រដ្ឋាភិបាលបានចេញសេចក្តីណែនាំមួយដោយស្នើទៅម្ចាស់អគារ និងម្ចាស់ទីតាំងទាំងអស់ កុំឱ្យបញ្ឈប់កិច្ចសន្យា ឬបណ្តេញអ្នកជួលចេញ ខណៈដែលអ្នកជួលទាំងនោះពុំមានលទ្ធភាពបង់ថ្លៃសេវាជួលបានទាន់ពេលវេលា ដោយសារបញ្ហាផលប៉ះពាល់នៃជំងឺកូវីដ១៩។
ក្នុងសេចក្តីប្រកាសព័ត៌មានមួយចុះថ្ងៃទី៣១ ខែមីនានេះ រដ្ឋាភិបាលបានលើកឡើងថា មានវិស័យឯកជនជាច្រើនបានបង្ហាញពីកង្វល់ចំពោះការធានាប្រក្រតីភាពនៃការជួលអគារ-ទីតាំងអាជីវកម្ម និងរោងចក្រនានាដោយសារពួកគេពុំមានលុយគ្រប់គ្រាន់សម្រាប់បង់សង។
រដ្ឋាភិបាលក៏បានស្នើទៅម្ចាស់អគារ ទីតាំងអាជីវកម្ម និងម្ចាស់ទីតាំងរោងចក្រនានា ត្រូវចរចាគ្នាជាមួយអ្នកជួលលើការពន្យារពេលបង់ថ្លៃសេវាជួល និងបញ្ចុះថ្លៃសេវាជួលជាដើម៕
