ក្រសួងពាណិជ្ជកម្មបានសម្រេចបញ្ចុះតម្លៃប្រេងឥន្ធនៈមកត្រឹម ២៣៥០រៀលក្នុងមួយលីត្រ ស្របតាមទីផ្សារអន្តរជាតិ និងការអន្តរាគមន៍របស់រដ្ឋាភិបាល។
ក្នុងសេចក្តីជូនដំណឹងរបស់ក្រសួងពាណិជ្ជកម្មចេញផ្សាយនៅថ្ងៃនេះថា ផ្អែកតាមតម្លៃប្រេងឥន្ធនៈលើទីផ្សារអន្តរជាតិ ថ្លៃលក់រាយនៅកម្ពុជាចាប់ពីថ្ងៃទី១ ខែមេសា ដល់ថ្ងៃទី១៥ ខែដដែលនេះ គឺក្រុមហ៊ុននឹងត្រូវលក់ ២៥៣៤រៀលក្នុងមួយលីត្រ សំរាប់សាំងធម្មតា EA92 និង ២៦១៣រៀលក្នុងមួយលីត្រ សំរាប់ប្រេងម៉ាស៊ូត។
ប៉ុន្តែ ដើម្បីសម្រួលដល់ជីវភាពរស់នៅរបស់ប្រជាជន និងដោយមានការរួមចំណែកពីក្រុមហ៊ុនចែកចាយប្រេងឥន្ធនៈនៅកម្ពុជា លោកនាយករដ្ឋមន្ត្រី ហ៊ុន សែន បានសម្រេចបញ្ចុះតម្លៃលក់រាយចំនួន ៤សេនក្នុងមួយលីត្រ។
និយាយជារួម ប្រេងឥន្ធនៈដែលត្រូវលក់ចាប់ពីថ្ងៃទី១ ខែមេសា ដល់ថ្ងៃទី១៥ ខែដដែលនេះ នឹងចុះមក ២៣៥០រៀលក្នុងមួយលីត្រ សំរាប់សាំងធម្មតា EA92 និង ២៤៥០រៀលក្នុងមួយលីត្រ សំរាប់ប្រេងម៉ាស៊ូត៕
