លោក ហ៊ុន សែន បានបញ្ជាក់នៅព្រឹកនេះថា កម្ពុជារ៉ាប់រងក្នុងការព្យាបាលជនបរទេសដែលមានផ្ទុកកូវីដ-១៩ត្រូវបានរកឃើញលើទឹកដីកម្ពុជា ដែលផ្ទុយពីវៀតណាមដែលតម្រូវឱ្យអ្នកជំងឺនេះត្រូវចេញប្រាក់ដោយខ្លួនឯង។
លោក ហ៊ុន សែន បានលើកឡើងបានបែបនេះក្នុងជំនួបជាមួយក្រុមគ្រូពេទ្យស្ម័គ្រចិត្តព្យាបាលកូវីដ-១៩ នាព្រឹកថ្ងៃនេះ។
លោកបានថ្លែងថា៖ «នយោបាយនេះគឺប្លែកពីវៀតណាម។ នាយករដ្ឋមន្រ្តីវៀតណាមបានប្រកាសថាជនជាតិបរទេសដែលកើតជំងឺនេះត្រូវចេញលុយព្យាបាលខ្លួនឯង។ កម្ពុជាជាប្រទេសមួយក្រ សូមប្រកាសថា ជនជាតិបរទេសដែលឈឺនៅក្នុងទឹកដីកម្ពុជា ត្រូវទទួលបានការព្យាបាលពីសំណាក់គ្រូពេទ្យកម្ពុជាដោយមិនបង់ថ្លៃ។»
លោក ហ៊ុន សែន ថានេះជាកាតព្វកិច្ចរបស់កម្ពុជាក្នុងឋានៈជាម្ចាស់ផ្ទះ។
គិតត្រឹមម៉ោង១០ព្រឹកថ្ងៃទី២៥ ខែមីនា កម្ពុជារកឃើញអ្នកផ្ទុកកូវីដ-១៩ ចំនួន៩៣ករណី ដែលក្នុងនោះរកឃើញលើជនជាតិខ្មែរ៣៥នាក់ បារាំង៣៦នាក់ ម៉ាឡេស៊ី១២នាក់ អង់គ្លេស៥នាក់ កាណដា១នាក់ ចិន១នាក់ ប៊ែលហ្ស៊ិក១ និងអាមេរិក២នាក់។ ក្រសួងបញ្ជាក់ថាក្នុងចំណោមអ្នករកឃើញកូវីដ-១៩ ទាំងនោះមាន៦នាក់ត្រូវបានព្យាបាលជាសះស្បើយហើយ៕
