ពលរដ្ឋ និងអាជីវករមួយចំនួននៅតាមតំបន់ព្រំដែនកម្ពុជា-វៀតណាម បារម្ភខ្វះបន្លែបរិភោគ និងប៉ះពាល់ដល់ជីវភាពរបស់ពួកគាត់ នៅពេលប្រទេសទាំងពីរសម្រេចបិទច្រកព្រំដែនបណ្តោះអាសន្ន ដើម្បីការពារការឆ្លងរាលដាលមេរោគកូវីដ១៩។
អាជីវករ អ្នកស្រី ប៉ាក យឿន នៅស្រុកកោះធំ ខេត្តកណ្តាល និយាយថា ប្រហែលជាមួយសប្តាហ៍ចុងក្រោយនេះ វៀតណាមបិទច្រកនៃប្រទេសទាំងពីរបណ្តោះអាសន្ន ដោយមិនឱ្យប្រជាពលរដ្ឋឆ្លងកាត់ចូលទឹកដីទៅវិញទៅមកនោះទេ។ អ្នកស្រីថា ពីមុនគាត់អាចឆ្លងចូលទឹកដីវៀតណាមដើម្បីទិញបន្លែយកមកលក់បន្ត ប៉ុន្តែ ពេលនេះ មិនអាចឆ្លងទៅបានទេ គឺអាជីវករវៀតណាមជាអ្នកដឹកបន្លែចូលទឹកដីកម្ពុជា តាមចំនួន និងទីតាំងកំណត់ធ្វើឱ្យបន្លែមួយចំនួនឡើងថ្លៃ។
អាជីវកររូបនោះនិយាយថា៖ «មិនសូវជាល្អដូចយើងទៅរើសខ្លួនឯងទេ គេដាក់យកមកឱ្យយើងចឹង បើយើងទៅរើសខ្លួនឯង យើងបានតថ្លៃគេ ហើយបានបន្លៃល្អជាង»។
អាជីវករម្នាក់ទៀត សែម ភា និយាយថា បើកម្ពុជា-វៀតណាម បិទច្រកព្រំដែនដោយមិនអនុញ្ញាតឱ្យនាំបន្លែវៀតណាមចូលចរាចរនៅក្នុងប្រទេសកម្ពុជាទេ នឹងធ្វើឱ្យប្រជាពលរដ្ឋខ្មែរជួបបញ្ហាប្រឈមខ្វះបន្លែបរិភោគជាដើម។
អាជីវករនិយាយថា៖ «បើសិនជាវៀតណាមបិទការនាំចូលបន្លែ ខ្មែរយើងដាំហូបអត់គ្រប់គ្រាន់ក្នុងប្រទេស ដោយសារខ្មែរយើងអត់មានគ្រប់មុខ ដូចថា គាត់ដាំដែរ តែដាំតែស្ពៃក្រញាញ់ ស្ពៃចង្កឹះ ស្ពៃតឿ ហើយនិងខ្ទឹម វៀតណាមកម្ម៉ង់អ្វី មានហ្នឹង ហើយខ្មែយើងកម្ម៉ង់អត់បានទេ ដូចថា គាត់មានស៊ុប មានការ មានកម្មវិធីជប់លៀងអ្វីផ្សេងៗ បើយើងចង់កម្ម៉ង់យកតាមហូប តាមកម្ម៉ង់អញ្ចឹងអត់មានទេរបស់ខ្មែរ»។
ចំណែកប្រជាពលរដ្ឋនៅស្រុកមេមត់ ខេត្តត្បូងឃ្មុំ លោក ញាញ់ ចំរើន មានប្រសាស៍ កន្លងមក នៅស្រុករបស់លោកមានជនជាតិវៀតណាមដឹកបន្លែតាមច្រករបៀងឈ្មោះ ស្រែតានង ភូមិតានង ឃុំចាន់មួល ស្រុមេមត់ ដើម្បីយកមកលក់ឱ្យប្រជាពលរដ្ឋខ្មែរជារៀងរាល់ថ្ងៃ ប៉ុន្តែ លោកថា ក្រោយពីរដ្ឋាភិបាលប្រកាសបិទច្រកព្រំដែននោះ វៀតណាមឈប់នាំបន្លែលក់ឱ្យពលរដ្ឋខ្មែរ ជាហេតុធ្វើឱ្យពួកគេជួបបញ្ហាប្រឈមច្រើនក្នុងជីវភាពគ្រួសារ ដែលត្រូវចំណាយលុយលើសពីមុនចាប់ពី ៥០០០រៀលឡើង ទើបទិញម្ហូបទុកបរិភោគបានមួយថ្ងៃគ្រប់គ្រាន់។
ទោះជាបែបនេះក្តី លោកស្នើទៅរដ្ឋាភិបាលជួយអន្តរាគមន៍ធ្វើយ៉ាងណាបង្រៀនប្រជាកសិករខ្មែរឱ្យចេះវិធីដាំបន្លែ ដើម្បីទ្រទ្រង់ជីវភាពគ្រួសារឱ្យបានប្រសើរឡើងវិញ។
លោកអំពាវនាវដូចនេះថា៖ «អ្វីដែលខ្ញុំសំណូមពរ [មន្ត្រីរដ្ឋាភិបាល] គួរតែបញ្ជូនគ្រូដែលបណ្តុះបណ្តាលផ្នែកកសិកម្ម ឱ្យទៅចូលរួមបណ្តុះបណ្តាលកសិករយើងឱ្យចេះដាំដុះច្រើន កុំឱ្យពឹងទៅលើកសិករចំនួនតិច ឬក៏ស្រុកក្រៅអញ្ចឹង ឱ្យគាត់ចេះដាំដុះខ្លួនឯង ហើយបង្កើតទីផ្សារមួយសំរាប់ផ្គត់ផ្គង់ក្នុងស្រុករបស់យើង វាប្រសើរសំរាប់ស្រុករបស់យើង»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ពន្យល់ថា ភាគីទាំងពីរបានព្រមព្រៀងគ្នាឱ្យដោះដូរទំនិញ និងបន្លែ សាច់គ្រប់មុខដូចសព្វដង។ លើកលែងតែអាជីវករកម្ពុជា និងអាជីវករវៀតណាម ទៅទិញបន្លែ និងសាច់ខ្លួនឯង គឺអាជ្ញាធរព្រំដែនមិនអនុញាតឱ្យនាំចេញចូលដូចមុននោះទេ។
ទោះជាយ៉ាងនេះក្តី រដ្ឋមន្ត្រីរូបនោះលើកទឹកចិត្តដល់ប្រជាកសិករខ្មែរ ដែលមានបំណងធ្វើកសិកម្មពិតប្រាកដ ត្រូវបង្កើតជាសហគមន៍ ហើយធ្វើសំណើទៅស្ថាប័នសាម៉ី ដើម្បីឱ្យគាត់ជួយបណ្តុះបណ្តាលជំនាញដាំដុះ ចិញ្ចឹមសត្វ និងរកទីផ្សារជូនពួកគេជាដើម។
លោកលើកទឹកចិត្តដូចនេះថា៖ «ទំនាក់ទំនងស្នើមក ស្នើសុំមន្ទីរកសិកម្មថា សហគមន៍កសិកម្មរបស់ខ្ញុំបានបង្កើតហើយនៅថ្ងៃនេះៗ ហើយសុំឱ្យលោកប្រធានមន្ទីរគាត់ជួយធ្វើការរៀបចំពង្រឹងសហគមន៍កសិកម្មតាមរយៈការដាំដុះ ឬចិញ្ចឹមសត្វ ឱ្យសហគមន៍បង្ហាញមក គាត់ចង់ធ្វើអ្វី ហើយមន្ទីរណាមិនជួយ ប្រាប់ខ្ញុំ»។
អគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា បើរដ្ឋាភិបាលមិនយកចិត្តទុកដាក់បណ្តុះបណ្តាលដល់ប្រជាកសិករផ្នែកបច្ចេកទេស និងផ្តល់គ្រាប់ពូជដល់ពួកគាត់ទេ នឹងធ្វើឱ្យកម្ពុជាជួបវិបត្តិសេដ្ឋកិច្ចនៅថ្ងៃខាងមុខ។
លោកមានប្រសាសន៍ថា៖ «ខ្ញុំគិតថា បើសិនជាអត់ទេ ខ្ញុំគិតថា កង្វះគ្រឿងឧបភោគបរិភោគ ហើយនិងបញ្ហាទំនិញឡើងថ្លៃ វាធ្វើឱ្យជីវភាព ហើយនិងកង្វះស្បៀងរបស់ប្រជាពលរដ្ឋវាកាន់តែកើនឡើង ហើយខណៈដែលចំណូលរបស់ប្រជាពលរដ្ឋមិនអាចរកចំណូលបានទេ ដោយសារតែដំណាក់កាលនៃការរីករាលដាលនៃជំងឺកូវីដ-១៩»។
កាលពីថ្ងៃទី១៨ ខែមីនា ឆ្នាំ២០២០ វៀតណាមបានប្រកាសបិទព្រំដែនជាមួយកម្ពុជា ហើយនៅថ្ងៃទី២០ ខែមីនា គឺ២ថ្ងៃបន្ទាប់មក កម្ពុជាសម្រេចបិទព្រំដែនជាមួយវៀតណាមវិញ ក្រោមហេតុផលទប់ស្កាត់ជំងឺកូវីដ-១៩។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បង្ហាញថា កម្ពុជាបានចំណាយថវិកាខ្ទង់ ២០០លានដុល្លារអាមេរិកក្នុង១ឆ្នាំៗ ទៅលើការនាំចូលបន្លែពីបរទេសដើម្បីផ្គត់ផ្គង់តម្រូវការក្នុងស្រុក។ ក្រសួងថា បន្លែនាំចូលទាំងនោះ ភាគច្រើននាំចូលពីប្រទេសវៀតណាម និងប្រទេសចិន។
បើតាមរបាយការណ៍ក្រសួងដដែលនេះ កម្ពុជាត្រូវការបន្លែប្រមាណពី ៥០០ទៅ ៦០០តោនក្នុងមួយថ្ងៃៗ ក្នុងនោះនៅដើមឆ្នាំនេះ កម្ពុជានាំចូលប្រមាណ ៣០ភាគរយ បន្ទាប់ពីបរិមាណនៃការនាំចូលបន្លែពីបរទេសចូលមកកម្ពុជា បានកើនឡើងដល់ទៅ ៥០ភាគរយកាលពីពាក់កណ្ដាលឆ្នាំមុន។
អំឡុងខែកញ្ញា ឆ្នាំ២០១៧ អង្គការ USAID របស់អាមេរិក បានបង្ហាញរបាយការណ៍ថា ពលរដ្ឋកម្ពុជាជាង ៧០ភាគរយ កំពុងប្រកបរបរកសិកម្ម ប៉ុន្តែ កសិករអាចដាំបន្លែបានតែ ១ភាគ៣ នៃតម្រូវការទីផ្សារ ដោយសារបញ្ហាផ្សេងៗ៕
