លោកនាយករដ្ឋមន្ត្រី ហ៊ុន សែន អំពាវនាវកុំឱ្យពលរដ្ឋមានការព្រួយបារម្ភ ដោយថា រដ្ឋាភិបាលនឹងប្រើច្បាប់អាជ្ញាសឹក ឬហៅថា «ដាក់ប្រទេសក្នុងគ្រាមានអាសន្ន» តែក្នុងករណីចាំបាច់ប៉ុណ្ណោះ ដើម្បីទប់ស្កាត់ការរីករាលដាលនៃជំងឺរលាកផ្លូវដង្ហើមថ្មី ហៅកូវីដ១៩ ។
ពីមន្ទីររដ្ឋសភា នាថ្ងៃចន្ទនេះ លោក ហ៊ុន សែន ថ្លែងថា ច្បាប់នេះនឹងត្រូវព្រះមហាក្សត្រឡាយព្រះហស្តលេខាដាក់ឱ្យប្រើប្រាស់ឆាប់ៗក្នុងស្ថានភាពប្រញាប់ ក្រោយពីរដ្ឋសភា និងព្រឹទ្ធសភាយល់ព្រម។
មេដឹកនាំរូបនេះថ្លែងទៀតថា ច្បាប់អាជ្ញាសឹកនេះ នឹងចាប់អនុវត្តកំឡុងពេលដែលសមត្ថកិច្ច មានកម្លាំងនរគបាល អាវុធហត្ថ គ្រប់គ្រងស្ថានការណ៍លែងបាន ។
លោកថា៖ «សូមប្រជាពលរដ្ឋរបស់យើងកុំមានការព្រួយបារម្ភអំពីច្បាប់នេះ ហើយខ្ញុំមិនចង់ប្រើច្បាប់នេះទេ គ្រាន់តែចង់ឱ្យមាននៅក្នុងដៃ ទាល់តែសភាពការណ៍ត្រួតត្រាលែងបាន ទើបយើងប្រកាសច្បាប់នេះក្នុងគ្រាមានអាសន្ន»។
យ៉ាងនេះក្តី លោក ហ៊ុន សែន អះអាងថា ការធ្វើច្បាប់នេះ មិនមែនជាចំណាត់ការបង្ក្រាបសំឡេងប្រឆាំងដូចអ្នកវិភាគមួយចំនួនបានលើកឡើងនោះទេ។
ការឆ្លងរីករាលដាលនៃមេរោគកូវីដ១៩ ត្រូវបានរដ្ឋាភិបាលប្រកាសបិទទិដ្ឋាការភ្ញៀវបរទេសបណ្តោះអាសន្នរយៈពេល១ខែ បិទរោងភាពយន្ត រង្គសាល ខារ៉ាអូខេ និងកាស៊ីណូ នៅទូទាំងប្រទេសផងដែរ ក្រោយពីក្រសួងសុខាភិបាលរកឃើញអ្នកផ្ទុកកូវីដ១៩កើនឡើងបន្តបន្ទាប់ ដែលគិតត្រឹមព្រឹកថ្ងៃចន្ទនេះ អ្នកផ្ទុកមាន ១០៧នាក់ហើយ៕
