សមត្ថកិច្ចថៃបានឃាត់ខ្លួនពលករខ្មែរប្រុសស្រីចំនួន ១៧នាក់ ខណៈពេលដែលពួកគេប្រមូលផ្តុំគ្នាផឹកគ្រឿងស្រវឹងនៅមុនបន្ទប់ជួល ដោយបំពានបម្រាមរបស់រដ្ឋាភិបាលថៃដែលហាមមិនឱ្យមានការជួបជុំសេពគ្រឿងស្រវឹងអំឡុងពេលចូលឆ្នាំ ដើម្បីទប់ស្កាត់ការរីករាលដាលនៃជំងឺកូវីដ១៩។
តាមសារព័ត៌មាន ប៉ាធុមថានី (Pathumthani News) ពលករខ្មែរទាំង ១៧រូបនោះ ត្រូវបានចាប់ខ្លួននាវេលាម៉ោង ៥ល្ងាច ថ្ងៃទី១៤ ខែមេសា ម្សិលមិញ នៅភូមិទី១២ ឃុំខ្លងសង ស្រុកខ្លងលួង ខេត្តប៉ាធុមថានី ប្រទេសថៃ។
អភិបាលស្រុកខ្លងលួង លោក និតិឆ័យ វិរិយានុន ត្រូវបានសារព័ត៌មានប៉ាធុមថានីដកស្រង់សម្តីមកចុះផ្សាយថា ក្រោយពីបានទទួលដំណឹងច្បាស់ការពីប្រជាពលរដ្ឋថា បន្ទប់ស្នាក់នៅរបស់ពលករមានការជួបជុំគ្នាផឹកស៊ីរាល់ថ្ងៃ លោកក៏បានបញ្ជាឱ្យកងកម្លាំងចុះមកស៊ើបអង្កេតមុននឹងឈានដល់ការចាប់ខ្លួនបានពលករបរទេស។ លោកថា ពលករខ្មែរដែលជួបជុំគ្នាទាំងនោះមិនបានពាក់ម៉ាស់ការពារនោះឡើយ។ លោកបន្ថែមថា ពលករ ៣នាក់ ព្យាយាមរត់គេចខ្លួនផងដែរ តែត្រូវបានសមត្ថកិច្ចចាប់ឃាត់ខ្លួនបាន។
ប្រភពដដែលឱ្យដឹងថា បច្ចុប្បន្ន ពលករខ្មែរទាំងអស់ត្រូវបានកម្លាំងសមត្ថកិច្ចថៃបញ្ជូនទៅកាន់អធិការដ្ឋានតម្រួតខ្លងលួង ដើម្បីត្រួតពិនិត្យមើលថា មានឯកសារអន្តោប្រវេសន៍ស្របច្បាប់ឬទេ និងចាត់វិធានការតាមផ្លូវច្បាប់របស់ប្រទេសថៃ។
អ្នកនាំពាក្យក្រសួងការបរទេសកម្ពុជា លោក កុយ គួង ប្រាប់វីអូឌីថា លោកពុំទាន់ទទួលបានព័ត៌មាននេះនៅឡើយទេ។ លោកអំពាវនាវឱ្យពលករខ្មែរត្រូវគោរពច្បាប់ប្រទេសដែលខ្លួនកំពុងបំពេញការងារ។ ទោះយ៉ាងណាក៏ដោយ អ្នកនាំពាក្យរូបនេះអះអាងថា ក្រសួងមិនទុកពលករទាំងនោះចោលនោះទេ។
លោក កុយ គួង បញ្ជាក់ថា៖ «នៅក្នុងប្រទេសណា ត្រូវគោរពច្បាប់ប្រទេសនោះ។ ស្ថានទូត និងស្ថានអគ្គកុងស៊ុលកម្ពុជានៅប្រទេសថៃ មិននៅស្ងៀមទេ ទោះពលរដ្ឋយើងស្ថិតក្នុងកាលៈទេសៈណាក៏ដោយ»។
តាមសារព័ត៌មានប៉ាធុមថានី ពលករទាំងនោះត្រូវបានជាប់ចោទពីបទល្មើសជួបជុំ និងប្រមូលផ្តុំគ្នា ដែលស្ថិតក្រោមច្បាប់ស្តីពីការគ្រប់គ្រងប្រទេសក្នុងគ្រាអាសន្ន និងច្បាប់ស្តីពីរោគឆ្លងរបស់ប្រទេសថៃ។ រដ្ឋាភិបាលថៃបានប្រកាសដាក់ឱ្យប្រើប្រាស់ច្បាប់ស្តីពីការគ្រប់គ្រងប្រទេសក្នុងគ្រាអាសន្នពីថ្ងៃទី២៦ ខែមីនាកន្លងមក។ អ្នកដែលល្មើសនឹងច្បាប់នេះ អាចមានទោសជាប់ពន្ធនាគាមិនលើសពី ២ឆ្នាំ ឬពិន័យប្រាក់មិនលើស ៤ម៉ឺនបាត ឬទាំងជាប់គុក និងពិន័យជាប្រាក់។
កាលពីថ្ងៃទី១២ ខែមេសា រដ្ឋាភិបាលថៃបានដាក់បម្រាមលើការលក់គ្រឿងស្រវឹង ព្រមទាំងបញ្ជាឱ្យបិទហាង ឬដេប៉ូលក់ស្រា និងស្រាបៀរនៅទូទាំង ៧៧ខេត្ត-រាជធានី ក្នុងអំឡុងរដូវបុណ្យចូលឆ្នាំថ្មី ដើម្បីបញ្ចៀសការជួបជុំ និងប្រមូលផ្តុំគ្នាផឹកគ្រឿងស្រវឹងដែលនាំឱ្យមានការរីករាលដាលនៃកូវីដ១៩៕
