មន្ត្រីជាន់ខ្ពស់ក្រសួងការងារ អះអាងថា រដ្ឋាភិបាលកំពុងពិនិត្យឡើងវិញ ចំពោះការតម្រូវឱ្យថៅកែរោងចក្របើកប្រាក់ ៤០ភាគរយឱ្យកម្មករ ក្នុងអំឡុងពេលព្យួរការងារ។
ការអះអាងរបស់ក្រសួងការងារនេះ ធ្វើឡើងបន្ទាប់ពីអគ្គលេខាធិការសមាគមរោងចក្រកាត់ដេរនៅកម្ពុជា ហៅកាត់ថា GMAC លោក ខេន លូ លើកឡើងកាលពីម្សិលមិញថា ថៅកែមិនមានលទ្ធភាពបើកប្រាក់ ៤០ ភាគរយឱ្យកម្មករ ពេលព្យួរការងារតាមការណែនាំរបស់លោកនាយករដ្ឋមន្ត្រី ហ៊ុន សែន នោះទេ។
អ្នកនាំពាក្យក្រសួងការងារ លោក ហេង សួរ ប្រាប់វីអូឌីតាមប្រព័ន្ធតេឡេក្រាមនៅថ្ងៃនេះថា ក្រសួងកំពុងពិនិត្យឡើងវិញពីការតម្រូវឱ្យថៅកែរោងចក្របើកប្រាក់ ៤០ភាគរយឱ្យកម្មករ អំឡុងពេលព្យួរការងារ។ ដោយឡែក ប្រាក់ ២០ភាគរយវិញ លោកថា រដ្ឋាភិបាលនៅតែផ្ដល់ឱ្យកម្មករដដែល។
លោក ហេង សួរ ប្រាប់វីអូឌីតាមប្រព័ន្ធតេឡេក្រាមថា៖ «រដ្ឋាភិបាល (MEF និង MLVT) នឹងពិនិត្យមើលភស្តុតាងនៃការលុបចោលបទបញ្ជា។ រដ្ឋាភិបាលបានរួមចំណែករួច [២០ភាគរយ] ហើយ។ ហើយអ្វីដែលនៅសល់គឺអាស្រ័យលើកម្មករ និងនិយោជិកមានទំនាក់ទំនងគ្នា។ វាគឺជាដំណើរការទូទៅមួយ»។
កាលពីថ្ងៃទី២៤ ខែកុម្ភៈ លោក ហ៊ុន សែន ប្រកាសថា នៅពេលរោងចក្រព្យួរការងារកម្មករនោះ លោកថា កម្មករនឹងទទួលបានប្រាក់ឈ្នួល ៦០ភាគរយនៃប្រាក់ខែគោលរបស់ពួកគេ ក្នុងនោះ ថៅកែរោងចក្រត្រូវទទួលបន្ទុកបើកឱ្យកម្មករ ៤០ភាគរយ និងរាជរដ្ឋាភិបាលចូលរួមចំណែក ២០ភាគរយ។
ប្រធានសហភាពការងារកម្ពុជា លោក អាត់ ធន់ ស្នើទៅរដ្ឋាភិបាលជួយអន្តរាគមន៍ ដោយធ្វើយ៉ាងណាឱ្យកម្មករទទួលបានប្រាក់ ៦០ភាគរយ ដើម្បីឱ្យពួកគេមានប្រាក់សម្រាប់ដោះស្រាយបញ្ហាជីវភាពគ្រួសារ ក្នុងអំឡុងពេលព្យួរការងារ។ លោកបន្តថា ប្រសិនបើមិនមានដំណោះស្រាយទេ លោកថា កម្មករនឹងរងផលប៉ះពាល់ខ្លាំង ហើយផលប៉ះពាល់របស់កម្មករនេះ នឹងជះឥទ្ធិពលទៅលើរដ្ឋាភិបាលផងដែរ។
លោកថា៖ «៦០% ត្រឹមតែ ១២០ដុល្លារទេ នៅគាត់ជួលផ្ទះ នៅគាត់បាយទឹក ហ្នឹងមិននិយាយរឿងបង់ធនាគារ ឬតម្រូវការសង្គមផ្សេងៗ។ អ៊ីចឹង បើឱ្យនិយោជកអ្នកសម្រេចនោះ និយោជកខ្លះបង់ និងខ្លះទៀតអត់បង់ អ៊ីចឹងមានវិបត្តិហើយ។ វិបត្តិ គឺកម្មករអត់មានលុយចាយ មានការតវ៉ា ជម្លោះគ្នាអ៊ីចឹងទៅ។ រាល់ថ្ងៃមិនមានជម្លោះ ដោយសារ រដ្ឋាភិបាលចេញគោលការណ៍ហ្នឹង [ឱ្យប្រាក់ ៦០ភាគរយ] កុំអីតវ៉ា [កម្មករ] ទាមទារច្រើនជាងហ្នឹងបាត់ហើយ»។
លោក អាត់ ធន់ ថ្លែងថា លោកមិនទាន់បានដឹងពីដំណើរការពិនិត្យឡើងវិញលើគោលការណ៍នេះដល់ណា ហើយក៏មិនទទួលបានការកោះប្រជុំពីក្រសួងការងារដើម្បីពិភាក្សាលើបញ្ហានេះដែរ។
សមាគមរោងចក្រកាត់ដេរនៅកម្ពុជា ឱ្យដឹងថា ចាប់តាំងពីផ្ទុះជំងឺកូវីដ-១៩ រោងចក្រជិត ៨០ បានដាក់ពាក្យស្នើសុំព្យួរការងារ ដោយសារ គ្មានវត្ថុធាតុដើមសម្រាប់ផលិត ដែលធ្វើប៉ះពាល់កម្មករប្រហែល ៣ម៉ឺននាក់។ លោកបន្តថា ផលប៉ះពាល់ដោយសារ ជំងឺកូវីដ-១៩ នេះ ក៏បានធ្វើឱ្យអ្នកបញ្ជាទិញមួយចំនួន ផ្អាកទទួលទំនិញដែលបានផលិតរួចពីកម្ពុជាផងដែរ៕
