ក្រុមសហជីព ស្នើទៅរដ្ឋាភិបាលផ្តល់ប្រាក់ឈ្នួលប្រចាំខែ ៦០% ជូនអ្នកធ្វើការនៅកាស៊ីណូ និងសេវាកម្សាន្ត ដូចកម្មកររោងចក្រដែលព្យួរការងារ ដើម្បីជួយសម្រួលដល់ជីវភាពគ្រួសារ នៅអំឡុងពេលមានការរីករាលដាលនៃកូវីដ១៩។
លិខិតរបស់ក្រុមសហជីព និងសមាគមគាំទ្រកម្មករដែលធ្វើការក្នុងវិស័យផ្សេងៗ ចុះថ្ងៃទី៦ ខែមេសា ដែលផ្ញើទៅរដ្ឋាភិបាល រៀបរាប់ប្រាប់ថា កូវីដ១៩ បានបណ្តាលឱ្យចង្វាក់ផលិតកម្មរោងចក្រកាត់ដេរ សណ្ឋាគារ សេវាកម្ម កាស៊ីណូ ក្លឹបកម្សាន្ត ដឹកជញ្ជូន សំណង់ កសិកម្ម និងវិស័យផ្សេងៗ ទទួលរងឥទ្ធិពលអវិជ្ជមាន ដោយកម្មករខ្លះត្រូវព្យួរកិច្ចសន្យាការងារ បាត់ចំណូលសម្រាប់ផ្គត់ផ្គង់ជីវភាពប្រចាំថ្ងៃ និងខ្លះទៀតប្រឈមនឹងជំពាក់បំណុលធនាគារជាដើម។
កាលពីថ្ងៃទី៧ ខែមេសា លោកនាយករដ្ឋមន្ត្រី ហ៊ុន សែន ថ្លែងក្នុងសន្និសីទសារព័ត៌មាន ពាក់ព័ន្ធបច្ចុប្បន្នភាពនៃជំងឺកូវីដ១៩ នៅវិមានសន្តិភាពកាលពីម្សិលមិញថា រដ្ឋាភិបាលបានសម្រេចផ្តល់ប្រាក់ខែនៅអំឡុងពេលព្យួរការងារ ជូនកម្មករ ចំនួន ៧០ដុល្លារក្នុងមួយខែ ដោយក្នុងនោះ រដ្ឋាភិបាលរួមចំណែក ៤០ដុល្លារ ហើយថៅកែរោងចក្រចេញ ៣០ដុល្លារ នៅអំឡុងនៃការឆ្លងជំងឺកូវីដ១៩ ខណៈវិស័យកាស៊ីណូ សេវាកម្សាន្ត និងវិស័យផ្សេងទៀត មិនទាន់ផ្តល់ឱ្យនៅឡើយ។
ករណីនេះ ក្រុមសហជីព និងសមាគម ស្នើទៅរដ្ឋាភិបាលជួយអន្តរាគមន៍ផ្តល់ប្រាក់ឈ្នួលប្រចាំខែដល់វិស័យកាស៊ីណូ សេវាកម្សាន្ត និងវិស័យផ្សេងទៀត ចំនួន៦០% នៅអំឡុងពេលថៅកែព្យួរកិច្ចសន្យាការងារដូចកម្មកររោងចក្រ ដើម្បីជួយសម្រួលដល់ជីវភាពរស់នៅប្រចាំថ្ងៃរបស់ពួកគេមួយផ្នែកផងដែរ។
ប្រធានសម្ព័ន្ធសហជីពកម្ពុជា លោកស្រី យ៉ាង សុភ័ណ្ឌ សង្ឃឹមថា រដ្ឋាភិបាល គួរគិតគូរផ្តល់ប្រាក់ឈ្នួល ៦០% ដល់វិស័យកាស៊ីណូ វិស័យក្លឹបកម្សាន្ត និងវិស័យផ្សេងៗ ដូចវិស័យកាត់ដេរដែរ ពីព្រោះអ្នកដែលធ្វើការវិស័យផ្សេងៗនោះ ស្ថិតនៅក្រោមច្បាប់ការងារដូចគ្នាដែរ។
លោកស្រីមានប្រសាសន៍ថា៖ «បងប្អូនកម្មករ ឬក៏នៅក្នុងវិស័យផ្សេងៗ គឺមិនខុសពីបងប្អូននៅក្នុងវិស័យកាត់ដេរសម្លៀកបំពាក់ទេ។ វាដូចគ្នា គាត់ក៏ស្ថិតនៅក្រោមច្បាប់ការងារដូចគ្នា។ រឿងអ្វីបានជាមានការអនុវត្តឱ្យគាត់ខុសគ្នា យើងស្នើសុំឱ្យពួកគាត់ទាំងអស់គ្នាទទួលបានផលប្រយោជន៍ដូចបងប្អូននៅក្នុងវិស័យកាត់ដេរដែរ ពួកគាត់កំពុងតែប្រឈមនឹងបញ្ហាពាក់ព័ន្ធជាមួយនឹងលុយខ្ចីធនាគារផ្សេងៗ ពីព្រោះគាត់ក៏មានបំណុលដូចបងប្អូនកម្មករដែរ ហើយគាត់ក៏មានទំនួលខុសត្រូវនៅក្នុងគ្រួសារដូចគ្នា»។
កាលពីម្សិលមិញនេះ លោកនាយករដ្ឋមន្ត្រី ហ៊ុន សែន ក៏បានថ្លែងដែរថា រដ្ឋាភិបាលមិនមានលទ្ធភាពជួយផ្គត់ផ្គង់ដល់អ្នកសេដ្ឋកិច្ចក្រៅប្រព័ន្ធ នៅអំឡុងពេលនៃការរីករាលដាលជំងឺកូវីដ១៩ ដូចកម្មកររោងចក្រនោះទេ។
លោកថ្លែងបែបនេះថា៖ «អ្នកដែលមានប័ណ្ណក្រីក្រ រដ្ឋនឹងធ្វើអន្តរាគមន៍ ប៉ុន្តែ ដូចដែលក្មួយសួរមកពូថា អ្នករត់ម៉ូតូឌុបគាត់ត្អូញត្អែរថា មានអ្វីប៉ះប៉ូវទេ លក់ម៉ូតូសិនទៅ ចាយសិនទៅ ទិញអង្ករស៊ីសិន ព្រោះបើមកឱ្យរកមកប៉ះប៉ូវទាំងអស់ ងាប់បាត់! រដ្ឋឯណាមានលុយ រដ្ឋពឹងពាក់លើពន្ធ ហើយបើយើងទៅខ្ចីលុយបរទេសយកមកបើកឱ្យអ្នកដែលអត់ការងារធ្វើ វាមិនងាប់បាត់ហើយ! ប្រទេសណាក៏គេមិនឱ្យយើងខ្ចីលុយយកមកបើកប្រាក់ខែដែរ អត់ទេ»។
តួលេខដែលផ្តល់ដោយអ្នកនាំពាក្យក្រសួងទេសចរណ៍ លោក តុប សុភ័គ ឱ្យដឹងថា សព្វថ្ងៃនេះ កម្ពុជាមានមណ្ឌលកម្សាន្តមនុស្សពេញវ័យចំនួនជិត ១ ៣០០ (១ ២៩៣)កន្លែង នៅទូទាំងប្រទេស គិតត្រឹមខែមីនា ឆ្នាំនេះ ក្នុងនោះមាន ខារ៉ាអូខេ (KTV) ចំនួន ១ ០៨៤កន្លែង ក្លិបឌីស្កូតែក (Club Disco) ចំនួន ១០៩កន្លែង អាជីកម្មរង្គសាល (Night Club) ចំនួន ១៦កន្លែង អាជីវកម្មបៀរហ្កាឌិន ចំនួន ៨៤កន្លែង ដែលផ្ដល់ការងារ ១៨ ៣៨១កន្លែងសម្រាប់ពលរដ្ឋកម្ពុជា។
សហព័ន្ធសហជីពកម្មករចំណីអាហារ និងសេវាកម្មកម្ពុជា (CFSWF) ប្រកាសថា បុគ្គលិកកម្មករដែលធ្វើការងារនៅក្នុងឧស្សាហកម្មកម្សាន្តនេះ មានរហូតដល់ជាង ៨ម៉ឺននាក់នៅទូទាំងប្រទេស ដែលរាប់ចាប់ពីអ្នកសម្អាតរហូតដល់បុគ្គលិកគ្រប់គ្រង៕