ក្រសួងសុខាភិបាលកម្ពុជា ប្រកាសថា ខ្លួនបានព្យាបាលអ្នកជំងឺកូវីដ១៩ ចំនួន២នាក់បន្ថែមទៀតជាសះស្បើយ ដែលនាំឱ្យចំនួនអ្នកជាពីជំងឺនេះសរុបកើនដល់ ១០៥នាក់។
សេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃនេះ ឱ្យដឹងថា ស្រ្តីជាភ្ញៀវទេសចរជនជាតិវៀតណាម វ័យ ៣៤ឆ្នាំ ដែលស្នាក់នៅបណ្តោះអាសន្ននៅកោះពេជ្រ រាជធានីភ្នំពេញ និងកុមារជនជាតិខ្មែរអាយុ ១២ឆ្នាំ នៅខេត្តសៀមរាប ដែលឆ្លងកូវីដ១៩ ពីឪពុកដែលចូលរួមពិធីសាសនានៅម៉ាឡេស៊ី មានលទ្ធផលតេស្តអវិជ្ជមានកូវីដ១៩ ចំនួន ២ដង។ ក្រសួងបញ្ជាក់ថា អ្នកទាំងពីរត្រូវបានអនុញ្ញាតឱ្យចេញពីមន្ទីរពេទ្យហើយ។
ក្រសួងសុខាភិបាល ក៏បានប្រកាសឱ្យដឹងថា មិនមានការរកឃើញករណីអ្នកឆ្លងកូវីដ១៩ថ្មីទេ។ គិតត្រឹមថ្ងៃនេះ កម្ពុជារកឃើញអ្នកមានកូវីដ១៩ ចំនួន ១២២នាក់ ដែលក្នុងនោះកំពុងសម្រាកព្យាបាលនៅមន្ទីរពេទ្យរដ្ឋថ្នាក់ជាតិ និងថ្នាក់ខេត្តនៅសល់ត្រឹមតែ ១៧នាក់ប៉ុណ្ណោះ៕
