ប្រធានក្រុមអ្នកនាំពាក្យរដ្ឋាភិបាល លោក ផៃ ស៊ីផាន ព្យាករថា សេដ្ឋកិច្ចកម្ពុជានឹងហក់ឡើងខ្លាំងរាងជាអក្សរ V ពេលអស់ជំងឺកូវីដ១៩ ខណៈមានការលើកឡើងថា វិស័យដឹកជញ្ជូនតាមផ្លូវអាកាសធ្លាក់ចុះជិត ១០០ភាគរយ។
ក្នុងសន្និសីទសារព័ត៌មានស្តីពី «វឌ្ឍនភាព ទិសដៅការងារបន្ដ របស់រដ្ឋលេខាធិការដ្ឋានអាកាសចរស៊ីវិល» នាថ្ងៃព្រហស្បតិ៍នេះ មន្ត្រីអាកាសចរស៊ីវិលមួយរូប អះអាងថា កត្តាវាស់វែងសេដ្ឋកិច្ច គេប្រើសេណារីយ៉ូពីរគឺ មួយរាងអក្សរ U និងមួយទៀតរាងអក្សរ V។
មន្ត្រីនោះពន្យល់ថា អក្សរ U ពេលសេដ្ឋកិច្ចធ្លាក់ចុះ វានៅទ្រឹងមួយរយៈ ទើបហក់ឡើងវិញ។ ចំណែកទម្រង់អក្សរ V វាធ្លាក់ចុះលឿន តែហក់ឡើងវិញលឿន។ លោក ផៃ ស៊ីផាន អះអាងថា សេដ្ឋកិច្ចនៅកម្ពុជានឹងហក់ឡើងតាមអក្សរ V ដោយសំអាងថា កម្ពុជាមានសក្តានុពលធំមួយចំនួនសម្រាប់ទាក់ទាញ។
បើតាមលោក ផៃ ស៊ីផាន កត្តាទាក់ទាញ ដោយសារកម្ពុជាមានអគ្គស្ថាបនិកសន្តិភាព គ្មានការបាញ់រះជាក្រុមដូចប្រទេសមួយចំនួន មានតំបន់ទេសចរណ៍ វប្បធម៌ គ្មានបន្ទុកខ្លាំងពីជំងឺកូវីដ១៩ ដែលលោកថា ជាការនាំមុខពិភពលោក។
លោកថា៖ «យើងសួរទៀតថា តើកូវីដ១៩ នឹងវាដាក់បន្ទុកមកលើខ្មែរច្រើនទេ ដូចជាអត់សូវមានប៉ុន្មានទេ អាហ្នឹងទី២។ បើសុវត្ថិភាពសុខុមាលភាព ដូចជាខ្មែរនាំមុនក្នុងរឿងហ្នឹងក្នុងពិភពលោក។ កត្តាទាំងអស់ហ្នឹងដែលយើងទស្សន៍ទាយបានថា កម្ពុជានឹងជួបដូចអក្ស V មានន័យថា វាស្រុតខ្លាំង តែវាឡើងវិញក៏ឡើងខ្លាំងដែរ»។
ការអះអាងរបស់លោក ផៃ ស៊ីផាន នេះ ក្រោយពីអ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សេរីវុត្ថា ប្រាប់អ្នកសារព័ត៌មានថា វិស័យដឹកជញ្ជូនតាមផ្លូវអាកាសចាប់ពីខែមករាមក បានធ្លាក់ចុះជាបន្តបន្ទាប់ស្ទើរ ១០០ភាគរយ ។
លោកថា៖ «នៅខែមួយ ភ្ញៀវចុះជាមធ្យមប្រហែល ២០ភាគរយ ដោយឡែកខែ២ ដោយសារមានវិធានការបិទជើងហោះហើរផ្សេងៗផង ចុះដល់ ៥០ភាគរយ ខែ៣ ចុះជាង ៧០ភាគរយ ដល់ខែ៤ នៅប៉ុន្មានថ្ងៃនេះ ដឹងចុះប៉ុន្មានអត់? ជាង ៩០ភាគរយ សឹងតែ ១០០ភាគរយ»។
ប៉ុន្តែ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង កាលពីថ្ងៃច័ន្ទ បានបង្ហាញការព្រួយបារម្ភថា ការឆ្លងរាលដាលក្នុងសហគមន៍ទ្រង់ទ្រាយធំនៃជំងឺកូវីដ១៩ វាអាចកើតឡើង បើពលរដ្ឋមិនចូលរួមអនុវត្តតាមសេចក្តីណែនាំរបស់ក្រសួងសុខាភិបាល និងបំរាមនានារដ្ឋាភិបាលដើម្បីទប់ស្កាត់ការឆ្លងរាលដាលនោះ។
លោកថា៖ «យើងនឹងឈានដល់ការឆ្លងដល់សហគមន៍ ហើយក៏ឈានដល់ទីបញ្ចប់ ឬឈានទៅដល់ក្តីវិនាសរបស់យើង គឺការស្លាប់។ ព្រោះកាលណាវាច្រើនហួស ការគ្រប់គ្រងខាងផ្នែកវេជ្ជសាស្ត្ររបស់យើង ក៏ជួបការលំបាកដែរ»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី បង្ហាញការយល់ឃើញថា ការស្តារសេដ្ឋកិច្ចឡើងវិញ កម្ពុជាទំនងជាត្រូវការពេលច្រើនជាងប្រទេសជាសមាជិកអាស៊ាន បើកម្ពុជាត្រូវបាត់បង់ប្រព័ន្ធអនុគ្រោះពន្ធ EBA របស់សហភាពអឺរ៉ុប និងចាក់ស្រេះដោយអំពើពុករលួយ និងគ្រួសារនិយមនោះ។
លោកថា៖ «អំពើពុករលួយហ្នឹងជាកត្តាមួយទាញសេដ្ឋកិច្ចមិនឱ្យទៅលឿនដូចគេទេ ដោយសារប្រទេសយើងហ្នឹងវារឹតរួតដោយគ្រួសារនិយម បក្ខពួកនិយម»។
អង្គការតម្លាភាពអន្តរជាតិ ហៅកាត់ថា TI កាលពីឆ្នាំ២០១៩ បានចេញរបាយការណ៍មួយរកឃើញថា កម្ពុជា មានអំពើពុករលួយខ្ពស់ជាងគេក្នុងប្រទេសជាសមាជិកអាស៊ាន។
របាយការណ៍បញ្ជាក់ថា៖ «អ្វីដែលទាញកម្ពុជាឱ្យធ្លាក់ពិន្ទុ មកពីអំពើពុករលួយនយោបាយក្នុងប្រព័ន្ធយុត្តិធម៌»។
ក្នុងអំឡុងពេលនៃការប្រយុទ្ធប្រឆាំងការឆ្លងរាលដាលមេរោគកូវីដ១៩នេះ លោកនាយករដ្ឋមន្ត្រី ហ៊ុន សែនបានប្រកាសកាត់ថវិកាចំណាយពីក្រសួងនានា ហើយលោកក៏ប្រកាសដាក់ថវិកាផ្ទាល់ខ្លួនមួយចំនួន និងអំពាវនាវឱ្យសប្បុរសជន រួមទាំងមន្ត្រីរាជការចូលរួមថវិកាសម្រាប់រដ្ឋាភិបាលប្រើប្រាស់ក្នុងអំឡុងពេលប្រយុទ្ធប្រឆាំងកូវីដ១៩នេះ៕
