លោកនាយករដ្ឋមន្ត្រី ហ៊ុន សែន បានផ្ញើលិខិតថ្លែងអំណរគុណអតីតប្រធានគណបក្សសង្គ្រោះជាតិ លោក កឹម សុខា ដែលបានបរិច្ចាគថវិកាចូលរួមទប់ស្កាត់ជំងឺរលាកផ្លូវដង្ហើមថ្មីកូវីដ១៩។
លិខិតនេះ មន្ត្រីស្និទ្ធនឹងលោក កឹម សុខា គឺលោក មុត ចន្ថា បង្ហោះលើហ្វេសប៊ុករបស់លោក កាលពីថ្ងៃពុធម្សិលមិញ។
តាមលិខិត លោកនាយករដ្ឋមន្ត្រី ហ៊ុន សែន ចាត់ទុកការដែលលោក កឹម សុខា បរិច្ចាគថវិកា ៥ពាន់ដុល្លារ ដល់រដ្ឋាភិបាល សម្រាប់ប្រយុទ្ធប្រឆាំងនឹងជំងឺកូវីដ១៩ នោះថា ជាការបំពេញកាតព្វកិច្ចការពារ សង្គ្រោះសុខភាព និងសង្គ្រោះជីវិតប្រជាពលរដ្ឋកម្ពុជា ។
លោកថា៖ «ប្រជាជនកម្ពុជាយើងកំពុងតែប្រឈមនឹងហានិភ័យដែលបង្កឡើងជំងឺរីករាលដាលកូវីដ១៩។ ក្នុងស្មារតីនេះ រដ្ឋាភិបាលសូមថ្លែងអំណរគុណ និងកោតសរសើរដោយស្មោះចំពោះឯកឧត្តម ដែលបានបរិច្ចាគនូវជំនួយជាថវិកាចំនួន ៥ពាន់ដុល្លារ ដល់រាជរដ្ឋាភិបាលសម្រាប់ប្រយុទ្ធប្រឆាំងនឹងជំងឺដ៏កាចសាហាវមួយនេះ»។
មេដឹកនាំបក្សកាន់អំណាចរូបនេះ ក៏បានជូនពរឱ្យលោក កឹម សុខា និងក្រុមគ្រួសារ ជួបប្រទះតែនឹងពុទ្ធពរទាំង ៤ប្រការ គឺ អាយុ វណ្ណៈ សុខៈ និងពលៈ បើទោះបីមេដឹកនាំបក្សប្រឆាំងរូបនេះ កំពុងជាប់បណ្តឹងនៅតុលាការក៏ដោយ ។
សហមេធាវីការពារក្តីឱ្យលោក កឹម សុខា គឺលោក ចាន់ ចេន ឱ្យVODដឹងបន្ថែមថា កូនក្តីលោកពិតជាទទួលបានលិខិតឆ្លើយតបពីនាយករដ្ឋមន្ត្រីដូចអ្វីដែលលោក មុត ចន្ថា បង្ហាញនេះមែន ។
មេធាវីការពាររូបនេះ ថ្លែងថា លោកចង់ឃើញអ្នកនយោបាយប្រកួតគ្នាតាមយន្តការប្រជាធិបតេយ្យ មិនយកគ្នាជាសត្រូវ ទោះមាននិន្នាការខុសគ្នាក៏ដោយ។
មេធាវីរូបនេះ អះអាងថា លោកចង់ឃើញអ្នកនយោបាយយកឱកាសនេះសហការគ្នាដោះស្រាយបញ្ហាជាតិ។
លោកថា៖ «នៅក្នុងកាលៈទេសៈដែលប្រទេសជាតិកំពុងតែប្រឈមមុននឹងកូវីដ១៩ ជារោគរាតត្បាតបែបនេះ ខ្ញុំចង់ឃើញអ្នកនយោបាយខ្មែរគ្រប់ភាគីងាកមកជជែកគ្នារកដំណោះស្រាយជួយដល់ប្រជាពលរដ្ឋ និងប្រទេសជាតិរបស់យើង»។
លោក កឹម សុខា ត្រូវសមត្ថកិច្ចឆ្មក់ចូលចាប់ខ្លួនទាំងកណ្តាលអាធ្រាតឆ្លងចូលថ្ងៃទី៣ ខែកញ្ញា ឆ្នាំ២០១៧ ចោទថា «ក្បត់ជាតិ» ឃុបឃិតជាមួយសហរដ្ឋអាមេរិក ចង់ផ្តួលរំលំរដ្ឋាភិបាលរបស់លោក ហ៊ុន សែន។
ប៉ុន្តែ អាមេរិកចាត់ទុកលោក កឹម សុខា ថាជាមនុស្សស្អាតស្អំ តស៊ូមតិ ដើម្បីលទ្ធិប្រជាធិបតេយ្យ តែត្រូវបានគេឃុំខ្លួនទាំងអយុត្តិធម៌ និងអំពាវនាវឱ្យដោះលែងដោយគ្មានលក្ខខណ្ឌ។
ពីមុខសាលាដំបូងរាជធានីភ្នំពេញ កាលពីខែមុន ឯកអគ្គរដ្ឋទូតអាមេរិកប្រចាំកម្ពុជា បង្ហាញក្តីរំពឹងថា សេរីភាពលោក កឹម សុខា នឹងត្រូវស្តារឡើងវិញ ដើម្បីបើកផ្លូវទៅរកការប្រកួតប្រជែងមួយតបតាមយន្តការប្រជាធិបតេយ្យដូចមានចែងក្នុងរដ្ឋធម្មនុញ្ញកម្ពុជា។
អ្នកនាំពាក្យក្រសួងយុត្តិធម៌ លោក ជិន ម៉ាលីន ហៅសារលិខិតថ្លែងអំណរគុណរបស់នាយករដ្ឋមន្ត្រីចំពោះលោក កឹម សុខា ថានៅដាច់ពីនីតិវិធីច្បាប់ ។
លោកថា៖ «នេះជារឿងពីរដាច់ដោយឡែកពីគ្នា ១ជាការបង្ហាញសណ្តានចិត្តរបស់សម្តេចនាយកចំពោះសប្បុរសជន ហើយរឿងមួយទៀត ជាដំណើរការនៃនីតិវិធីរបស់តុលាការដែលត្រូវអនុវត្តតាមនីតិវិធីច្បាប់ដែលមានជាធរមាន»។
ក្រសួងការបរទេសកម្ពុជាឱ្យដឹងថា កាលពីថ្ងៃពុធម្សិលមិញ លោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងការបរទេសអាមេរិក លោក Mike Pomepeo បានសន្ទនាគា្នតាមទូរសព្ទ។
តាមសេចក្តីប្រកាស កិច្ចសន្ទនានោះ ភាគីទាំងពីរក្រៅពីរំឭកពីទំនាក់ទំនងការទូតជួយគ្នាប្រយុទ្ធប្រឆាំងនឹងជំងឺកូវីដ១៩ អាមេរិកបានបញ្ជាក់ពីសារសំខាន់នៃសេរីភាពបញ្ចេញមតិសំឡេងជំទាស់ ។
អ្នកវិភាគនយោបាយ លោក បណ្ឌិត មាស នី ហៅការជួបសន្ទនាតាមទូរសព្ទរវាងកម្ពុជា អាមេរិកពេលនេះ ជា សញ្ញាវិជ្ជមានមួយ បើប្រៀបធៀបទៅនឹងភាពចម្រូងចម្រាសប៉ុន្មានឆ្នាំចុងក្រោយនេះ។
ប៉ុន្តែ អ្នកវិភាគរូបនេះ បង្ហាញការយល់ឃើញថា បើទោះបីអាមេរិកពេលនេះបានព្យាយាមលើកឡើងថ្មីទៀតពីការធានាឱ្យមានសំឡេងប្រឆាំងឡើងវិញ តែអាចត្រូវការពេល។
លោកថា៖ «បើគិតពីមនោសញ្ចេតនា វានឹងអាចជាភ្លើងខៀវនៅពេលខាងមុខ បើកផ្លូវឱ្យមានដំណោះស្រាយនយោបាយ។ ប៉ុន្តែ សម្រាប់ខ្ញុំវិញ ខ្ញុំមើលឃើញថា វាគ្រាន់តែកម្រិតថា អរគុណ អាហ្នឹងជាការអរគុណបែបមនុស្សធម៌ទេ»។
កាលពីខែមករាកន្លងទៅ លោកនាយករដ្ឋមន្ត្រី ហ៊ុន សែន ក៏បានថ្លែងអំណរគុណលោក កឹម សុខា ផងដែរ ដែលបានបរិច្ចាគថវិកា ២ពាន់ដុល្លារ ជួយដល់អ្នករងគ្រោះដោយអាគារកម្ពស់ ៧ជាន់បាក់សង្កត់ នៅខេត្តកែប កាលពីថ្ងៃទី៣ ខែមករា ឆ្នាំ២០២០៕