លោកនាយករដ្ឋមន្ត្រី ហ៊ុន សែន បានស្នើទៅប្រធានព្រឹទ្ធសភាបើកការប្រជុំពិសេស ដើម្បីប្រញាប់ពិនិត្យ និងអនុម័តលើសេចក្តីព្រាងច្បាប់ស្តីពីការដាក់ប្រទេសក្នុងគ្រាមានអាសន្ន ដោយបញ្ជាក់ថា ច្បាប់នេះជាតម្រូវការចាំបាច់។
នៅក្នុងលិខិតមួយច្បាប់របស់លោកនាយករដ្ឋមន្ត្រី ហ៊ុន សែន ផ្ញើទៅប្រធានព្រឹទ្ធសភា លោក សាយ ឈុំ កាលពីម្សិលមិញ បានលើកឡើងថា នៅពេលនេះ ព្រឹទ្ធសភាស្ថិតនៅក្នុងពេលវិស្សមកាលនៅឡើយ ប៉ុន្តែដោយសារតម្រូវការចាំបាច់នៃច្បាប់នេះ ទើបស្នើឱ្យមានការកោះប្រជុំវិសាមញ្ញ។
លិខិតលោក ហ៊ុន សែន៖ «សូមសម្តេចវិបុលសេនាភក្តីប្រធានព្រឹទ្ធសភា មេត្តាកោះប្រជុំព្រឹទ្ធសភាវិសាមញ្ញ ដើម្បីពិនិត្យហើយឱ្យយោបល់លើសេចក្តីព្រាងច្បាប់នេះ បន្ទាប់ពីរដ្ឋសភាពិនិត្យ និងអនុម័តរួច និងបញ្ជូនដល់ដៃព្រឹទ្ធសភាដោយអនុគ្រោះ»។
លោកនាយករដ្ឋមន្ត្រីធ្លាប់អំពាវនាវកុំឱ្យពលរដ្ឋព្រួយបារម្ភចំពោះការដាក់ប្រទេសក្នុងគ្រាមានអាសន្នដែលត្រូវដកហូតសិទ្ធិមួយចំនួនរបស់ពលរដ្ឋ លោកថា ច្បាប់នេះគ្រាន់តែបង្កើតឱ្យនៅក្នុងដៃតែប៉ុណ្ណោះ មិនដាក់ប្រើភ្លាមៗទេបើគ្មានការចាំបាច់៕