះបានចែករំលែកបទពិសោធន៍ដែលប្រទេសចិនជាប្រភពផ្ទុះជំងឺនេះមុនគេ ហើយពេលនេះចិនអាចទប់ស្កាត់បាន។
លោកថា៖ «យើងក៏សង្ឃឹមថា វត្តមានរបស់គ្រូពេទ្យចិនហ្នឹង អាចជួយចែករំលែកបទពិសោធន៍ ឬក៏ជួយបង្ហាញផ្លូវគ្រូពេទ្យស្រុកខ្មែរយើងហ្នឹង ដើម្បីឆ្លើយតបនឹងកូវីដ១៩ហ្នឹង ទាំងការព្យាបាល ទាំងការទប់ស្កាត់អីផ្សេងៗ»។
ប៉ុន្តែ អ្នកឃ្លាំមើលរូបនេះ ផ្តល់ជាយោបល់ថា កម្ពុជាមិនអាចពឹងតែចិន ហើយភ្លេចស្វែងរកការគាំទ្រពីប្លុកលោកសេរីបានទេ ដើម្បីពង្រឹងគុណភាពសុខាភិបាលឱ្យដល់មូលដ្ឋាននៅទូទាំងប្រទេស ដើម្បីប្រយុទ្ធប្រឆាំងនឹងមេរោគដែលកំពុងរាតត្បាតនេះ ។
អង្គការសុខភាពពិភពលោក (WHO) ធ្លាប់ចេញសារព្រមានពីហានិភ័យសម្រាប់ប្រទេសដែលមានប្រព័ន្ធសុខាភិបាលខ្សោយ បើប្រទេសទាំងនោះគ្មានវិធានការត្រៀមបង្ការទប់ស្កាត់ជាមុន ដើម្បីប្រយុទ្ធប្រឆាំងនឹងជំងឺឆ្លងនេះ ខណៈកូវីដ១៩ បានពង្រីកខ្លួនជាបន្តបន្ទាប់ឆ្លងរីករាលដាលទៅដល់ប្រទេសរាប់រយលើពិភពលោកនោះ។
រដ្ឋមន្ត្រីក្រសួងមហាផ្ទៃ លោក ស ខេង ក្នុងពីធីមួយនៅអាកាសយានដ្ឋានអន្តរជាតិភ្នំពេញ កាលពីថ្ងៃអង្គារម្សិលមិញ បានថ្លែងថា រដ្ឋាភិបាលមិនមានលទ្ធភាពពិនិត្យសុខភាពពលករចំណាកស្រុកមកពីថៃឱ្យបានដិតដល់ទេ ដោយថា អាជ្ញាធរខេត្តជាប់ព្រំដែនគ្មានលទ្ធភាពរកកន្លែងដាក់ពលរដ្ឋ១៥០០០នាក់ សម្រុកមកពីប្រទេសថៃយ៉ាងគំហុក ឱ្យនៅដាច់ដោយឡែករយៈពេល១៤ថ្ងៃនោះទេ។
លោកថា៖ «បញ្ហារបស់យើង ហានិភ័យនៅត្រង់ហ្នឹង នៅពេលគាត់មកសម្រុកមកយើង […] អត់មានលទ្ធភាពឃុំគាត់១៤ថ្ងៃ មានតែត្រួតពិនិត្យ ហើយធ្វើលិខិតស្នាម »។
លោក មឿន តុលា បង្ហាញការព្រួយបារម្ភថា កម្ពុជានឹងប្រឈមខ្លាំងជាងនេះ បើមិនស្វែងរកជំនួយបន្ថែមពីប្លុកលោកសេរីបន្ថែមទៀត ទាំងផ្នែកបច្ចេកទេស និងថវិកានោះ ដោយថា បទពិសោធនៃការបាត់បង់ការទទួលខុសត្រូវលើការពិនិត្យសុខភាពពេញលេញទៅលើពលករ ១៥០០០នាក់ជាមេរៀនដំបូង ។
លោកថា៖ «ខ្ញុំគិតថា បើយើង (រដ្ឋាភិបាល) នៅតែបើកទ្វារសម្រាប់តែចិន ហើយបិទទ្វារសម្រាប់ប្រទេសផ្សេងៗទៀត រឿងនេះប្រហែលជាយើងពិបាកនឹងមានលទ្ធភាពក្នុងការឆ្លើយតបណាស់។ សូម្បីតែចំនួន ១៥០០០នាក់ហ្នឹងជាចំនួនធំទៅហើយ។ អីចឹង បើសិនជាកម្មករខ្មែរយើង ២លាននាក់សម្រុកចេញពីថៃទៀត អាហ្នឹងរឹតតែធ្ងន់ធ្ងរទៀតហើយ»។
ប្រធានសមាគមគ្រូពេទ្យគុណធម៌ លោក អ៊ូច វុទ្ធី មានប្រសាសន៍ថា វត្តមានរបស់គ្រូពេទ្យចិនចំនួន៧នាក់ គ្រាន់តែជាផ្នែកតូចមួយសម្រាប់សម្រាលទុក្ខកម្ពុជាប៉ុណ្ណោះ បើកម្ពុជាខ្វះគ្រូពេទ្យជំនាញសម្រាប់ពង្រាយតាមតំបន់ងាយរងគ្រោះ ខ្វះសម្ភារបរិក្ខារពេទ្យទំនើបៗ រួមទាំងមិនមានលទ្ធភាពរកកន្លែងសម្រាប់ដាក់មនុស្សដែលជាមុខសញ្ញាត្រូវតាមដាន ឱ្យនៅដាច់ដោយឡែក១៤ថ្ងៃ ដើម្បីទប់ស្កាត់ការរីករាលដាលនោះ។
លោកថា៖ «គ្រូពេទ្យចិនគាត់មកជួយអីចឹង វាគ្រាន់តែបានមួយផ្នែកមួយតូចទេ គួរណាយើងបណ្តុះបណ្តាលគ្រូពេទ្យយើងនៅក្នុងស្រុក ក្នុងសហគមន៍តាមមន្ទីរពេទ្យបង្អែក និងតាមមន្ទីរពេទ្យខេត្តអីហ្នឹង ឱ្យគាត់ចេះទាំងអស់គ្នា ព្រោះពេទ្យនេះគាត់មកតែប៉ុន្មាននាក់ គាត់មកតែភ្នំពេញ»។
អ្នកជំនាញរបស់អង្គការសុខភាពពិភពលោក ហៅកាត់ WHO លើកឡើងថា ការចាត់វិធានការបិទប្រទេសមិនឱ្យមានការធ្វើដំណើរចេញចូល ដើម្បីទប់ស្កាត់ការរីករាលដាលនៃមេរោគឆ្លងមិនទាន់គ្រប់គ្រាន់ទេ បើគ្មានវិធានការសុខាភិបាលសាធារណៈរឹងមាំនៅខាងក្នុងដើម្បីត្រៀមទុកជាមុននោះ។
នាយកប្រតិបត្តិអង្គការ WHO ទទួលបន្ទុកកម្មវិធីគ្រាអាសន្ន លោក Mike Ryan ផ្តល់ជាអានុសាសន៍ថា ដើម្បីទប់ស្កាត់ការបន្តចម្លងនៃមេរោគឱ្យមានប្រសិទ្ធភាព ចាំបាច់ត្រូវបន្ថែមវិធានការត្រួតពិនិត្យសុខភាពសាធារណជន ដោយស្វែងរកករណីវិជ្ជមានកូវីដ-១៩ឱ្យអស់ ដើម្បីបញ្ចៀសការចម្លងតៗគ្នាទៀតនៅពេលក្រោយ។
អ្នកជំនាញសុខភាពពិភពលោករូបនេះ បញ្ជាក់ថា៖ «អ្វីដែលយើងពិតជាចាំបាច់ត្រូវធ្វើនោះគឺ ការស្វែងរកអ្នកជំងឺ និងអ្នកដែលផ្ទុកមេរោគកូវីដ-១៩ ហើយដាក់ពួកគេឱ្យនៅដាច់ដោយឡែក បន្ទាប់មក ស្វែងរកអ្នកដែលប៉ះផ្ទាល់ជាមួយអ្នកទាំងនោះ និងដាក់ពួកគេឱ្យនៅដាច់ដោយឡែកដូចគ្នា»។
លោក Ryan បន្ថែមថា ប្រទេសដែលកំពុងរងការរាតត្បាតខ្លាំង គួរយកគំរូវិធានការបស់រដ្ឋាភិបាលចិន សិង្ហបុរី និងកូរ៉េខាងត្បូង ដែលបានអនុវត្តបានដោយជោគជ័យ ក្នុងការប្រយុទ្ធប្រឆាំងនឹងការចម្លងថ្មីៗក្នុងប្រទេស ដោយការស្វែងរកតេស្តជនសង្ស័យឆ្លង បន្ថែមពីលើការបិទការធ្វើដំណើរចេញចូលប្រទេស និងតំបន់ផ្ទុះការរាតត្បាត រួមទាំងការជួបជុំផ្សេងៗ។
ចិនបានប្រកាសពីការធ្លាក់ចុះករណីឆ្លងថ្មីរហូតដល់សូន្យករណីក្នុងរយៈពេលប៉ុន្មានថ្ងៃចុងក្រោយ នៅក្រុងវូហាន ទីដែលវីរុសនេះត្រូវបានរកឃើញដំបូង។
យ៉ាងនេះក្តី លោកនាយករដ្ឋមន្ត្រី ហ៊ុន សែន នៅថ្ងៃពុធនេះ បានបង្ហើបថា រដ្ឋាភិបាលកំពុងពិចារណាថា នឹងស្នើទៅព្រះមហាក្សត្រដើម្បីដាក់ប្រទេសក្នុងគ្រាអាសន្ន ដើម្បីប្រយុទ្ធប្រឆាំងនឹងការរីករាលដាលនៃមេរោគនេះ៕
