ក្រសួងសុខាភិបាលប្រកាសរកឃើញអ្នកឆ្លងជំងឺកូវីដ១៩ លើស្ត្រីជនជាតិចិនម្នាក់ទៀត ដែលធ្វើឱ្យចំនួនអ្នកឆ្លងជំងឺនេះបានកើនដល់ ១២០នាក់។
ក្នុងសេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី១១ ខែមេសា ឆ្នាំ២០២០ ឱ្យដឹងថា ស្ត្រីជនជាតិចិនដែលផ្ទុកជំងឺកូវីដ១៩នេះ មានអាយុ ៣១ឆ្នាំ ជាអ្នកទេសចរ និងជាមិត្តភក្ដិរបស់ស្ត្រីជនជាតិចិនអាយុ ៣០ឆ្នាំ ដែលបានរកឃើញមានវីរុសកូវីដ១៩ កាលពីថ្ងៃទី០៨ ខែមេសាកន្លងទៅ។
ក្រសួងសុខាភិបាល ឱ្យដឹងទៀតថា ស្ត្រីជនជាតិចិនដែលផ្ទុកជំងឺកូវីដ១៩នេះ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រៅពីរកឃើញអ្នកឆ្លងម្នាក់ទៀត ក្រសួងថា ក៏មានអ្នកជំងឺកូវីដ១៩ ជាសះស្បើយចំនួន ៣នាក់បន្ថែមទៀតផងដែរ។
បើតាមក្រសួងសុខាភិបាលឱ្យដឹងថា គិតមកដល់ថ្ងៃនេះ កម្ពុជារកឃើញអ្នកឆ្លងជំងឺកូវីដ១៩ សរុប ១២០នាក់។ ក្នុងចំណោមមនុស្សអ្នកឆ្លង ១២០នាក់ គឺអ្នកជាសះស្បើយចំនួន ៧៥នាក់ ឬស្មើនឹង ៦២,៥០% ហើយនៅសល់ ៤៥នាក់ កំពុងសម្រាកព្យាបាលនៅមន្ទីរពេទ្យ។
