ក្រសួងសេដ្ឋកិច្ចបានសម្រេចបង្កើតក្រុមការងារចំពោះកិច្ច ដើម្បីពិនិត្យ តាមដាន និងគ្រប់គ្រងថ្លៃទំនិញយុទ្ធសាស្ត្រក្នុងអំឡុងពេលប្រយុទ្ធប្រឆាំងជំងឺកូវីដ-១៩។
សេចក្តីសម្រេចរបស់ក្រសួងសេដ្ឋកិច្ច និងហិរញ្ញវត្ថុ ចេញថ្ងៃទី៣ ខែមេសា បានឱ្យដឹងថា ក្រុមការងារចំពោះកិច្ចនេះ បង្កើតឡើងក្នុងគោលបំណងជួយគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រក្នុងអំឡុងពេលប្រយុទ្ធប្រឆាំងជំងឺកូវីដ-១៩ ដើម្បីសម្រួលដល់ជីវភាពប្រចាំថ្ងៃជូនប្រជាពលរដ្ឋ។ តាមក្រសួងសេដ្ឋកិច្ច ទំនិញយុទ្ធសាស្ត្រទាំងនោះរួមមាន អង្ករ អំបិល បន្លែ ត្រី សាច់ ម៉ាស អាល់កុល ថ្នាំពេទ្យ ឧបករណ៍វេជ្ជសាស្ត្រ។ ក្រុមការងារនេះមានភារកិច្ចពិនិត្យ និងតាមដានពីតម្រូវការ និងការផ្គត់ផ្គង់ កំណត់ និងតាមដានជាប្រចាំអ្នកផ្គត់ផ្គង់ និងធានាថា ការផ្គត់ផ្គង់ទំនិញយុទ្ធសាស្រ្តមានដំណើរប្រកបដោយនិរន្តភាពដោយគ្មានការបង្អាក់ ឬរំខាន។ ក្រៅពីនេះ ក្រុមការងារនេះក៏មានតួនាទីវាយតម្លៃ និងត្រួតពិនិត្យលើគុណភាពទំនិញយុទ្ធសាស្រ្តលើទីផ្សារឱ្យស្ថិតក្នុងតម្លៃសមរម្យ។
ក្នុងសេចក្តីសម្រេចដដែលបញ្ជាក់ថា ក្រុមការងារចំពោះកិច្ចនោះ មានរដ្ឋលេខាក្រសួងសេដ្ឋកិច្ច លោក ជូ វិជិត្ត ធ្វើជាប្រធាន ដោយមានសមាជិក ២១នាក់ មកពីស្ថាប័នមួយចំនួនរួមមាន ក្រសួងសេដ្ឋកិច្ច ក្រសួងសុខាភិបាល ក្រសួងកសិកម្ម ក្រសួងឧស្សាហកម្ម វិទ្យាសាស្ត្របច្ចេកវិទ្យា និងអនុវត្តន៍ រួមទាំងស្ថាប័នពាក់ព័ន្ធផ្សេងៗទៀតជាដើម។
លើសពីនេះទៀត ក្រុមការងារនេះអាចសុំកិច្ចសម្របសម្រួល និងសហប្រតិបត្តិការពីគ្រប់ក្រសួង-ស្ថាប័នពាក់ព័ន្ធរបស់រាជរដ្ឋាភិបាល ដៃគូអភិវឌ្ឍន៍ និងផ្នែកឯកជនផងដែរ៕
