លោកនាយករដ្ឋមន្ត្រី ហ៊ុន សែន បានប្រកាសថា កម្មកររោងចក្រដែលត្រូវព្យួរការងារ នឹងទទួលបានប្រាក់ចំនួន ៧០ដុល្លារ។
ក្នុងសន្និសីទសារព័ត៌មាននៅវិមានសន្តិភាព នាថ្ងៃនេះ លោកនាយករដ្ឋមន្ត្រី ហ៊ុន សែន ថ្លែងថា អំឡុងពេលព្យួរការងារ កម្មករនឹងទទួលបានប្រាក់ ៧០ដុល្លារក្នុងមួយខែ ដោយក្នុងនោះ រដ្ឋាភិបាលរួមចំណែក ៤០ដុល្លារ ហើយថៅកែរោងចក្រត្រូវចេញ ៣០ដុល្លារវិញ។ លោកបញ្ជាក់ថា ប្រាក់ ៤០ដុល្លារនេះ កម្មករទទួលបានដោយមិនចាំបាច់ចុះឈ្មោះ និងចូលរៀនវគ្គបណ្តុះបណ្តាលនោះទេ។
លោក ហ៊ុន សែន ថ្លែងថា៖ «អ៊ីចឹង ឥឡូវនេះ រដ្ឋចេញ ៤០ដុល្លារ ម្ចាស់រោងចក្រ ៣០ដុល្លារ។ អ៊ីចឹង កម្មករម្នាក់តម្រូវទទួលបានប្រាក់ ៧០ដុល្លារ ដែលមុនហ្នឹង គិតដល់ ៩០ដុល្លារ រោងចក្ររត់អត់រួច បង្ខំតទៀតក៏អត់បានដែរ។ សមាគមរោងចក្របានលើកសំណើមក»។
ការផ្លាស់ប្ដូរជំហររបស់ប្រមុខរដ្ឋាភិបាលនេះ ធ្វើឡើងបន្ទាប់ពីសមាគមរោងចក្រកាត់ដេរនៅកម្ពុជា ហៅកាត់ GMAC លើកឡើងកាលពីថ្ងៃទី៣១ ខែមីនា ឆ្នាំ២០២០ ថាថៅកែរោងចក្រគ្មានលទ្ធភាពបើកប្រាក់ ៤០ភាគរយឱ្យកម្មករពេលព្យួរការងារតាមការណែនាំរបស់លោកនាយករដ្ឋមន្ត្រីទេ ដោយសារអ្នកបញ្ជាទិញបានផ្អាកទទួលទំនិញពីកម្ពុជា បន្ទាប់ពីផ្ទុះជំងឺកូវីដ១៩។
កាលពីថ្ងៃទី២៤ ខែកុម្ភៈ លោក ហ៊ុន សែន ប្រកាសថា កម្មករដែលថៅកែព្យួរការងារ នឹងទទួលបានប្រាក់ឈ្នួល ៦០ភាគរយនៃប្រាក់ខែគោលរបស់ពួកគេ ១៩០ដុលា្លរ ក្នុងនោះថៅកែចេញ ៤០ភាគរយ រដ្ឋាភិបាលចេញ ២០ភាគរយ ប៉ុន្តែ ប្រាក់ ២០ភាគរយ កម្មករអាចទទួលបានលុះត្រាតែពួកគេចុះឈ្មោះ និងចូលរៀនវគ្គបណ្តុះបណ្តាលជំនាញដែលរៀបចំដោយក្រសួងការងារ។
ប្រធានសហភាពការងារកម្ពុជា លោក អាត់ ធន់ អះអាងថា សេចក្ដីសម្រេចថ្មីរបស់រដ្ឋាភិបាលធ្វើឱ្យកម្មករដែលត្រូវបានព្យួរការងារ ជួបការលំបាកក្នុងរស់នៅប្រចាំថ្ងៃ។
លោកថា៖ «លុយនេះ គាត់មិនអាចបង់ធនាគារ ជីវភាពរស់នៅរបស់គាត់បានទេ មានការលំបាកមែនទែន។ ជាទូទៅ កម្មករចំណាយជិត ២០០ដុល្លារ ឱ្យ ១២០ដុល្លារ គាត់ពិបាកហើយ [ទម្រាំ]ដល់ ៧០ដុល្លារ ខ្ញុំគិតថា កាន់តែលំបាកទៀត»។
បើតាមលោកនាយករដ្ឋមន្ត្រី ហ៊ុន សែន ថ្លែងថា គិតមកដល់ថ្ងៃនេះ មានរោងចក្រជាង ១០០ ហើយ បានសុំព្យួរការងារ ដោយសារខ្វះវត្ថុធាតុដើមសម្រាប់ផលិត និងបញ្ហាមួយទៀត អ្នកបញ្ជាទិញបានផ្អាកទទួលទំនិញពីកម្ពុជា បន្ទាប់ពីផ្ទុះជំងឺកូវីដ១៩។
វីអូឌីមិនអាចសុំការអត្ថាធិប្បាយពីអ្នកនាំពាក្យក្រសួងការងារ លោក ហេង សួរ ជុំវិញរោងចក្រជាង ១០០ ដែលសុំព្យួរការងារនោះ តើប៉ះពាល់ដល់កម្មករប៉ុន្មាននាក់? ប៉ុន្តែ កាលពីដើមខែមេសាកន្លងមក ក្រសួងថា មានរោងចក្រចំនួន ៩១ បានសុំព្យួរការងារ ដែលប៉ះពាល់កម្មករ ៦១៥០០នាក់៕