អាជ្ញាធរខេត្តស្រះកែវបានចេញសេចក្តីប្រកាសហាមមិនឱ្យមានការដឹកពលករបរទេសចូលទៅក្នុងទឹកដីថៃ ដោយសារតែស្ថានការណ៍ការឆ្លងរីករាលដាលនៃជំងឺកូវីដ១៩ មានករណីអ្នកប៉ះពាល់ អ្នកឆ្លងជំងឺកើនឡើងកាន់តែច្រើន។
ក្នុងសេចក្តីប្រកាសរបស់អាជ្ញាធរខេត្តស្រះកែវ ចេញកាលពីថ្ងៃទី៥ ខែមេសា ម្សិលមិញ អាជ្ញាធរខេត្តនេះហាមមធ្យោបាយដឹកជញ្ជូនសាធារណៈ និងឯកជនគ្រប់ប្រភេទដឹកពលករបរទេសចូលមកកាន់ទឹកដីថៃដាច់ខាត។ អាជ្ញាធរខេត្តនេះបានលើកឡើងថា ក្នុងករណីល្មើសសេចក្តីប្រកាសនេះ ជនល្មើសអាចមានទោសជាប់ពន្ធនាគាររយៈពេលមិនលើសពី ១ឆ្នាំ ឬពិន័យជាប្រាក់មិនលើសពី ១សែនបាត ឬទាំងជាប់ពន្ធនាគារ និងពិន័យជាប្រាក់។ ប្រភពដដែលឱ្យដឹងថា ការហាមប្រាមនេះមានសុពលភាពចាប់ពីថ្ងៃប្រកាសរហូតដល់ថ្ងៃប្រកាសឱ្យដកចេញ។
សេចក្តីប្រកាសដដែលបានឱ្យដឹងថា ការហាមឃាត់នេះធ្វើឡើងក្នុងគោលបំណងការពារ និងគ្រប់គ្រងការរីករាលដាលនៃជំងឺកូវីដ១៩ ក្នុងទឹកដីខេត្តស្រះកែវឱ្យមានប្រសិទ្ធភាព។
កន្លងមក អាជ្ញាធរខេត្តស្រះកែវបានចេញសេចក្តីប្រកាសកាលពីថ្ងៃទី២៩ ខែមីនា បិទព្រំដែនជាបណ្តោះអាសន្ន។ តាមសេចក្តីជូនដំណឹងរបស់ស្ថានអគ្គកុងស៊ុលកម្ពុជាប្រចាំខេត្តស្រះកែវចេញកាលពីថ្ងៃទី២៣ ខែមីនា កម្ពុជា និងភាគីថៃ សម្រេចបិទច្រកទ្វារព្រំដែននៃប្រទេសទាំងពីរគ្រប់កម្រិតជាបណ្តោះអាសន្ន រយៈពេល ១៤ថ្ងៃ ចាប់ពីថ្ងៃទី២៣ ខែមីនា ដល់ថ្ងៃទី៥ ខែមេសា ឆ្នាំ២០២០ ដើម្បីបង្ការ និងទប់ស្កាត់ការរីករាលដាលនៃជំងឺកូវីដ-១៩។ ប៉ុន្តែ ដោយសារតែមិនទាន់មានការបើកព្រំដែនឡើងវិញ ភាគីកម្ពុជាដែលជាអាជីវករ និងអ្នករកស៊ីទទួលទាននៅលើទឹកដីថៃ បានតវ៉ានៅច្រកទ្វារអន្តរជាតិប៉ោយប៉ែតកាលពីម្សិលមិញ ដើម្បីស្នើឱ្យអាជ្ញាធរប្រទេសទាំងពីរបើកព្រំដែនឡើងវិញ។
ច្រកទ្វារអន្តរជាតិ និងច្រកទ្វារតំបន់ រវាងកម្ពុជា-ថៃ មានចំនួន ២៤ច្រក៕
