រដ្ឋសភាបានឯកភាពទាំងស្រុងទៅនឹងសំណើរដ្ឋាភិបាល ដែលស្នើសុំពន្លឿនច្បាប់ដាក់ប្រទេសក្នុងគ្រាមានអាសន្នក្នុងភាពប្រញាប់ ដោយសំអាងថា ដើម្បីបុព្វហេតុសង្គ្រោះសុខភាពពលរដ្ឋពីជំងឺកូវីដ១៩ និងសន្តិសុខជាតិ។
ក្នុងកិច្ចប្រជុំនៅមន្ទីររដ្ឋសភា នៅថ្ងៃនេះ រដ្ឋមន្ត្រីក្រសួងយុត្តិធម៌ លោក កើត រិទ្ធ បានឡើងការពារថា ច្បាប់ស្តីពីការគ្រប់គ្រងប្រទេសគ្រាអាសន្ន ជាតម្រូវការចាំបាច់សម្រាប់រដ្ឋាភិបាល ក្នុងការការពារសន្តិសុខជាតិ សង្គ្រោះសុខភាពពលរដ្ឋ អំឡុងពេលជំងឺកូវីដ១៩ កំពុងរាតត្បាត។
លោកថា៖ «ការរៀបចំឱ្យមានច្បាប់ដើម្បីគ្រប់គ្រងប្រទេសក្នុងភាពអាសន្ន ពុំមែនជាការដាច់ដោយឡែកមួយសម្រាប់ព្រះរាជាណាចក្រកម្ពុជានោះឡើយ ជាក់ស្តែង ក្នុងបរិបទនៃការរីករាលដាលនៃជំងឺកូវីដ១៩ នៅទូទាំងពិភពលោក មានប្រទេសជាច្រើនបានសម្រេចប្រើច្បាប់ក្នុងគ្រាអាន្ន ក៏ដូចជាការដាក់ចេញនូវវិធានការចាំបាច់នានា ក្នុងគោលបំណងសង្គ្រោះអាយុជីវិតប្រជាជន និងស្តារឡើងវិញនូវសុខភាពសាធារណៈ»។
ទោះជាយ៉ាងណា សមាជិកសភាបានលើកដៃយល់ព្រមលើសេចក្តីព្រាងច្បាប់នេះ ក្រោមសំឡេង ១១៥ លើ ១១៥ ទំាងគ្មានសំឡេងជំទាស់ ដោយប្រើពេលជិត ២ម៉ោង។
ច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» មាន ៥ជំពូក និង ១២មាត្រា។ ច្បាប់នេះមិនត្រូវបានចែកឱ្យអ្នកសារព័ត៌មានដែលបានចូលតាមដានក្នុងមន្ទីររដ្ឋសភាទេ ក្រៅពីសេចក្តីប្រកាសហេតុរបស់នាយករដ្ឋមន្ត្រី។
តាមសេចក្តីប្រកាសហេតុ ច្បាប់ដាក់ប្រទេសក្នុងភាពអាសន្ននេះ ជាតម្រូវការចំបាច់មិនអាចខ្វះបាន ដើម្បីឆ្លើយតបទៅនឹងភាពវឹកវរធ្ងន់ធ្ងរដល់សន្តិសុខជាតិ គ្រោះថ្នាក់បង្កឡើងដោយសង្គ្រាមឈ្លានពានពីកម្លាំងបរទេស ព្រមទាំងមហន្តរាយធ្ងន់ធ្ងរ ដែលគំរាមកំហែងបង្កគ្រោះថ្នាក់រីករាលដាលដល់កម្រិតទូទាំងប្រទេស។
ប៉ុន្តែ បើតាមការឡើងថ្លែងរបស់ប្រធានគណៈកម្មការនីតិកម្ម និងយុត្តិធម៌នៃរដ្ឋសភា លោក ប៉ែន បញ្ញា ច្បាប់នេះប្រកាសក្នុងការប្រញាប់ ការដាក់ប្រទេសក្នុងគ្រាមានអាសន្នមិនលើសពី ៣ខែ តែអាចបន្តបានបើមានសំណើពីនាយករដ្ឋមន្ត្រី។
រដ្ឋអាចដកហូតទីតាំង ឬទ្រព្យសម្បត្តិឯកជនបាន ក្នុងករណីចាំបាច់នៃការអនុវត្តវិធាននេះ។ អ្នកប្រឆាំងនឹងច្បាប់នេះ អាចជាប់ពន្ធនាគារពី១ឆ្នាំ ដល់១០ឆ្នាំតាមស្ថានទម្ងន់ទោស ពិន័យជាប្រាក់ចន្លោះពី១លាន ដល់១០០លានរៀល ករណីរកឃើញថា បានបង្កឱ្យមានចលាចលសង្គម និងសន្តិសុខជាតិ។
