លោកនាយករដ្ឋមន្ត្រី ហ៊ុន សែន បានឱ្យដឹងថា មានអ្នកបង្កើតជាគណនី និងផេកហ្វេសប៊ុកជាច្រើន ដោយប្រើប្រាស់ឈ្មោះ និងរូបថតរបស់លោក ក្នុងចេតនាបន្លំ ដើម្បីផ្សព្វផ្សាយព័ត៌មានមិនពិត ធ្វើឱ្យសាធារណជនមានការយល់ច្រឡំ និងបង្កបញ្ហាក្នុងសង្គម។
លោកនាយករដ្ឋមន្ត្រី ហ៊ុន សែន បានសរសេរខ្លឹមសារនៅលើហ្វេសប៊ុករបស់លោកនៅថ្ងៃនេះថា ក្នុងពេលដែលរាជរដ្ឋាភិបាលកម្ពុជា បានដាក់ចេញនូវយុទ្ធសាស្រ្តប្រយុទ្ធប្រឆាំងនឹងជំងឺកូវីដ-១៩ ក៏មានអ្នកបង្កើត Profile និង Page មិនពិតជាច្រើនក្នុង Facebook ដាក់ឈ្មោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងចេតនាមិនល្អ រួមទាំងបង្ហោះសារ និងប្រឌិតនូវព័ត៌មានមិនពិតជាច្រើន ដើម្បីបោកប្រាស់ បំភ័ន្តភ្នែកសាធារណជន ក្នុងគោលបំណងបំពុលសង្គមជាតិ ជាដើម។
ហ្វេសប៊ុកដដែលបញ្ជាក់ថា ហ្វេសប៊ុកឈ្មោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា មាន Profile និង Page ផ្លូវការតែមួយគត់ក្នុង Facebook ដែលមានសញ្ញាគូសធិក (tick) ពណ៌ខៀវ ដែលបញ្ជាក់ថា ពិត (Verified) ពីក្រុមហ៊ុនហ្វេសប៊ុក (Facebook)។
លោកនាយករដ្ឋមន្ត្រី ហ៊ុន សែន ក៏បានអំពាវនាវទៅអ្នកប្រើប្រាស់បណ្តាញសង្គម Facebook មានការទទួលខុសត្រូវ និងប្រុងប្រយ័ត្នខ្ពស់ ហើយកត់សម្គាល់ Profile/Page ពិត និង Profile/Page ក្លែងក្លាយដែលដាក់ឈ្មោះ សម្តេចតេជោ ហ៊ុន សែន កំពុងបង្ហោះសារ និងព័ត៌មានមិនពិត ដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស និងសេចក្តីថ្លៃថ្នូររបស់ប្រមុខដឹកនាំផងដែរ។
បន្ថែមពីនេះ លោក ហ៊ុន សែន បានជំរុញទៅក្រសួងជំនាញ ធ្វើការស្រាវជ្រាវ ពិនិត្យ និងបិទ Profile/Page ក្លែងក្លាយទាំងនោះជាបន្ទាន់ ដើម្បីកុំឱ្យបន្តផ្សព្វផ្សាយសារ និងព័ត៌មានបោកបញ្ឆោតបំពុលបរិកាសសង្គមជាបន្តទៀត៕
