អគ្គស្នងការនគរបាលជាតិ បញ្ជាទៅសមត្ថកិច្ចទាំងអស់ទប់ស្កាត់ដោយមិនឱ្យមានប្រជាពលរដ្ឋជួបជុំកម្សាន្ដនៅទីសាធារណៈ ក្នុងឱកាសបុណ្យចូលឆ្នាំប្រពៃណីខ្មែរខាងងមុខ ដើម្បីការពារកុំឱ្យមានការឆ្លងជំងឺកូវីដ-១៩។
ក្នុងសេចក្ដីប្រកាសព័ត៌មានរបស់អគ្គស្នងការដ្ឋាននគរបាលជាតិចុះថ្ងៃទី៣ ខែមេសា ឆ្នាំ២០២០ ឱ្យដឹងថា ប្រជាពលរដ្ឋអាចធ្វើការជួបជុំគ្នាជាលក្ខណៈគ្រួសារតូចៗនៅក្នុងគេហដ្ឋានបាន ប៉ុន្តែ ការប្រមូលផ្ដុំជួបជុំរៀបចំកម្មវិធីកម្សាន្ដតាមបែបប្រពៃណី ពិធីជប់លៀងរាំកម្សាន្ដនៅតាមទីសាធារណៈ និងសហគមន៍ មិនត្រូវបានអនុញ្ញាតឡើយ។
សេចក្ដីប្រកាសដដែលថា ការដែលសមត្ថកិច្ចមិនអនុញ្ញាតឱ្យប្រមូលផ្ដុំ ជួបជុំ ក្នុងឱកាសបុណ្យចូលឆ្នាំប្រពៃណីខ្មែរខាងមុខនេះ ដើម្បីទប់ស្កាត់ការឆ្លងជំងឺកូវីដ-១៩។
ក្រៅពីមិនអនុញ្ញាតឱ្យជួបជុំនេះ អគ្គស្នងការនគរបាលជាតិ បានណែនាំទៅអាជ្ញាធរមូលដ្ឋានឱ្យតាមដានស្ថានភាពពលករចំណាកស្រុកដែលវិលត្រឡប់មកពីក្រៅប្រទេស ដើម្បីបន្តអប់រំ និងតាមដានការអនុវត្តសេចក្ដីណែនាំរបស់ក្រសួងសុខាភិបាល ក្នុងការបង្ការ ទប់ស្កាត់ការឆ្លងរាតត្បាតជំងឺកូវីដ-១៩ បើរកឃើញពលរដ្ឋណាម្នាក់មានការសង្ស័យ ឬមានសញ្ញាផ្ទុកជំងឺកូវីដ-១៩នោះ សមត្ថកិច្ចពាក់ព័ន្ធនឹងមានវិធានការសង្គ្រោះ។
កាលពីថ្ងៃទី៣០ ខែមីនា ឆ្នាំ២០២០ លោកនាយករដ្ឋមន្ត្រី ហ៊ុន សែន ថ្លែងថា កម្ពុជាមិនអាចប្រមូលពលករជាង ៥ម៉ឺននាក់ ដែលត្រឡប់មកពីក្រៅប្រទេស មកទុកដាច់ដោយឡែកបានទេ ប៉ុន្តែ លោកបញ្ជាទៅមន្ត្រីគ្រប់ជាន់ថ្នាក់ ត្រូវពិនិត្យគ្រប់គ្រងគោលដៅនៅតាមភូមិទាំងអស់ ដែលមានពលរដ្ឋមកពីប្រទេសថៃ ឬមកពីប្រទេសក្រៅផ្សេងទៀត។
