សមាគមគ្រឹះស្ថានឧត្តមសិក្សា បានអំពាវនាវដល់ម្ចាស់អចលនវត្ថុ ដែលបានជួលទីតាំងឱ្យគ្រឹះស្ថានសិក្សាអប់រំឯកជន ជួយសម្របសម្រួលបញ្ចុះតម្លៃឈ្នួល ឬពន្យារពេលបង់ថ្លៃឈ្នួល ខណៈដែលសាលាត្រូវបានបិទដោយសារវិបត្តិកូវីដ១៩។
ក្នុងសេចក្តីអំពាវនាវរបស់សមាគមគ្រឹះស្ថានឧត្តមសិក្សាដែលចេញកាលពីថ្ងៃម្សិលមិញ ស្ថាប័ននេះលើកឡើងថា ដោយសារការរាតត្បាតនៃជំងឺកូវីដ១៩ ក្រសួងអប់រំ យុវជន និងកីឡា បានប្រកាសឱ្យគ្រឹះស្ថានអប់រំទូទាំងប្រទេស ធ្វើវិសមកាលតូចមុនកំណត់តាំងពីពាក់កណ្តាលខែមីនា បានធ្វើឱ្យបណ្តាគ្រឹះស្ថានសិក្សាដែលជាសមាជិករបស់សមាគមមានការលំបាកក្នុងការចំណាយលើប្រាក់បៀវត្សរបស់បុគ្គលិក ថ្លៃឈ្នួលអាគារ និងការបង់ការប្រាក់ និងប្រាក់ដើមដល់ធនាគារ ព្រមទាំងការចំណាយផ្សេងៗទៀតផងដែរ។
ក្រៅពីនេះ សមាគមគ្រឹះស្ថានឧត្តមសិក្សា ក៏បានស្នើឱ្យធនាគារឯកជនទាំងអស់ បន្ធូរបន្ថយអត្រាការប្រាក់ និងពន្យារការបង់ប្រាក់ដើម ដើម្បីឱ្យសាលាជាសមាជិករបស់ខ្លួនបានធូរស្រាលការលំបាកបានមួយកម្រិត។ ស្ថាប័នក៏បានស្នើផងដែរដល់គ្រូបង្រៀន និងបុគ្គលិកដែលធ្វើការក្នុងគ្រឹះស្ថានសិក្សាឯកជន បញ្ចុះប្រាក់បៀវត្សរ៍ប្រចាំខែ ឬប្រាក់ឈ្នួល។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា មានប្រសាសន៍ថាគ្រឹះស្ថានសិក្សាឯកជនអាចសុំទៅម្ចាស់ផ្ទះដោយផ្ទាល់ ដោយថាលោកនាយករដ្ឋមន្រ្តីបានប្រកាសស្នើសុំឱ្យម្ចាស់ផ្ទះចុះថ្លៃរួចហើយ។
លោក បញ្ជាក់ថា៖ «គ្រឹះស្ថានសិក្សាឯកជនត្រូវចេះចរចារជាមួយម្ចាស់ផ្ទះ និងភាគីពាក់ព័ន្ធដោយខ្លួនឯង។ ក្រសួងអប់រំ យុវជន និងកីឡា លើកទឹកចិត្តឱ្យគ្រឹះស្ថានសិក្សាឯកជននិងភាគីពាក់ព័ន្ធ ពិភាក្សាគ្នារកដំណោះស្រាយរួម ព្រោះក្នុងកំលុងពេលនេះគ្រប់ភាគីពាក់ព័ន្ធសុទ្ធតែស្ថិតក្នុងស្ថានភាពដែលតម្រូវឲ្យមានការយោគយល់គ្នាកម្រិតខ្ពស់»។
តាមសមាគមគ្រឹះស្ថានឧត្តមសិក្សា គ្រឹះស្ថានសិក្សាចំនួន១១៣ ដែលជាសមាជិករបស់សមាគម កំពុងជួបប្រទះបញ្ហាលំបាកទាំងនេះ និងផលប៉ះពាល់យ៉ាងខ្លាំងដោយសារកូវីដ១៩នេះ។ ទោះយ៉ាងណាក៏ដោយសមាគមក៏នៅតែអំពាវនាវដល់សមាជិកសមាគមទាំងអស់ ត្រូវតែពង្រឹងការបង្រៀនសិស្ស និងនិស្សិតតាម Online ដែលស្របតាមការប្រកាសរបស់ក្រសួងអប់រំ យុវជន និងកីឡា៕
