សមត្ថកិច្ចខេត្តព្រៃវែង នៅថ្ងៃម្សិលមិញ បានចុះណែនាំដល់មន្ទីរសម្រាកព្យាបាល និងឱសថការីឯកជនទាំងអស់ដែលប្រកបអាជីវកម្មក្នុងខេត្តព្រៃវែង កុំឱ្យមានការលក់ឡើងថ្លៃសម្ភារ ដូចជា ម៉ាស់ អាល់កុល ជែលលាងដៃ ខណៈដែលបច្ចុប្បន្ន សម្ភារទាំងនោះកំពុងមានតម្រូវការខ្ពស់។ នេះបើតាមការចុះផ្សាយរបស់អគ្គស្នងការនគរបាលជាតិ។
អគ្គស្នងការនគរបាលជាតិ ឱ្យដឹងទៀតថា សមត្ថកិច្ចក៏បានណែនាំឱ្យមន្ទីរសម្រាកព្យាបាល និងឱសថការីឯកជនទាំងអស់ ត្រូវលក់ផលិតផល ឬសម្ភារណាដែលមានប្រភពច្បាស់លាស់ និងមានគុណភាពល្អ រួមទាំងអប់រំប្រជាពលរដ្ឋកុំឱ្យជួបជុំគ្នាក្នុងករណីមិនចាំបាច់ ហើយត្រូវលាងដៃនឹងសាប៊ូ អាល់កុល ជែល និងពាក់ម៉ាស់ការពារ ជាដើម។
កាលពីថ្ងៃទី២៥ ខែមីនា លោកនាយករដ្ឋមន្ត្រី ហ៊ុន សែន បានព្រមានរឹបអូសម៉ាស់ និងបិទឱសថស្ថានណាដែលលក់ម៉ាស់ឱ្យពលរដ្ឋថ្លៃ ខណៈតម្រូវការម៉ាស់ និងសម្ភារ ដើម្បីការពារជំងឺកូវីដ១៩ នាពេលបច្ចុប្បន្នមានការកើនឡើងខ្ពស់នោះ៕
