ស្ថានទូតកម្ពុជាប្រចាំសហព័ន្ធរុស្ស៊ី បានឱ្យដឹងថា សិក្ខាកាមយោធាកម្ពុជាចំនួន៣នាក់ឆ្លង ជំងឺកូវីដ១៩។
លិខិតរបស់ស្ថានឯកអគ្គរាជទូតកម្ពុជាប្រចាំសហព័ន្ធរុស្ស៊ី ចេញផ្សាយនៅថ្ងៃនេះថា សិក្ខាកាមយោធាកម្ពុជាឆ្នាំទី៣ ចំនួន៣នាក់ មានឈ្មោះ គុណ សំសុខហេង, ណោ ស៊ុនឌីរតនៈ និងឈ្មោះ ស៊ា ស៊ាងលី ដែលកំពុងសិក្សានៅ សាកលវិទ្យាល័យ វេជ្ជសាស្ត្រយោធានៃ ទីក្រុងសេនភតធើស្បឺក (Saint Petersburg) បានឆ្លងជំងឺកូវីដ១៩ ពីសិក្ខាកាមយោធាជនបរទេសដទៃទៀតដែលរៀន និងស្នាក់នៅជាន់ជាមួយគ្នា។
ប្រភពដដែលឱ្យដឹងទៀតថា អ្នកទាំង ៣នាក់នោះ ត្រូវបានសាលាបញ្ជូនទៅមន្ទីរពេទ្យក្រុងនៃប្រទេសរុស្ស៊ី ដើម្បីព្យាបាល កាលពីថ្ងៃទី១៨ ខែមេសា។
ទោះជាយ៉ាងណា ក្នុងលិខិតដដែលបញ្ជាក់ថា ស្ថានភាពជំងឺរបស់អ្នកទាំង៣នាក់នោះ មិនទាន់មានសភាពធ្ងន់ធ្ងរនៅឡើយ ដោយសារពួកគេបានរាយការណ៍ពីស្ថានភាពជំងឺប្រាប់ទៅមន្ទីរពេទ្យ ដើម្បីពិនិត្យរកមេរោគកូវីដ១៩បានទាន់ពេល៕