អាកាសចរស៊ីវិល អះអាងថា គម្រោងវិនិយោគព្រលានយន្តហោះក្នុងខេត្តកោះកុង ត្រូវក្រុមហ៊ុនលើកសំណើសុំធ្វើនៅកន្លែងថ្មីវិញ ក្រោយសិក្សារកឃើញថា ផលប៉ះពាល់សង្គម និងបរិស្ថានមានទំហំធំ។
ក្នុងសន្និសីទសារព័ត៌មាន កាលពីថ្ងៃព្រហស្បតិ៍ម្សិលមិញ នៅរាជធានីភ្នំពេញ អគ្គនាយករង និងជាអ្នកនាំពាក្យអាកាសចរស៊ីវិល លោក ស៊ិន ចាន់សិរីវុត្ថា មានប្រសាសន៍ថា ការវិនិយោគអាកាសយានដ្ឋានខេត្តកោះកុង គឺជាការវិនិយោគរួមគ្នារវាងក្រុមហ៊ុនបាងកកអ៊ែវេ និងក្រុមហ៊ុនលីយ៉ុងផាត់។
មន្ត្រីរូបនេះបន្តថា ដំបូងឡើយ ក្រុមហ៊ុនឯកភាពវិនិយោគអាកាសយានដ្ឋានដែលមានស្រាប់នៅក្នុងខេត្តនេះ។ ប៉ុន្តែ បន្ទាប់ពីសិក្សាច្រើនដង រកឃើញផលប៉ះពាល់សង្គម និងបរិស្ថានមានទំហំធំ និងទៅអនាគតមិនអាចពង្រីកអាកាសយានដ្ឋាននេះឱ្យធំបាននោះ ក្រុមហ៊ុនបានលើកសំណើសុំការផ្លាស់ប្តូរទីតាំងថ្មី មានចម្ងាយ ២០គីឡូម៉ែតពីទីរួមខេត្ត។
លោកថា៖ «យោងតាមការសិក្សានេះ ក្រុមហ៊ុនបានលើកសំណើសុំផ្លាស់ប្តូរទីតាំងពីអាកាសយាន្តដ្ឋានថ្មីនេះទៅទីតាំងថ្មីវិញ ដែលមានចម្ងាយប្រហែល ២០គីឡូម៉ែត្រពីទីរួមខេត្ត។ អីចឹង ដំណើរការនៃអាកាសយាន្ឋដ្ឋាននេះស្ថិតក្នុងការសិក្សាបន្ថែមទៀតពីផលប៉ះពាល់សង្គម និងបរិស្ថាន ហើយនិងការអភិវឌ្ឍផ្សេងៗទៀត»។
ប៉ុន្តែ មន្ត្រីជាន់ខ្ពស់អាកាសចរស៊ីវិលរូបនេះ មិនបានបញ្ជាក់ថា ផលប៉ះពាល់ទំហំធំនោះ ប៉ះពាល់ទៅលើអ្វីខ្លះពិតប្រាកដទេ ហើយក៏មិនបានបញ្ជាក់ថា ទីតាំងថ្មីនោះក្រុមហ៊ុនបានស្នើសុំដីប៉ុន្មានហិកតាដែរ។
អ្នកនាំពាក្យអាកាសចរស៊ីវិលមួយរូបទៀត គឺលោក ជា អូន សុំមិនធ្វើអត្ថាធិប្បាយពាក់ព័ន្ធនឹងសំណួរនេះ ដោយជំរុញឱ្យសួរលោក ស៊ិន ចាន់សិរីវុត្ថា វិញ តែ VOD មិនអាចទាក់ទងបាន គិតត្រឹមម៉ោងផ្សាយនេះ។
មន្ត្រីសម្របសម្រួលអង្គការលីកាដូប្រចាំខេត្តកោះកុង លោក ប៉ែន វុទ្ធា អះអាងថា ព្រលានយន្តហោះចាស់ដែលក្រុមហ៊ុនគ្រោងអភិវឌ្ឍនោះ មានពលរដ្ឋរស់នៅជុំវិញនោះច្រើនរហូតដល់រយគ្រួសារ។
មន្ត្រីឃ្លាំមើលសិទ្ធិមនុស្សរូបនេះ ហៅការបង្វែរទិសវិនិយោគនេះ ជាគំរូល្អមួយ ព្រោះវាបានទប់ស្កាត់មិនឱ្យមានការបណ្តេញពលរដ្ឋចេញពីលំនៅឋានទាំងបង្ខំ ។
លោកថា៖ «គាត់ធ្វើការស្នើសុំកន្លែងផ្សេង វាជារឿងមួយល្អហើយ កុំឱ្យមានការបណ្តេញចេញប្រជាពលរដ្ឋដើម្បីវិនិយោគ។ អីចឹង មើលទៅ វាដូចជាល្អប្រសើរម្យ៉ាងដែរ»។
នៅខេត្តកោះកុង ក៏ក្រុមហ៊ុនវិនិយោគចិនមួយឈ្មោះ ញ៉ូញៀន (Union Development Group (UDG)) ក៏ទទួលបានសិទ្ធិសាងសង់អាកាសយានដ្ឋាននៅស្រុកតារាសាគរដែរ។
របាយការណ៍ និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិន ញូញៀន (UDG) បានធ្វើឱ្យប្រជាពលរដ្ឋ ១១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង ១ម៉ឺនហិកតា និងផ្ទះ ១៥០០ខ្នង ត្រូវបង្ខំឱ្យរុះរើ និងឈូសឆាយ។ ប្រជាពលរដ្ឋដែលមានជម្លោះជាមួយការអភិវឌ្ឍនេះ តែងចេញមុខតវ៉ាជាបន្តបន្ទាប់ទាំងនៅខេត្តកោះកុង និងតវ៉ានៅរាជធានីភ្នំពេញ។
បើតាមមន្ត្រីអាកាសចរស៊ីវិល បច្ចុប្បន្ន កម្ពុជា មានអាកាសយានដ្ឋានអន្តរជាតិកំពុងដំណើរការធំៗ២ គឺមួយនៅភ្នំពេញ និងមួយទៀតនៅខេត្តសៀមរាប និងកំពុងសិក្សាពីលទ្ធភាពកសាងនៅមណ្ឌលគីរី ប៉ោយប៉ែតក្នុងខេត្តបន្ទាយមានជ័យ និងនៅខេត្តបាត់ដំបង៕